22
1 I umeqqran n imeɣnajen, s teɣnint n ‘Tudadt n tuffut’. Azehhed n Dawud. 2 Arebbi inu, Arebbi inu, mayemmi i d ayi tejjid?
Zi řaggʷaj i teǧid zeg usenjem inu,
zeg wawařen i sɣuyyuɣ am weyrad. ■
3 A AREBBI inu, řaɣiɣ deg wass, maca Cek war xafi dd-tarrid ca,
s ǧiřet, maca necc war ufiɣ arraḥet.
4 Cek d amqeddes i teǧid, tzeddɣed di řwest n izřan n uṣebbeḥ n Israil.
5 Ttecřen xak řejdud nneɣ,
tuɣa ttecřen u Cek tarrid ten ad nejmen.
6 Nitni sɣuyyen-dd ɣarek uca ttwasnejmen,
tuɣa ttecřen xak u war nnḥecmen ca. ■
7 Necc d ict n tkecca, war iǧi d aryaz,
necc d řḥegra n iwdan, ttwaseḥqareɣ jar řgens. □
8 Marra inni d ayi iẓrin, stehzan zzayi,
arzmen iyencicen nsen, ssenhezzan azeǧif. ■
9 Qqaren: “Seɛdu t x SIDI,
ejj Wanita ad t ifekk, ad t issenjem,
maɣar Netta yarḍa xas.” ■
10 Minzi Cek tjebbded ayi-dd zeg uɛeddis n yemma,
Cek tarrid ayi di řaman x wabbucen n yemma.
11 Zi řemrawet ttwammenḍareɣ xak,
zeg uɛeddis n yemma aqa Cek d Arebbi inu.
12 War ttɣimi bu ɣar řaggʷaj zzayi,
maɣar řeḥṣaret tudes u war din ca amɛawan.
13 Aṭṭas n iyenduzen nnḍen ayi-dd,
ifunasen n řexřa ijehden zi Bacan quwwaren ayi-dd, □
14 arzmen-dd ɣari aqemmum nsen
amecnaw ijj n weyrad ittmezzaqen, izehharen.
15 Necc ttwafarrɣeɣ am waman u marra ixsan inu ttwammsebḍan.
Uř inu am ccmeɛ, aqa ifsi daxeř inu.
16 Jjehd inu yuẓeɣ am ijj n uceǧiq n ict n tqedduḥt,
iřes inu iřṣeq ɣar waneɣ inu.
Cek tessarsed ayi di tɛejjajt n řmewt.
17 Maɣar iṭan nnḍen ayi-dd,
ict n bandiyya n tarwa n řeḥram quwwaren ayi-dd,
aqa amecnaw ayrad ifassen d iḍaren inu. □ ■
18 Zemmareɣ ad ḥesbeɣ marra ixsan inu,
ttwařan ayi nitni, xezzaren-dd ɣari.
19 Nitni bḍan arruḍ inu jar asen,
uca nḍaren taqedduḥt x řeɛbayet inu. ■
20 Cek, a SIDI, war ttiři ɣar řaggʷaj, a jjehd inu,
as-dd deɣya ḥima ad ayi tɛawned.
21 Fekk řeɛmar inu zi ssif,
ayenni zeg uqeṭṭes n weqzin.
22 Fekk ayi zeg uqemmum n weyrad,
fekk ayi zeg waccawen n ifunasen n řexřa! Aqa Cek tesřid ayi.
23 Ad barrḥeɣ Isem nnek i wawmaten inu,
ad xak ṣebḥeɣ di řwest n wegraw n řgens. ■
24 Kenniw, inni itteggʷden SIDI, semɣarem t,
a kenniw, marra zzariɛet n Yaɛqub,
sɛuǧem t u weqqarem t,
a kenniw, marra zzariɛet n Israil,
25 maɣar Netta war isseḥqir ca řeḥṣaret n wenni ittwaḥṣaren, war tt iɛiff ca,
war xas issnuffar ca udem nnes,
maca Netta isřa as mařa iřaɣa as-dd.
26 Zzayek ad dd-yas uqadi inu deg ijj n wegraw n řgens ameqqran,
ad kemmřeɣ lwuɛud inu zzat i yenni zzayes itteggʷeden.
27 Imwaḍɛen ad ccen u ad jjiwnen,
inni arezzun x SIDI ad as ṣebbḥen,
uřawen nsen ad ddaren i řebda.
28 Marra tineggura n temmurt ad t idarent,
ad dd-dewřen ɣar SIDI,
marra řaǧat n ddunect ad aḍarent zzat i wudem nnek, ■
29 minzi tageldit i SIDI i teǧa,
Netta iḥekkem jar řegnus.
30 Marra inni iṣeḥḥen di temmurt ad ccen ad sejden,
marra inni dd-ihekkwan di tɛejjajt ad aḍaren zzat i wudem nnes,
kuř ijjen i war izemmaren ad iḥḍa řeɛmar nnes.
31 Zzariɛet ad as tsexxar,
ad tᵉttwazemm d arraw i Sidi inu.
32 Ad dd-asen, ad barrḥen tasegda nnes i yijj n řgens,
wenni i ɣa dd-ittwaxeřqen maɣar Netta aqa igga i-tt. ■