1 I umeqqran n imeɣnajen. Azehhed n Dawud.

2 Ijenwan barrḥen s uɛuǧi n Arebbi,

řqubbet tessiweř x řxedmet n ifassen nnes.

3 Ass issazzař awařen i wass,

ǧiřet tesscan tussna ɣar ǧiřet.

4 War iǧi d řhard u war ǧin ca d awařen,

tmijja nsen war d as ittesři ḥed.

5 Řumur nsen iffeɣ x temmurt marra,

awařen nsen ffɣen ɣares ař ṭṭarf n ddunect.

Netta igga diha ijj n uqiḍun i tfuct, ^■  

6 amecnaw muřay nni dd-issijjen zeg wexxam n řemřac,

isřiwřew am ijj n bu-teryast ḥima ad iksi di ticři nnes. ^■  

7 Iffeɣ-dd zeg ijj n ṭṭarf n ujenna,

uca yuyur ař ṭṭarf nnes nneɣni,

war tennuffar uřa d ict n řḥajet i řḥaduq nnes.

8 Aqa tekmeř Ccariɛa n SIDI,

tiwi-dd agenfu i buḥbeř.

Cchadat n SIDI daysent řaman,

tticcent tiɣit i uḥafi. ^■  

9 Řumurat n SIDI seggden,

ssfarrḥen uř.

Tawṣiyyet n SIDI teṣfa,

tesscan tafawt i tiṭṭawin.

10 Tiggʷudi zi SIDI teṣfa,

teqqim tbedd i řebda.

Řeḥkamat n SIDI d tidett,

aqa-tent d řḥeqq marra.

11 Nitenti jebbdent meẓri ktar x wureɣ,

wah, ktar zeg wureɣ ittwaṣeffan,

aqa-tent d timiẓidin x tamment niɣ x tamment n teɣraṣt. ^■  

12 Uřa d amsexxar nnek ittwawebbex zzaysent,

deg uḥeṭṭu nsent tennuffar dayes řmunet tameqqrant.

13 Aweddar, wi zzayes yucin?

Sizdeg ayi zi min war ittbinen.

14 Ḥḍa amsexxar nnek ɛawed zeg uɛeffar,

ḥima war xafi ittṣeǧiḍ,

ḥima ad iřiɣ d amezdag zeg uxeṭṭu imɣaren.

15 Ad dd-asen wawařen n uqemmum inu d ixariṣṣen n wuř inu,

x řxaḍar nnek, a SIDI, a Taṣḍart inu d Amefdi inu!