18
1 I umeqqran n imeɣnajen. Azehhed n Dawud, amsexxar n SIDI, wenni issiwřen awařen n yezři aya i SIDI,
deg wass umi t ifekk SIDI,
zeg ufus n marra řɛedyan nnes, u zeg ufus n Cawul. □
2 Netta inna:
“Necc ttexseɣ Cek, a SIDI, jjehd inu d Cek.
3 SIDI d Jjarf inu d lburj inu d amfekki inu,
Arebbi inu, Taṣḍart inu, necc ɣares i ɣa arewřeɣ.
Cek d taseddart inu n useřqi d yicc n usenjem inu,
lburj inu yuɛřan.
4 Necc řaɣiɣ-dd x SIDI, wenni isdaḥeǧen asemɣar,
u necc aqa ttwasnejmeɣ zi řɛedyan inu.
5 Iseɣwan n řmewt nnḍen ayi-dd,
ssiggʷedent ayi řḥemřat n waman ihajen.
6 Iseɣwan n řaxart carfen ayi,
tixecfin n řmewt ḥṣarent ayi.
7 Di řeḥṣaret inu řaɣiɣ-dd x SIDI,
x AREBBI inu i x dd-řaɣiɣ.
Zi Zzawect nnes Tameqqrant isřa Netta i tmijja inu,
iɣuyyan inu udfen ɣar imezzuɣen nnes.
8 Xenni tenhezz u tarjij temmurt,
dsusa n idurar ttraḥen-dd ttasen-dd u nhezzen,
maɣar ittwasarɣ weɣḍab nnes.
9 Igeɛɛed-dd ddexxan zeg wenzaren nnes
u timessi zeg uqemmum nnes tṣarḍ,
řefḥem itteḥduduqen ittwasarɣ zzayes.
10 Netta ijja ajenna ad yaḍar uca xenni ihwa-dd Netta,
aqa din ijj n useynu ibbumbes sadu iḍaren nnes.
11 Indeh x ijj n ukirub, wah iḍwa,
uca iḥewwem x wafriwen n uṣemmiḍ. □
12 Netta igga taǧest am ijj n udurri x yixef nnes, am uɛiccu nnes,
ijj n wegraw n waman, iseynuten iqelljen ibbarecnen.
13 S tissiqt qibač nnes ttwasarɣen řefḥem itteḥduduqen.
14 SIDi igga ajjaj ad idduqqez deg ijenwan,
Amɛuǧi x kuřci igga tmijja nnes ttnefrara.
15 Netta issekk fřitcat n řqews nnes uca ibezzeɛ i-ten,
izzaryeḍ assamen uca issiggʷed i-ten.
16 Tisiwin n iɣezran dewřent ttbanent,
dsusa n ddunect dewřen ɛarran,
zeg uweddeb n SIDI,
zeg uṣuḍi n řeɛwin zeg wenzaren nnes.
17 Zi sennej isswiẓẓeḍ-dd afus nnes, yiwi ayi,
ijbed ayi-dd zeg waman mɣaren.
18 Netta ifekk ayi-dd zi řeɛdu inu ijehden,
zeg inni d ayi icarrhen, minzi nitni tuɣa jehhden xafi.
19 Nitni ḥṣaren ayi deg wass n arẓiyyet inu,
maca SIDI tuɣa d amɛemmed inu.
20 Netta indeh ayi ɣar ttasiɛ uca issenjem ayi,
maɣar Netta tuɣa issɛizza ayi.
21 SIDI ixřef ayi ɛlaḥsab tasegda inu,
ɛlaḥsab tazdugi n ifassen inu ixeǧeṣ ayi.
22 Maɣar necc ṭṭfeɣ ibriden n SIDI,
war ḥeyydeɣ ca x AREBBI inu s uxeyyeb.
23 Maɣar marra řḥeqq nnes tuɣa jar i tiṭṭawin inu,
war ḥeyydeɣ ca x tweṣṣa nnes.
24 Dewřeɣ akides kemřeɣ,
ḥḍiɣ ixef inu zi řmuɛṣiyyet inu.
25 SIDI ixřef ayi anect n tsegda inu,
anect n tazdugi n ifassen inu zzat i tiṭṭawin nnes.
26 I umeddukkeř amtiqqi i teǧid Cek d ameddukkeř amtiqqi,
i bu-teɣruḍt ikemmřen i teǧid Cek tkemmřed.
27 I wenni ittwasizedgen aqa Cek d amezdag,
ak-d wenni ifarɣen, aqa tfarɣed.
28 Cek tessnejmed řgens ittwaḥṣaren,
maca tiṭṭawin ɛeffarent ad tent tessehwid.
29 Minzi Cek d řefnar inu, a SIDI!
AREBBI inu ittegg tafawt di taǧest inu.
30 Minzi akidek ad azzřeɣ x ict n bandiyya,
ak-d AREBBI inu ad negzeɣ x ijj n řḥiḍ.
31 Abrid n Arebbi ikmeř, min iqqar SIDI ittwaṣeffa di tmessi.
Netta d taseddart n useřqi i marra inni dayes ittiqqan.
32 Maɣar man wen i iǧan d Arebbi, mɣir SIDI,
u man wen i iǧan d Taṣḍart, mɣir AREBBI nneɣ?
33 Arebbi wenni d ayi ittbeysen s jjhed,
wenni d ayi itticen abrid inu ikmeř.
34 Netta igga iḍaren inu am yenni n tudadin,
Netta yarra ayi ad beddeɣ x řegɛudi inu.
35 Isseřmed ifassen inu i umenɣi,
iɣaǧen inu maḥend ad meḥḍen ijj n řqews n nnḥas.
36 Tewcid ayi taseddart n useřqi n usenjem nnek,
afus nnek afusi d asenned inu,
u s uwaḍeɛ nnek tessemɣared ayi.
37 Aqa teggid ttasiɛ i iṣurifen inu sadu inu,
uca ticeɛbin inu war meyyřent.
38 Necc ḍfareɣ řɛedyan inu u teḥḥiɣ ten,
war dd-ttɛiqibeɣ ař ten qḍiɣ.
39 Necc ssnuqqbeɣ ten
ařami war zemmaren ad kkaren ɛawed.
Nitni wḍan-dd sadu iḍaren inu.
40 Tbeysed ayi s jjehd i umenɣi,
tarrid-dd inni ɣari dd-ikkaren ad aḍaren sadu inu.
41 Cek tewcid ayi iri n řɛedyan inu, n yinni d ayi icarrhen,
u necc areddǧeɣ ten.
42 Nitni řaɣan, maca war din tuɣi umsenjem,
řaɣan x SIDI, maca Netta war xasen dd-yarri.
43 Necc weddareɣ ten am tɛejjajt zzat i usemmiḍ,
am ubeǧaɛ x ibriden farḍeɣ zzaysen.
44 Cek tfekked ayi zeg imcubbcen n řgens,
teggid ayi d azeǧif n řegnus,
ijj n weydud war t ssineɣ, ad ayi isexxar.
45 Mɣir řami isřa umezzuɣ waha, sřin-dd ɣari.
Ibarraniyyen ssniɛmiřen ssubuḍen ayi.
46 Fecřen ibarraniyyen,
ffɣen-dd zi lbarajat nsen, arjijen.
47 Tudart i SIDI! Ad tᵉttwabarek Teṣḍart inu.
Ad ittwasgeɛɛed AREBBI n usenjem inu.
48 Arebbi wenni xafi ittentaqamen
wenni d ayi itteggen řegnus sadu ufus inu,
49 wenni d ayi issuffuɣen zeg ufus n řɛedyan inu,
wah, Cek tessgeɛɛaded ayi tiwa n yinni d ayi ittḍaddan,
Cek tessenjamed ayi zeg weryaz n řexcunect.
50 S uyenni, SIDI, xseɣ ad Cek qadiɣ,
ad zehhdeɣ Isem nnek.
51 Netta igga isenjimen n ujeǧid nnes mɣaren,
uca isscen tamexsiwt nnes icewwaren i umedhun nnes,
i Dawud u i zzariɛet nnes i řebda.