1 Taẓaǧit n Dawud.

A SIDI, seř ɣar min iǧan nican, ggem řbař i uɣuyyi inu,

ewc amezzuɣ xmi ttẓaǧiɣ s iyencicen war zzaysen dd-ittekk ca řɣecc.

2 Ejj řḥeqq inu ad iffeɣ zi zzat i wudem nnek,

ejj tiṭṭawin nnek ad xezzarent ɣar min iǧan iseggden.

3 Cek tqeǧbed uř inu, tarzud dayes s ǧiřet.

Tjarrbed ayi, maca war tufid walu.

Mařa xarrṣeɣ di ca war iḥři, war dd-teffiɣ ca zeg iyenciden inu.

4 X min tteggen iwdan,

aqa ḥḍiɣ ixef inu zi tebridin n ayt n bu-řexcunet,

ɛlaḥsab awař zeg iyencicen nnek.

5 Egg iṣuraf inu di jjurrat n iḍaren nnek,

ḥima war farrɣen iḍaren inu.

6 Necc řaɣiɣ xak, minzi Cek ad xafi dd-tarred, a Arebbi,

ewc ayi amezzuɣ, seř i min ɣa iniɣ.

7 Scen řeɛjeb n tmexsiwt nnek icewwaren,

Cek d wenni issenjamen inni yarezzun mani i ɣa yarewřen

zeg ufus n yenni ittɣewwɣen x ufus nnek afusi.

8 Ḥḍa ayi am mummu n tiṭṭ nnek,

snuffar ayi di tiři n wafriwen nnek ^□  

9 zeg iɛeffanen inni d ayi iḥeṣṣaren,

inni d řɛedyan n řeɛmar inu, inni d ayi ittquwwaren.

10 Nitni bellɛen ixef nsen s tdunt nsen,

s uqemmum nsen ssawařen s nnfaxet.

11 Řexxu quwwaren i iṣuraf nneɣ,

tiṭṭawin nsen mmuqqřent maḥend ad aneɣ nḍaren ɣar temmurt.

12 Netta yarwes deg weyrad nni imeẓẓren ad imezzeq taymart nnes,

x yijj n weyrad d ameẓyan izeddɣen deg imucan innuffaren.

13 Kkar, a SIDI, ruḥ msagar akides, ɣḍeř-i-t ɣar temmurt.

Fekk řeɛmar inu s ssif nnek zeg uɛeffan,

14 s ufus nnek zeg iryazen, a SIDI,

zeg iryazen nni ɣarsen ddunect d tasɣart min ttekken ddaren,

inni zi tᵉttɛemmared aɛeddis nsen s řeknuz inuffaren,

uřa d iḥenjiren nsen ttwayawanen,

ttejjan min iceṭṭen i tarwa nsen.

15 Necc ad ẓareɣ udem nnek di tsegda,

ad dd-dewřeɣ jjiwneɣ s waddud nnek xmi dd ɣa faqeɣ.