1 A SIDI, mayemmi teqqimed tiggʷejed ammu?

Mayemmi tessnuffared ixef nnek deg wakuden n řeḥṣaret?

2 S nnfaxet iḍeffar uɛeffan řmeskin.

Ad ttwaṭṭfen di tmeɛmač i di ttxarrṣen. ^■  

3 Maɣar aɛeffan issɛuǧa ixef nnes ɣar meẓri n řeɛmar nnes,

ittbarek aḍemmaɛ, ittceqqaf di SIDI.

4 Aɛeffan amecnaw wenni issgeɛɛaden tinzart nnes ɣar ujenna,

war ittbeqqec.

“War din AREBBI”, man aya d marra min di izemmar ad ittxarreṣ. ^■  

5 Marra ibriden nnes tteffɣen as mliḥ kuř twařa.

Řehkamat nnek ttuɛřant xas.

Ittzawar marra inni t iḥeṣṣaren.

6 Netta iqqar deg wuř nnes: “War ttenhezziɣ,

zi jjiř ař jjiř war d ayi iřeqqef uřa d ijj n řɣar.”

7 Aqemmum nnes iccur s nneɛřet d ixarriqen d ddeǧ.

Sadu yiřes nnes aqa din tamara d řmuɛṣiyyet. ^■  

8 Netta ittɣima ɣar wecbar di dcurat,

deg imucan innuffaren ineqq inni war iggin s ca.

Tiṭṭawin nnes mmenḍarent x řmeskin.

9 Iřbet deg wemcan innufaren,

am weyrad deg udurri n uɛiccu nnes.

Netta ittḥekkar ḥima ad yacar řmeskin.

Ittacar řmeskin umi t ijebbed di tracca nnes.

10 Netta ihekkwa-dd ɣar wadday, ittaḍar,

u řmeskin iweṭṭa jar waccaren nnes ijehden.

11 Iqqar deg wuř nnes: “AREBBI ittu,

Netta issnuffar udem nnes,

ɛemmarṣ ad t iẓar.” ^■  

12 Kkar, a SIDI, AREBBI, sgeɛɛed afus nnek,

war ttᵉttu řmusakin.

13 Mayemmi ittceqqaf uɛeffan di AREBBI,

mayemmi iqqar deg wuř nnes:

“Cek war tᵉttbeqqaced!”?

14 Aqa Cek teẓrid, minzi tᵉttwařid tamara d wecḍan,

maḥend ad ten tessarsed deg ufus nnek.

Řmeskin ittarr-dd ɣarek s uzeǧif.

Cek d amɛawen n uyujiř. ^□  

15 Arẓ aɣiř n uɛeffan,

xřef řɣar zeg wenni itteggen tuɛeffna,

ař war tᵉttifed walu ɛad.

16 SIDI d ajeǧid i řebda qaɛ.

Ttwateḥḥan řegnus zi temmurt nnes. ^■  

17 A SIDI, Cek tesřid i meẓri n imwaḍɛen,

ad tessjehded uřawen nsen,

ad ɣarsen tmeyyřed amezzuɣ nnek,

18 ḥima ad taɣed tasɣart i uyujiř u i wenni ittwaḥeṣṣaren,

maḥend uřa d ijj n bnadem x temmurt war ittɣimi issaggʷad ɛad uřa d ijj.