9
1 I umeqqran n imeɣnajen. S teɣnint n ‘Řmewt n memmi’. Azehhed n Dawud. 2 Ad qadiɣ SIDI s marra uř inu,
ad barrḥeɣ marra lmuɛjizat nnek.
3 Ad zzayek farḥeɣ ad zzayek sřiwřiweɣ.
Necc ad zehhdeɣ i Yisem nnek,
a Cek, Amɛuǧi x kuřci!
4 Umi řɛedyan inu dewřen ɣar ḍeffar,
wḍan u ɣeřyen zzat i wudem nnek.
5 Maɣar Cek twennid ayi tasɣart inu u tbellɛed ddeɛwet inu,
teqqimed x řɛarc, a Cek, d řqaḍi d amsegged.
6 Cek twebbxed řegnus, thellked aɛeffan,
temḥid isem nsen i řebda qaɛ.
7 Řeɛdu, aqa nitni ttwaqḍan, aqa aten d řxirbat i řebda.
Tɣeḍřed tineddam nsen, řidaret nsen tefna.
8 SIDI ittɣima i řebda.
Aqa issbedd řɛarc nnes i řeḥkam.
9 Netta ad icarreɛ ddunect s tsegda,
ad iḥkem ccuɛub s řḥeqq. ■
10 SIDI d lburj yuɛřan i wenni immenḍaren,
ijj n lburj yuɛřan deg wakuden n řeḥṣaret. ■
11 Inni issnen Isem nnek, ad xak ttecřen,
maɣar inni xak yarezzun, war daysen tsemmḥed, a SIDI.
12 Zehhdem i SIDI, wenni izeddɣen x wedrar n Ṣihyun,
barrḥem s tmegga nnes jar řegnus.
13 Minzi Netta yarezzu x usizzeř n idammen, ittxarraṣ daysen.
War ittu ca iɣuyyan n yinni ittwaḥeṣṣaren.
14 Ḥinn xafi, a SIDI,
xzar ɣar řeɣben inu i dd-yusin zeg inni d ayi icarrhen,
Cek d wenni d ayi ɣa issgeɛɛden zi tewwura n řmewt,
15 ḥima ad barrḥeɣ s marra ccan nnek,
di tewwura n yeǧis n Ṣihyun.
Necc farrḥeɣ x usenjem nnek.
16 Řegnus wḍan deg weḥfur i iggin nitni,
aḍar nsen ittwacedd di tracca, tenni ssnuffaren simant nsen. ■
17 SIDI idweř ittwassen.
Netta yuɣa tasɣart,
aɛeffan innuɣ di tmegga n ifassen nnes.
Ejj ifiřan ad denddnen. Silah.
18 Iɛeffanen ad dd-dewřen ɣar řaxart,
marra řegnus nni ittun AREBBI.
19 Maca amezřuḍ war ittwattu i řebda,
war ittwaqeṭṭeɛ řayas n yinni ittwaḥṣaren i řebda.
20 Kkar, a SIDI, ḥima war iddikkwiř bnadem ijhed ktar.
Ejj řegnus ad ttwacarrɛen zzat i wudem nnek.
21 Siggʷed i-ten, a SIDI,
ejj řegnus ad ssnen aqa aten d bnadem! Silah.