1 I umeqqran n imeɣnajen. Ak-d uzenzun x ufiřu wiss tmenya. Azehhed n Dawud.

2 A SIDI, war d ayi ttweddab deg weɣḍab nnek,

war d ayi ttarebbi ca deg wesɛar nnek! ^■  

3 Ḥinn xafi, a SIDI, maɣar necc aqa arxuɣ.

Sgenfa ayi, a SIDI, maɣar ixsan inu ttarjijin!

4 Wah, řeɛmar inu yarjef aṭṭas,

u Cek, a SIDI, ař meřmi?

5 Dweř-dd, a SIDI, fekk řeɛmar inu,

senjem ayi di ṭṭweɛ n tmexsiwt nnek icewwaren.

6 Minzi di řmewt war dinni bu řidaret nnek.

Wi Cek i ɣa iqadan di řaxart?

7 Necc uḥřeɣ s inixsisen inu.

Ǧiřet tekmeř ssuffeɣ qama inu,

uřa d tassut inu tᵉṭṭebṭeb qaɛ s imeṭṭawen.

8 Tiṭṭ inu teɣři s wecḍan,

aqa-tt tᵉttwacc zi marra iɣrimen inu.

9 Aggʷejem xafi, marra inni itteggen řmuɛṣiyyet,

minzi SIDI isřa i tmijja n imeṭṭawen inu. ^■  

10 SIDI isřa i uzaweg inu,

SIDI ad iqbeř taẓaǧit inu.

11 Marra řɛedyan inu ad ten teřqef řefḍiḥet d unexřiɛ,

ad dd-dewřen ɣar ḍeffar,

ak-d wermac n wabřiwen ad sseḍḥan.