1 I umeqqran n imeɣnajen, ak-d temja. Azehhed n Dawud.

2 A SIDI, seř-dd i min ɣa iniɣ,

fehmet i unixses inu.

3 Ḥekkar i tmijja n uzaweg inu,

a Ajeǧid inu d AREBBI inu,

aqa i Cek umi ttẓaǧiɣ.

4 Ɣar tuffut, a SIDI, tesřid Cek i tmijja inu,

ɣar tuffut nnqeřbeɣ-dd ɣarek,

uca qqimeɣ ttrajiɣ Cek.

5 Cek war teǧid ca d AREBBI nni ittexsen tuɛeffna,

bnadem aɛeffan war ɣarek ittiff aɣimi.

6 Ibuḥařiyyen war ttɣimin ttbeddan zzat i tiṭṭawin nnek,

Cek tcarrhed marra inni itteggen řɣar.

7 Ad thellked ayt n bu-ixarriqen,

SIDI ittɛiffa aryaz n idammen d řɣecc.

8 Maca s řemɣaret n tmexsiwt nnek icewwaren ad adfeɣ ɣar Taddart nnek,

ad aḍareɣ ɣar Zzawect nnek Tameqqrant s tiggʷudi zzayek.

9 A SIDI, suyur ayi x webrid n tsegda nnek,

di ṭṭweɛ n yinni i d ayi iřebbten,

seggem abrid nnek zzat i wudem inu.

10 Minzi deg uqemmum nsen war din bu řaman,

jjuf nsen d axeyyeb,

tmijja nsen d anḍeř yarezmen,

arebbun txancet s yiřes nsen. ^■  

11 Dɛa ten, a AREBBI,

ejj i-ten ad wḍan s řecwar nsen,

aẓẓeř xasen di ssibbet n waṭṭas n ixeṭṭan nsen,

minzi nitni ɣewwɣen xak.

12 Jjem marra inni xak ittecřen ad farḥen,

ejj i-ten ad sřiweřwen i řebda.

Cek tfaryed xasen,

aqa inni ittexsen Isem nnek ad negzen s řefraḥet i ɣarsen dayek.

13 Minzi Cek, a SIDI, ad tbarked amseggad,

ad as tquwwared s uḥinni am s tseddart n useřqi tameqqrant.