1 Ijj n yezři n Dawud deg waṭṭas n tmijjiwin, izři nni iɣennej i SIDI di ssibbet n wawařen n Kuc, zeg ayt n Binyamin.

2 A SIDI, AREBBI inu, aqa xak i ttecřeɣ!

Senjem ayi zi marra inni xafi ittaẓẓřen uca fekk ayi,

3 maḥend netta war d ayi izeɛɛef am weyrad, ad ayi imezzeq,

řami war din wi i ɣa ifekken!

4 A SIDI, AREBBI inu, mařa necc ggiɣ man aya,

mařa din ca n řɣecc iřṣeq deg ifassen inu,

5 mařa necc xeřfeɣ wenni akidi iddaren di řehna s řɣar,

- maca wenni d ayi iḥeṣṣaren x walu, jjiɣ t ad yuyur - ,

6 ejj xenni ad yaẓẓeř řeɛdu x řeɛmar inu, ad ayi iɛdu,

ad iɛfes x tudart inu di temmurt,

ejj i-t ad issezdeɣ aɛuǧi inu di tɛejjajt! Silah.

7 Kkar-dd, a SIDI, deg weɣḍab nnek,

suɛřa ixef nnek x wehjam n yinni d ayi iḥeṣṣaren,

faq di ṭṭweɛ inu,

aqa teggid tumured řḥeqq.

8 Ijj n ubarru n řegnus ad ac dd-nnḍen,

xenni dweř tiwa nsen ɣar sennej.

9 SIDI ad iḥakem řegnus.

Aɣ ayi tasɣart, a SIDI, ɛlaḥsab tasegda inu,

ɛlaḥsab řekmaret i dayi.

10 Sbedd tuɛeffna n iɛeffanen, semten amsegged,

Cek, wenni iqeǧben uřawen d tiẓẓař, a AREBBI iseggden! ^□  ■  

11 Taseddart inu i useřqi ɣar AREBBI,

amsenjem n imseggmen n wuřawen.

12 AREBBI d ijj n řqaḍi iseggden,

ijj n Arebbi nni isexxḍen kuř ass.

13 Mařa netta war dd-iɛqib, ad isseqḍeɛ Netta ssif nnes,

ad imḥeḍ řqews nnes uca ad xas ineyyec.

14 Igga xas řesnaḥ ineqqen,

ad yarr fřitcat nnes d iṣefḍawen yareqqen.

15 Xzar, aqa wḍan-dd xas řewjeɛ n tarut n řmuɛṣiyyet,

iksi ddeyset n tamara,

uca ad yaru ixarriqen. ^■  

16 Iqqaz ijj n weḥfur uca issuǧeɣ i-t,

maca d netta s yixef nnes i iwḍan deg weḥfur nni igga. ^■  

17 Arber nnes ad ɣares dd-idweř ař azeǧif nnes,

řexcunet nnes ad dd-tehwa x uceqquf nnes.

18 Ad qadiɣ SIDI x tsegda nnes,

ad zehhdeɣ i Yisem n SIDI, Amɛuǧi x kuřci.