1 Deg wass wiss arebɛa u-ɛicrin n uyur-a munen ayt n Israil s uẓummi u řeḥḥfen deg warruḍ n wecḍan u s tɛejjajt x uzeǧif. ^□   2 Bḍan zzariɛet n Israil ixef nsen zi marra ibarraniyyen, kkaren u neɛmen zi ddnub nsen d řmuɛṣiyyet n ibabaten nsen. 3 Nitni kkaren, bedden deg wemcan nsen uca ɣrin ict n terbaɛt n wass zeg wedlis ittwannḍen n Ccariɛa n SIDI, AREBBI nsen, uca ict n terbaɛt nneɣni neɛmen s ddnub nsen uca sejden i SIDI, AREBBI nsen. 4 X ddruj n Ilawiyyen ibedd Yecuɛa d Bani, Qadmiyil, Cabanya, Bunni, Carabya, Bani d Kanani, řaɣan s tmijja ijehden ɣar SIDI, AREBBI nsen. 5 Uca Ilawiyyen, Yecuɛa d Qadmiyil, Bani, Ḥacabniya, Carabya, Hudiya, Cabanya d Fataḥya, nnan: “Kkarem, tbarkem SIDI, AREBBI nwem, zi řebda ař řebda! Iři ad ittwabarek Isem n uɛuǧi nnek, wenni yuɛřan x marra lbaraka d usemɣar!”

6 “Cek d SIDI, mɣir Cek. Cek teggid ajenna uřa d ajenna n ijenwan d marra tizemmar nsen, tammurt d marra min xas iǧan, řebḥur d marra min dayes iǧan u Cek tewcid asen tudart uca tizemmar n ujenna ttaḍaren ac i Cek. ^■  

7 Cek d SIDI, AREBBI, wenni ifarzen Abram. Cek tessuffɣed t-i-dd zi Ur n Ikaldaniyyen uca teggid as Ibrahim. ^■  

8 Cek tufid uř nnes dayes řaman zzat i wudem nnek u teggid akides Řɛahd belli cek ad tewced i zzariɛet nnes tammurt n Ikenɛaniyyen u n Iḥittiyyen u n Imuriyyen u n Ifariziyyen u n Iyabusiyyen u n Ijirjasiyyen uca tegged ɛlaḥsab awařen nnek, minzi Cek d amsegged i teǧid. ^■  

9 Cek teẓriḍ tamara n ibabaten nneɣ di Miṣra u tesřid iɣuyyan nsen zi ɣar Řebḥar n Telga. ^■  

10 Cek teggid řeɛřamat d lmuɛjizat ɣar Firɛun u ɣar marra imsexxaren nnes u jar řgens n temmurt, minzi Cek tessned, aqa nitni ggin ḍidd nsen s uɛeffar u Cek teggid i ixef nnek ijj n Isem, am teǧa ass-a. ^■  

11 Cek tebḍid řebḥar zzat i wudem nsen ařami nitni ɛdun x temmurt yuẓɣen di řwest n řebḥar uca inni xasen ittaẓẓřen tenḍared ten di řaǧaɣ am ijj n weẓru deg waman ijehden. ^■  

12 Zeg ijj n uqellij n useynu tgewwded ten s wass u s yijj n uqellij n tmessi s ǧiřet ḥima ad asen tewced tafawt x webrid i x i ɣa uyuren. ^■  

13 Cek tehwid-dd x wedrar n Sina u tessiwřed akidsen zeg ujenna uca tewcid asen lfarayiḍ iseggden d izerfan i di iǧa řaman d tweṣṣa d řumurat iṣebḥen. ^■  

14 Tessecned asen ssebt nnek iqeddsen uca teggid xasen řumurat d tweṣṣa d Ccariɛa s ufus n Musa, amsexxar nnek.

15 Cek tewcid asen aɣrum zeg ujenna i řaẓ nsen uca tessuffɣed asen-dd aman zi teṣḍart i ufadi nsen uca tennid asen ad adfen ɣar temmurt, tenni x tessgeɛɛded afus nnek ḥima ad tejjaǧed ad ten tt-i-dd-tewced, ḥima ad tt ṭṭfen d řwart.” ^■  

16 “Aqa nitni ak-d ibabaten nneɣ ggin s uɛeffar d tɣennant u war sřin ca ɣar řumurat nnek.

17 Nitni ugin ad ɣares sřen, war fekkaren di lmuɛjizat nnek i ɣarsen teggid u nitni ɣennan u deg uɣewweɣ nsen ggin ijj d uzeǧif x yixef nsen ḥima ad ɛeqben ɣar tesmuɣi nsen. Maca Cek d ijj n Arebbi iɣeffaren, dayek řxaḍar d arreḥmet, ɣarek ttasiɛ n řxaḍar d tamexsiwt icewwaren s waṭṭas, u Cek war daysen tesmiḥed ca. ^■  

18 Ɛad, umi ggin nitni ijj n uyenduz ifesyen i yixef nsen, nnan: ‘Wa d arebbi nnek i cek i dd-issuffɣen zi Miṣra’, uca ceqqfen aṭṭas, ^□  ■  

19 aqa Cek di arreḥmet nnek tameqqrant war ten tejjid ca di řexřa. Aqellij n useynu i iǧan ḥima ad ten igewwed s wass war xasen iggʷij ca uřa d aqellij n tmessi i iǧan ḥima ad asen iwc tafawt deg webrid i x i ɣa uyuren, war xasen iggʷij ca s ǧiřet. ^■  

20 Cek tewcid Arruḥ nnek aṣebḥan, ḥima ad ten isseřmed u Cek war d asen tekkised ca ‘manna’ zeg uqemmum nsen uca tewcid asen aman i ufadi nsen. ^■  

21 Arebɛin n iseggʷusa cek tᵉtthellid daysen di řexřa. War ɣarsen ittxiṣṣa uřa d ca n řḥajjet, arruḍ nsen war yarci ca uca iḍaren nsen war uffen. ^■  

22 Cek tewcid asen marra tigeldiwin d řegnus uca tebḍid asen jjwayeh. Nitni ṭṭfen tammurt n Siḥun d řwart, aqa-tt d tammurt n ujeǧid n Ḥacbun, d temmurt n Ɛuj, ajeǧid n Bacan. ^■  

23 Cek tarrid iḥenjiren nsen aṭṭas amecnaw itran deg ujenna u tessidfed ten ɣar temmurt i x tuɣa tennid i ibabaten nsen, ad ɣares dd-adfen ḥima ad tt ṭṭfen d řwart. ^■  

24 Yudef warraw uca ṭṭfen tt d řwart u zzat i wudem nsen aqa teggid imezdaɣ n temmurt sadu afus nsen, uřa d ijeǧiden nsen d řegnus n temmurt, ḥima ad zzaysen ggen min i d asen ittɣiř mliḥ. ^■  

25 Nitni ḥewwsen tineddam ifaryen d ict n temmurt isseɣmayen u nitni ṭṭfen ɛawed tudrin d řwart ccurent s marra řxar, anuten ittwaɣzen, imarjaɛen n uḍiř d řeɛraṣit n zzitun d tcejjura n fruta s ufeyyeḍ, uca nitni ccin jjiwnen, dewřen ṣeḥḥen uca arrin-dd meẓri s tcuni nnek tameqqrant.

26 Xenni maca dewřen war ṭṭiɛen uca ɣewwɣen xak uca nḍaren Ccariɛa nnek u nɣin inabiyyen nnek inni tuɣa icehhden jar asen maḥend ad ten dd-arren ɣarek. Aqa ceqqfen dayek s yijj n uceqqef imɣar. ^■  

27 S uya tarrid ten deg ufus n imeḥṣaren nsen inni i ten iḥṣaren, maca mařa řaɣan-dd xak di řweqt n řeḥṣaret nsen, xenni tesřid ɣarsen zeg ujenna uca di arreḥmet nnek tameqqrant tewcid asen imsenjamen nni i ten ifekken zeg ufus n imeḥṣaren nsen. ^■  

28 Mařa ufin řhudnet, ggin ɛawed řɣar zzat i wudem nnek uca teggid ten deg ufus n řɛedyan nsen uca nitni seǧḍen xasen. Umi tuben, řaɣan-dd xak, aqa tesřid asen zeg ujenna u tfekked i-ten s arreḥmet nnek aṭṭas n twařawin.

29 Cek tcehded ḍidd nsen ḥima ad dd-ɛeqben ɣar Ccariɛa nnek, maca nitni ggin s uɛeffar u war sřin ca ɣar tweṣṣa nnek. Aqa xḍan zi jjihet n lfarayiḍ nnek, umi bnadem wenni i zzaysen i ɣa yegg ad zzaysent iddar, uca nitni arrin-dd ɣarsen aɛrur, tuɣa ssqesḥen iri nsen, war ɣarek dd-sřin. ^■  

30 Aṭṭas n iseggʷusa tḥemmřed akidsen, tcehded ḍidd i nsen s Arruḥ nnek, s tsexxart n inabiyyen, maca nitni war sřin ca uca tewcid ten deg ufus n řegnus n temmura. ^■  

31 Di arreḥmet nnek tameqqrant war ten taredǧed ca u war daysen tesmiḥed ca, maɣar cek d ijj n Arebbi d aḥnin d arḥim.

32 “Xenni řexxu, AREBBI nneɣ, aqa Cek, Arebbi d ameqqran, izemmaren, issaggʷaden, wenni iṭṭfen di Řɛahd u di tmexsiwt icewwaren, war ḥesseb ca drus zzat i wudem nnek marra řeɣben i xaneɣ dd-ikkin, x ijeǧiden nneɣ, x řḥukkam nneɣ u x ikehhanen nneɣ u x inabiyyen nneɣ u x ibabaten nneɣ u x marra řgens nneɣ zeg wussan n ijeǧiden n Accur ař ass-a.

33 Tuɣa Cek d amsegged di marra min xaneɣ ikkin, maɣar Cek teggid aneɣ s řaman, neccin maca negga s řeqjaḥet. ^■  

34 Ijeǧiden nneɣ, řḥukkam nneɣ, ikehhanen nneɣ d ibabaten nneɣ war ḍeffaren Ccariɛa nnek uca war sřin ɣar řumurat nnek uřa ɣar cchadat nnek nni tcehded ḍidd i nsen.

35 S tgeldit nsen u s řxar nsen aṭṭas i d asen tewcid u s temmurt tameqqrant isseɣmayen i d asen tewcid, war Cek sexxaren ca uca war tuben zi tmegga nsen tiɛeffanin.

36 Xzar ass-a aqa neccin d imsexxaren u tammurt i tewcid i ibabaten nneɣ maḥend ad zzayes necc řɣiǧet d řxar, xzar aqa neccin d imsexxaren i dayes neǧa.

37 Řɣiǧet tameqqrant nnes ad traḥ ɣar ijeǧiden, inni i xaneɣ teggid di ssibbet n ddnub nneɣ, uca nitni ttṣeǧaḍen x arrayem nneɣ u x řmař nneɣ am mammec i d asen ittɣiř mliḥ, u neccin aqa aneɣ di řeḥṣaret d tameqqrant.”