Taɣuri i řgens zi Ccariɛa n Musa
8
1 Umi ibda uyur wiss sebɛa uca tuɣa ayt n Israil di tneddam nsen, imun marra řgens am ijj n weryaz deg wazzay n Tewwurt n Waman, nnan i Ɛizra, amseřmed n Ccariɛa, ad yawi adlis n Ccariɛa n Musa, tenni yumur SIDI i Israil. 2 Deg wass amezwaru n uyur wiss sebɛa yiwi-dd ukehhan Ɛizra Ccariɛa zzat i wudem n wegraw n řgens wenni iǧan zeg yeryazen d temɣarin d marra inni izemmaren ad as fehmem xmi i d as i ɣa sřen. 3 Netta iɣra zzayes ɣar wudem n wazzay i iǧan zzat i Tewwart n Waman, zi tuffut ař azyen n wass, i yeryazen d temɣarin d inni izemmaren ad as fehmem. Tuɣa imezzuɣen n marra řgens ɣar wedlis ittwannḍen n Ccariɛa. 4 Uca Ɛizra, amseřmad n idlisen ibedd x ijj n ddruj n ukeccuḍ nni ggin nitni i uya, u x uɣezdis nnes afusi bedden Mattitya d Camaɛ d Ɛanaya d Uriya d Ḥilqiya d Maɛasiya u x uzeřmaḍ nnes bedden Fadaya d Micayil d Malkiya d Ḥacum d Ḥacbaddana, Zakariyya d Macullam. 5 Yarzem Ɛizra adlis zzat i tiṭṭawin n marra řgens, maɣar ibedd sennej i marra řgens uca umi t yarzem, ikkar-dd řgens marra. 6 Ɛizra issemɣar SIDI, AREBBI d ameqqran, uca řgens yarra-dd s ifassen nsen ɣar ujenna: “Amin, amin!” uca nitni yuḍaren, sejden i SIDI s wudem nsen ɣar temmurt. 7 Ssřemden Yecuɛa d Bani d Carabya, Yamin, Ɛaqqub, Cabbatay, Hudiya, Maɛasiya, Qaliṭa, Ɛazarya, Yuzabad, Ḥanan, Falaya d Ilawiyyen řgens di Ccariɛa u řgens iqqim deg wemcan nsen. 8 Ɣrin nitni zeg wedlis ittwannḍen, zi Ccariɛa n AREBBI, carrḥen u ssecnen řmeɛna i daysen uca ammu i ssfehmen min ittwaɣrin. 9 Uca Naḥamya, wenni d lwali ameqqran, d ukehhan Ɛizra, amseřmad, d Ilawiyyen inni issřemden řgens, nnan i marra řgens: “Ass-a d amqeddes i SIDI, AREBBI nwem. War ccatem agejdur, war ttrum.” Minzi marra řgens tuɣa iru umi sřan awařen n Ccariɛa.
10 Inna asen ɛawed: “Uyurem u teccem macca isswejden s waṭṭas n zzect u sswem binu amiẓid uca wcem macca i wenni war d as sswejden walu, maɣar ass-a d ijj n wass d amqeddes i Siditneɣ. War sḥissifem, maɣar řefraḥet n SIDI d jjehd nwem.
11 Ilawiyyen ssfewwjen marra řgens, nnan: “Sqarem, maɣar ass-a d amqeddes i iǧa. War sḥissifem ca!”
12 Xenni yuyur marra řgens ḥima ad ccen ad swen u ad ṣedqen u ḥima ad farḥen s waṭṭas, minzi nitni fehmen i wawařen i d asen ittwannan.
13 Tiwecca nnes munen izeǧifen jar ibabaten n řaǧat n marra řgens d ikehhanen d Ilawiyyen ɣar Ɛizra, amseřmad n idlisen, ḥima ad arzun řefhamet deg wawařen n Ccariɛa.
Aɛeyyed n Řɛid n Iɛuccuten
14 Nitni ufin belli ittwari di Ccariɛa, aqa SIDI yumur s ufus n Musa, ittxeṣṣa i ayt n Israil ad zedɣen deg iɛuccuten di Řɛid deg uyur wiss sebɛa ■
15 u ittxeṣṣa asen ad zzayes barrḥen uca ad sseɛdun ijj n uřaɣi di marra tineddam nsen uřa di Urcalim ḥima ad inin “Fɣem ɣar wedrar u awyem-dd ifetwan n tcejjura n zzitun d ifetwan n izemmuren d ifetwan n tariḥant d ifetwan n tcejjart n tini d ifetwan n marra ticejjura ɣarsent tifray maḥend ad zzaysen teggem iɛuccuten, am mammec t tura.”
16 Xenni iffeɣ-dd řgens ɣar barra, iwyen-dd ifetwan uca ggin i yixef nsen iɛuccuten, kuř ijj x tzeqqa nnes u di řemraḥat nsen u di řemraḥat n Taddart n AREBBI u deg wazzay n Tewwurt n Waman u deg wazzay n Tewwurt n Ifrayim.
17 Marra agraw n řgens n yinni dd-iɛeqben zi tmeḥbast, ggin iɛuccuten u zedɣen deg iɛuccuten minzi ayt n Israil war ggin aya zeg wussan n Yacuwa, mmis n Nun, ař ass-a uca řefraḥet tuɣa-tt d tameqqrant aṭṭas.
18 Ass iḍfar umas ittwaɣra xasen zeg wedlis ittwannḍen n Ccariɛa n AREBBI, zeg wass amezwaru ɣares ař ass aneggaru. Ammu i ɛeyyden řmijař n sebɛa n wussan u deg wass wiss tmenya tuɣa din ijj n umuni ifarzen am mammec i teǧa di lfariḍa.