1 Umi xebbaren Sanballaṭ d Ṭubiya d Waɛrab Jacam d řɛedyan nneɣni, aqa necc tuɣa ssbeddeɣ řḥiḍ u war tuɣi dayes teqqim tazzit ɛad, aqa zeɛma necc tuɣa ayi ɛad war arekkbeɣ tiwwura, xenni imsar, 2 aqa Sanballaṭ d Jacam ssekken-dd ɣari řexbar, nnan: “As-dd, ad nemmẓar di dcurat di řewḍa n Unu.” Nitni maca tuɣa nwan ad ggen taɛeffant akidi. 3 Necc ssekkeɣ ɣarsen ireqqasen ad inin: “Necc xeddmeɣ řexxu di řxedmet d tameqqrant, x uya war zemmareɣ ad dd-aseɣ. Mayemmi i ɣa tbedd řxedmet-a mařa jjiɣ tt, hwiɣ-dd ɣarwem?” 4 Nitni ssekken ayi-dd tabrat-a arebɛa n twařawin u necc tarriɣ xasen s twarrit d icten. 5 Xenni issekk-dd ɣari Sanballaṭ řexbar-a i twařa wiss xemsa. Aḥudri nnes tuɣa ɣares ict n tebrat tarzmen s ufus nnes, 6 yura dayes: “Aqa idweř ittwassen jar řegnus u Jacmu iqqar: ‘Cek d Wudayen texsem ad tɣewwɣem. S uyenni tessbeddem řḥiḍ u cek texsed ad tdewřed d ajeǧid nsen!’ Ammu i innan wawařen-a. ^□   7 Cek ɛawed tařeqmed inabiyyen maḥend ad xak dd-barrḥen di Urcalim, ad inin: ‘Netta d ajeǧid di Yahuda!’ Awařen-a ad awḍen maca i ujeǧid. S uya as-dd řexxu, ad nemcawar.” 8 Necc maca ssekkeɣ as tabrat maḥend ad as iniɣ: “Timesřayin-a i tennid, war ǧint ca d tidett, maca cek teggid tent deg wuř nnek.” 9 Minzi nitni marra xsen ad aneɣ ssiggʷden, nnan: “Nitni ad kksen ifassen nsen zi řxedmet, maḥend war tt tteggen.” Xenni řexxu, sejhed ifassen inu!

10 Necc udfeɣ ɣar taddart n Cmaɛya, mmis n Dalaya, mmis n Mahiṭabi. Netta tuɣa ibelleɛ x ixef nnes dinni, inna: “Ejj aneɣ ad nmun di Taddart n AREBBI, di řwest n Zzawect, ad nbelleɛ tiwwura n Zzawect Tameqqrant, maɣar ad dd-asen nitni, ḥima ad cek nɣen, wah, ad dd-asen di ǧiřet ḥima ad cek nɣen.”

11 Maca necc nniɣ: “Ma necc d ijj n weryaz i tarewřa? Ma ijjen am necc ad yadef ɣar Zzawect Tameqqrant uca ad iqqim iddar? War ggur ad tt ttadfeɣ.”

12 Minzi argbeɣ u ẓriɣ, aqa war iǧi d AREBBI i tuɣa t-i-dd-issekken, maca netta issiweř ak-d nnubuwa aya xafi, minzi Ṭubiya d Sanballaṭ tuɣa cran t.

13 Tuɣa cran t, maḥend ad ggʷedeɣ ad ggeɣ amenni uca ad xḍiɣ, maḥend ad ɣarsen yiři ca i zi dayi i ɣa ggen isem d aɛeffan, ḥima ad ayi ɛeyyaren.

14 A SIDI inu, idar i Ṭubiya d Sanballaṭ, min ggin, uřa d tanabit Nuɛadya d inabiyyen nneɣni inni tuɣa yarezzun ad ayi ssiggʷden.

15 Ittwakemmeř řḥiḍ awarni i tnayen u-xemsin n wussan, deg wass wiss xemsa u-ɛicrin n uyur n Ilul.

16 Umi sřan marra řɛedyan nneɣ man aya řa d marra řegnus i d aneɣ dd-innḍen ẓrin t, dewřen nitni d imuqřiřen di tiṭṭawin n yixef nsen, ucin aqa d AREBBI i tuɣa iggin řxedmet-a.

17 Deg wussan nni urin tarwa n taṣiřet n Yahuda aṭṭas n tebratin, sekken tent i Ṭubiya uca aqa din uřa d tinni iffɣen zi Ṭubiya ɣarsen.

18 Maɣar aṭṭas di Yahuda tuɣa jjuǧen asen, maɣar netta tuɣa d aḍeggʷař n Caxanya, mmis n Araḥ, u mmis nnes Yuḥanan tuɣa yiwi yeǧis n Macullam, mmis n Baraxya, d tamɣart.

19 Ɛawed ssiwřen zzat i wudem inu x tmegga nnes tiṣebḥanin u ssiwḍen awařen inu ɣares. U Ṭubiya tuɣa i d ayi dd-issekkan tibratin ḥima ad ayi issiggʷed.