1 Ikkar ijj n uɣuyyi imɣar n řgens u n temɣarin nsen cetcant x aytmatsent, Udayen. 2 Aqa din inni innan: “Iḥenjiren nneɣ d tḥenjirin nneɣ d neccin d aṭṭas. Ittxeṣṣa ad nseɣ imendi ḥima ad necc ad neddar.” 3 Inneɣni nnan: “Neccin narhen iyyaren nneɣ d imarjaɛen nneɣ n uḍiř d tudrin nneɣ d aḍman, ḥima ad nawi imendi deg wussan n řaẓ.” 4 Inneɣni nnan: “Neccin narḍeř nnuqart i ljizya i ujeǧid x iyyaren nneɣ u x imarjaɛen nneɣ n uḍiř.” 5 “Xenni řexxu, aysum nneɣ d weysum n aytmatneɣ, iḥenjiren nneɣ am iḥenjiren nsen, u xzar, iḥenjiren nneɣ d tḥenjirin nneɣ ittxeṣṣa aneɣ ad ten narr d isemɣan. Aqa din zi yessitneɣ tinni idewřen am tseɣmin uca afus nneɣ war izemmar ad igg ca u iyyaren nneɣ d imarjaɛen nneɣ n uḍiř aqa deg ufus n inneɣni.”

6 Umi sřiɣ iɣuyyan nsen d wawařen-a, dewřeɣ xeyyqeɣ aṭṭas. 7 Necc xarrṣeɣ deg wuř inu u cetciɣ x tarwa n taṣiřet u x imḍebbaren, nniɣ asen: “Kuř ijjen zzaywem dayes d řɛib umi ittar arriba zeg umas.” Necc ggiɣ ijj n wegraw d ameqqran ḍidd nsen. ^■   8 Necc nniɣ asen: “Neccin nesɣa aytmatneɣ, Udayen, inni tuɣa ittwazzenzen i řegnus, ɛlaḥsab tizemmar nneɣ. Kenniw maca, ma texsem ad tezzenzem tawmat nwem niɣ teggim ten řexxu ad ttwammenzen i neccin?” Uca sseɣden war ufin min ɣa inin. 9 Xas uca nniɣ: “Min teggem kenniw, war iǧi nican. Ma war ittxeṣṣi ad tuyurem zzat i AREBBI nneɣ s uweqqar zi ssibbet n useḥqar n řegnus, řɛedyan nneɣ?

10 Uřa d necc, aytma d iḥudriyyen inu, aqa narḍer asen nnuqart d imendi. Jjem aneɣ ad nesmeḥ maca di arriba aya.

11 Arrem asen ass-a iyyaren nsen, imarjaɛen nsen n uḍiř, řeɛraṣit nsen n zzitun d tudrin nsen uřa d tasɣart wiss mya n nnuqart d imendi d binu n jdid d zzect nni i zzaysen tᵉttarem.”

12 Xas uca nnan: “Ad asen t narr marra u war zzaysen t nᵉttettar ɛad. Neccin ad negg, am mammec tennid cek.” Uca řaɣiɣ i ikehhanen u jjiɣ ten ad jjaǧen, aqa nitni ad ggen ɛlaḥsab awař-a.

13 Xenni zzerzeɣ weḥsin n warruḍ inu, nniɣ: “Ammu i ɣa izzerz AREBBI kuř aryaz, wenni war iṭṭifen deg wawař-a, zi taddart nnes u zeg wagřa nnes, netta ad immerz ad ixwa ammu.” Agraw n řgens marra inna: “Amin!” Nitni ssemɣaren SIDI d řgens i iggin ɛlaḥsab awař-a. ^□  

14 Uřa d necc d yaytma war necci ca zi macca n lwali zeg wass nni di d ayi tuɣa igga d ajeǧid d lwali nsen di temmurt n Yahuda, zeg useggʷas wiss ɛicrin ař aseggʷas wiss tnayen u-třatin n ujeǧid Artaḥcasta, teqqar tenɛac n iseggʷusa.

15 Lwulat nni din iǧan qbeř i necc, tuɣa ggin ddqeř x řgens u tuɣa ksin zzayes aɣrum d binu u ɛawed arebɛin n iciqlen n nnuqart. Uřa d iḥudriyyen nsen seǧḍen x řgens. Necc maca war ggiɣ aya zi tiggʷudi n AREBBI.

16 Aqa wciɣ jjehd inu i řxedmet ɣar řḥiḍ u neccin war nesɣi ca aḥwic u marra iḥudriyyen inu munen din x řxedmet.

17 Ɣar ṭṭabřa inu qqimen mya u-xemsin n yeryazen zeg Wudayen u zeg imḍebbaren uřa d inni i ɣarneɣ dd-yusin zi řegnus i d aneɣ dd-innḍen.

18 Min ittwaswejden i yijj n wass aqa d ijj n ufunas, u zeg wuǧi aqa ttwafarzen setta zzaysen, uca sswejden ayi uřa d ijḍaḍ u di kuř ɛecra n wussan ɛřam kuř binu s ufeyyeḍ. S marra aya war ttareɣ macca n lwali, maɣar tasexxart tessedqeř aṭṭas x řgens-a.

19 Idar ayi s řxar, a AREBBI inu, s marra min ggiɣ i řgens-a. ^■