4
1 Umi maca Sanballaṭ d Ṭubiya d Waɛraben d ayt n Ɛammun d Icdudiyyen sřan, aqa aɛdař n řeḥyuḍ n Urcalim ittraḥ ɣar zzat, tizzeyyin bdant ad qqnent, imsar, aqa xeyyqen aṭṭas. 2 Nitni marra ggin tameɛmuč maḥend ad dd-asen ad mmenɣen ak-d Urcalim, ad dinni ssekkaren řehweř. 3 Neccin maca nẓuǧ ɣar AREBBI nneɣ u di ssibbet nsen nessbedd ict n tɛessast xasen ass d ǧiřet. 4 Xenni inna Yahuda: “Jjhed n yinni yarebbun yuḥeř, maɣar din aṭṭas n řxarbet. War nzemmar x řebni n řḥiḍ.” 5 Řɛedyan aqa nnan: “Nitni war tticin u war ttwiřin walu ař dd ɣa nas di řwest nsen u ad ten neneɣ. Ammu i ɣa nessbedd řxedmet.
6 Uca imsar, aqa Udayen, inni ɣarsen izeddɣen, usin-dd nnan aneɣ ɛecra n twařawin: “Ittxeṣṣa kenniw ad ɣarneɣ dd-tɛeqbem!”
7 Awarni i řḥiḍ ɣar imucan iwaṭan u ɣar tseqqar ifruren, aqa ssbeddeɣ řgens ɛlaḥsab řaǧat nsen, ak-d řesyuf nsen d iḥricen nsen d řeqwas nsen. □ 8 Xzareɣ, xenni kkareɣ, nniɣ i tarwa n taṣiřet u i imḍebbaren u i min iqqimen n řgens: “War zzaysen teggʷedem ca! Sidi inu d ameqqran u issaggʷad. Fekkarem dayes, mmenɣem i aytmatwem, iḥenjiren nwem d tḥenjirin nwem d temɣarin nwem d tudrin nwem.”
9 Umi sřan řɛedyan nneɣ, aqa neccin nargeb xas u aqa AREBBI ibḍeř anway nsen, imsar xenni neccin marra idneɣ neɛqeb ɣar řḥiḍ, kuř ijj ɣar wemcan nnes.
10 Zeg wass nni imsar, aqa azyen n imsexxaren inu tuɣa xeddmen u azyen nneɣni zzaysen ṭṭfen iḥricen d tseddariyin n uɛeskari d řeqwas d warruḍ n wuzzař uca imeqqranen bedden awarni i kuř taddart n Yahuda.
11 X yenni ibnan řḥiḍ, aqa inni zzaysen tuɣa yarebbun, xeddmen s yijj n ufus, am tuɣa bardɛen, u s ufus nneɣni ṭṭfen lansa
12 u inni tuɣa ibennan, kuř ijjen zzaysen ɣares ssif iqqen x tejɛinna nnes am tuɣa ibenna. Wenni ittṣuḍen deg uyicc n icarri, tuɣa-t akidi.
13 Nniɣ i tarwa n taṣiřet u i imḍebbaren u i min iqqimen n řgens: “Řxedmet temɣar u teyru. Neccin nettwabezzeɛ x řḥiḍ, ijjen iggʷej x wenneɣni.
14 Deg wemcan mani i ɣa tesřem aṣuḍi deg uyicc n icarri, munem-dd dinni xaneɣ. AREBBI nneɣ ad imneɣ di ṭṭweɛ nneɣ. ■
15 Ammu i nexdem uca azyen zzaysen ṭṭfen iḥricen zi tuffut ař dd ɣa ffɣen itran.
16 Di řweqt nni nniɣ i řgens: “Kuř aryaz ad issens daxeř di Urcalim ak-d uḥuḍri nnes uca ammu i ɣarneɣ i ɣa yiřin d aɛessas di ǧiřet u deg wass ad iřin i řxedmet.”
17 Uřa d ijj zzayneɣ war ikkis arruḍ, war iǧi necc řa d aytma řa d iḥudriyyen inu uřa d yeryazen n tɛessast. Kuř ijj tuɣa ibedd ak-d lansa nnes ɣar waman.