1 Awarni řami ittwakemmeř man aya marra, usin-dd ɣari řḥukkam, nnan: “Řgens n Israil d ikehhanen d Ilawiyyen war qqimen ttwamsebḍan x řegnus n temmura-ya, maɣar jjɛayef nsen am tinni n Ikenɛaniyyen d Iḥittiyyen d Ifiriziyyen d Iyabusiyyen d ayt n Ɛammun d ayt n Mu’ab d Imiṣriyyen d Imuriyyen. 2 Nitni iwyen zeg yessitsen timɣarin i yixef nsen u i iḥenjiren nsen ařami ṣuren zzariɛet d tamqeddast s řegnus n temmura-ya, wah, afus n řḥukkam d imḍebbaren tuɣa-t d amezwaru di řeɣdar-a.”

3 Umi sřiɣ aya, carrgeɣ arruḍ inu d useřham inu, qeřɛeɣ-dd acewwaf n uzeǧif u n tmart uca qqimeɣ jeɛɛareɣ. 4 Xenni munen-dd xafi marra, inni ittarjijen zi AREBBI n Israil, di ssibbet n řeɣdar n imenfiyyen, maca necc qqimeɣ jeɛɛareɣ ař řweqt n tɣarṣt n tmeddit. 5 Ɣar tɣarṣt n tmeddit faqeɣ-dd zeg wejɛar inu s warruḍ inu d useřham inu icarrgen uca uḍareɣ x ifadden u sswiẓẓḍeɣ ifassen inu ɣar SIDI, AREBBI inu.

6 Nniɣ: “AREBBI inu, necc sedḥiɣ u ttwasbehdřeɣ ař war zɛimeɣ ad ɣarek dd-ssgeɛɛdeɣ udem inu, a AREBBI inu, minzi řmuɛṣiyyet nneɣ temɣar aneɣ x uzeǧif u amarwas nneɣ imɣar ař ajenna. ^■   7 Zeg wussan n ibabaten nneɣ ɣares ař ass-a aqa aneɣ deg umarwas d ameqqran u x řmuɛṣiyyet nneɣ nemmewc neccin d ijeǧiden nneɣ d ikehhanen nneɣ deg ifassen n ijeǧiden n temmura, aqa nemmewc i ssif, i tmeḥbast, i ukecceḍ u i řefḍiḥet x wudmawen nneɣ, am mammec i teǧa ass-a. 8 Řexxu tuɣa din ict n tzeḥziḥt d tameẓyant n arḍa n SIDI, AREBBI nneɣ, ḥima ad aneɣ yejj ca n yinni innejmen u ḥima ad aneɣ iwc ijj n řewted di Zzawect Tameqqrant nnes Iqeddsen u tfawt i tiṭṭawin nneɣ, a AREBBI nneɣ, u ḥima ad aneɣ dd-yarr nnefs cwayt di tesmuɣi nneɣ. 9 Aqa neccin d isemɣan, maca di tesmuɣi nneɣ war dayneɣ ismiḥ AREBBI nneɣ, maca Netta idřa aneɣ s tmexsiwt nnes icewwaren zzat i wudem n ijeǧiden n Lfurs maḥend ad aneɣ dd-yarr nnefs i usbeddi n Taddart n AREBBI twařat nneɣni u i weɛdař n řxirbat u ḥima ad aneɣ iwc ijj n wemcan ittwannḍen s řeḥyuḍ di Yahuda u di Urcalim.

10 Uca řexxu, min ɣa nini awarni uya ɛad, a AREBBI nneɣ, minzi nesmeḥ di řumurat nnek,

11 tinni tumured s tsexxart n imsexxaren nnek, inabiyyen, inni innan: ‘Tammurt tenni i ɣa tadfem maḥend ad tt tᵉṭṭfem d řwart, d ict n temmurt tᵉttwasexmej s řexmej n řegnus n temmura, s jjɛayef nsen i zi tt ccuren zi ṭṭarf ař ṭṭarf nneɣni s texmuji nsen. ^■  

12 Xenni řexxu, war tticem tiḥenjirin nwem d timɣarin i iḥenjiren nsen, uřa d tiḥenjirin nsen war tent ttiwyem i iḥenjiren nwem uca war arezzum x řaman nsen niɣ řxar nsen i řebda, ḥima ad tdewřem tjehdem u ad teccem mummu n řɣiǧet n temmurt u ad tt tewcem d řwart i řebda i iḥenjiren nwem.’

13 Uca awarni marra min i d aneɣ imsaren di ssibbet n tmegga nneɣ tiɛeffanin d umarwas nneɣ ameqqran, a AREBBI nneɣ, aqa Cek war d aneɣ txeǧṣed ca mɣir drus waha ařami war nettwahellek ca s řmuɛṣiyyet nneɣ u tewcid aneɣ ina inni innejmen.

14 Ma nzemmar řexxu ad dd-nedweř ḥima ad narẓ twařa nneɣnit tiweṣṣa nnek u ad negg ad nedweř d iḍeggʷařen ak-d řegnus nni iggin jjɛayef-a? Ma xenni Cek war xaneɣ tesɛared ařami xaneɣ i ɣa teqḍid ař mani war ittɣimi ijj n řbaqi uřa d wenni innejmen?

15 A SIDI, AREBBI n Israil, Cek d amsegged, minzi neccin d inni iqqimen nnejmen am teǧa ass-a. Aqa neccin s umarwas i neǧa zzat i wudem nnek, minzi uřa d ijjen war izemmar ad ibedd zzat i wudem nnek di ssibbet-a.”