1 Ina d izeǧifen n tudrin n ibabaten, ak-d lista n jjadira nsen, inni akidi dd igeɛɛden zi Babil umi tuɣa teǧa tgelda n ujeǧid Artaḥcasta.

2 Zeg ayt n Finḥas: Jarcum, zeg ayt n Itamar: Daniyal, zeg ayt n Dawud: Ḥaṭṭuc.

3 Zeg ayt n Cakanya, zeg ayt n Faruc: Zakariyya u akides ttwazemmemen mya u-xemsin n yeryazen ak-d jjadira nsen.

4 Zeg ayt n Faḥat-Mu’ab: Alihuɛinay, mmis n Zaraḥ-Yah u akides mitayen n yeryazen.

5 Zeg ayt n Cakanya, mmis n Yaḥziyil, u akides teřt-mya n yeryazen.

6 Zeg ayt n Ɛadin: Ɛabid, mmis n Yunatan, u akides xemsin n yeryazen.

7 Zeg ayt n Ɛilam: Yacɛiya, mmis n Ɛatalya, u akides sebɛin n yeryazen.

8 Zeg ayt n Cafaṭya: Zabadya, mmis n Mixayil, u akides tmenyin n yeryazen.

9 Zeg ayt n Yuwab: Ɛubadya, mmis n Yaḥiyil, u akides mitayen u-tmentac n yeryazen.

10 Zeg ayt n Bani: Calumit, mmis n Yucafya, u akides mya u-settin n yeryazen.

11 Zeg ayt n Babay: Zakariyya, mmis n Babay, u akides tmenya u-ɛicrin n yeryazen.

12 Zeg ayt n Ɛajad: Yuḥanan, mmis n Haqqaṭan u akides mya u-ɛecra n yeryazen.

13 Zeg ayt n Aduniqam, ineggura, d ina d ismawen nsen: Ilifalaṭ, Yaɛiyil d Cmaɛya u akidsen settin n yeryazen.

14 Zeg ayt n Biɣway: Ɛutay d Zabbud u akides sebɛin n yeryazen.

15 Necc ssmuneɣ ten ɣar iɣzar nni ittekken x Ahawa. Dinni newta iqiḍan nneɣ třata n wussan u necc ḥekkareɣ i řgens d ikehhanen u war ufiɣ uřa d ijjen zi Ilawiyyen.

16 Xenni ssekkeɣ řexbar ɣar Aliɛazar, ɣar Ariyil, ɣar Cmaɛya, ɣar Alnatan u ɣar Yarib u ɣar Alnatan u ɣar Natan u ɣar Zakariyya u ɣar Macullam, inni d izeǧifen, u ɣar Yuyarib u ɣar Alnatan, iryazen ɣarsen řefhamet.

17 Ssekkeɣ ten ɣar Ɛiddu, azeǧif, deg wemcan umi qqaren Kasifya, uca ggiɣ asen awařen deg uqemmum nsen ḥima ad ten inin i Ɛiddu, i učmas u i imsexxaren n Zzawect Tameqqrant deg wemcan umi qqaren Kasifya, maḥend ad aneɣ dd-awyen imsexxaren i Taddart n AREBBI nneɣ.

18 Umi tuɣa xaneɣ afus iṣebḥen n AREBBI, ssekken aneɣ-dd ijj n weryaz s řeɛqeř, ijjen zeg iḥenjiren n Maḥli, mmis n Lawi, mmis n Israil, u wanita d Carabya, ak-d iḥenjiren nnes d aytmas, marra idsen tmenṭac n yeryazen,

19 d Ḥacabya u akides Yacaɛya, zeg ayt n Marari, ak-d aytmas d iḥenjiren nsen, ɛicrin n yeryazen. 20 U zeg imsexxaren n Zzawect Tameqqrant nni iwcin Dawud d yimcennɛen i Ilawiyyen maḥend ad asen sexxaren, aqa aten mitayen u-ɛicrin n imsexxaren n Zzawect Tameqqrant inni marra ttwařaɣan s ismawen nsen.

21 Xenni řaɣiɣ dinni ɣar iɣzar n Ahawa s yijj n uẓummi, maḥend ad nessaḍar ixef nneɣ zzat i wudem n AREBBI nneɣ, maḥend ad zzayes nettar ticři d tamimunt i neccin u i tarwa nneɣ imeẓyanen u i wagřa nneɣ, 22 maɣar ttsedḥiɣ ad ttareɣ ict n terbiɛet n řɛeskar zi ɣar ujeǧid maḥend ad aneɣ tɛawen deg webrid ḍidd i řeɛdu, minzi tuɣa nessawař deg ujeǧid, nenna: “Afus n AREBBI aqa-t d aṣebḥan x marra inni t yarezzun, maca jjehd nnes d weɣḍab nnes ad dd-asen x marra inni i xas ittaggʷejen.” 23 Iwa neccin nẓumm u nettar aya zi AREBBI nneɣ u netta istajeb aneɣ i tẓaǧit yuǧɣen nneɣ.

24 Xenni farzeɣ tenɛac n yeryazen zeg imeqqranen n ikehhanen: Carabya d Ḥacabya u akidsen ɛecra n aytmatsen. 25 Wezneɣ zzatsen nnuqart d wureɣ d řeqcuɛ, aqa aya d tawhibt n usgeɛɛed i Taddart n AREBBI nneɣ, tenni issgeɛɛed ujeǧid ak-d imcawaren nnes d yimcennɛen d marra inni din ittwafen zi Israil. ^■   26 Wezneɣ u ggiɣ asen deg ifassen nsen setta-mya u-xemsin n talintat n nnuqart u mya n řeqcuɛ n nnuqart iweznen mya n talintat u mya n talintat n wureɣ 27 u ɛicrin n ifenjařen n wureɣ sekkʷan ařef draxmat uřa d tnayen n řeqcuɛ n nnḥas, icellel, icna, iɣřa am wureɣ. 28 Nniɣ asen: “Kenniw d imqeddasen zzat i SIDI u řeqcuɛ-a aqa qeddsen i ǧan, uřa d nnuqart-a d wureɣ-a, aqa aya d tawhibt s řxaḍar i SIDI, AREBBI n ibabaten nwem. 29 Ɛessem u ḥḍam aya ař t ɣa tweznem zzat i wudem n imeqqranen n ikehhanen d Ilawiyyen d imeqqranen n tudrin n ibabaten n Israil di Urcalim, deg ixxamen n Taddart n SIDI.” 30 Xenni ṭṭfen ikehhanen d Ilawiyyen řewzen n nnuqart d wureɣ d řeqcuɛ ḥima ad awyen aya marra ɣar Urcalim ɣar Taddart n AREBBI nneɣ.

31 Deg wass wiss tenɛac n uyur amezwaru nekkes iqiḍan nneɣ maḥend ad nuyur ɣar Urcalim. Tuɣa afus n AREBBI xaneɣ uca issenjem aneɣ zeg ufus n řeɛdu u zeg ufus n yinni i d aneɣ iggin taxceft deg webrid. 32 Uca niweḍ ɣar Urcalim u neqqim dinni třata n wussan. 33 Deg wass wiss arebɛa ittwawzen nnuqart d wureɣ d řeqcuɛ di Taddart n AREBBI nneɣ uca newca aya i ukehhan Marimut, mmis n Uriya, uca Aliɛazar, mmis n Finḥas, tuɣa-t akides uřa d Yuzabad, mmis n Yecuɛa, d Nuɛadya, mmis n Bannuy, tnayen n Ilawiyyen. 34 D man aya imsar ɛlaḥsab řqedd d řewzen n marra aya u marra řewzen ittwawzen di řweqt nni d ijjen. 35 Ayt n lmenfa inni dd-iɛeqben zi lmenfa, ssgeɛɛden i AREBBI n Israil tiɣarṣa n wecmaḍ: tenɛac n iyenduzen i marra Israil, setta u-tesɛin n icarriyyen u sebɛa u-sebɛin n izmaren, tenɛac n imuyan, marra aya d taɣarṣt n wecmaḍ i SIDI. 36 Nitni wcin tiweṣṣa n ujeǧid i ijeǧiden i iǧan sadu ujeǧid u i lwulat di temmurt aɣirin i iɣzar n Lfuraṭ u nitni wcin afus i řgens u i Taddart n AREBBI.