1 Awarni man aya, řami tuɣa d tagelda n Artaḥcasta, ajeǧid n Lfurs, aqa din Ɛizra, mmis n Saraya, mmis n Ɛazarya, mmis n Ḥilqiya, 2 mmis n Callum, mmis n Ṣaduq, mmis n Axiṭub, 3 mmis n Amarya, mmis n Ɛazarya, mmis n Marayut, 4 mmis n Zaraḥ-Yah, mmis n Ɛuzi, mmis n Buqqi, 5 mmis n Abicuɛa, mmis n Finḥas, mmis n Aliɛazar, mmis n Harun, arrays n ikehhanen.

6 Ɛizra wanita igeɛɛed-dd zi Babil. Netta tuɣa d ijj n umseřmad d amiɣis n Ccariɛa n Musa tenni tuɣa i d iwca SIDI, Arebbi n Israil, uca ajeǧid iwca as marra x tutra nnes minzi afus n SIDI, AREBBI nnes, tuɣa-t xas. 7 Deg useggʷas wiss sebɛa n ujeǧid Artaḥcasta geɛɛden akides ɣar Urcalim ijj n řqedda n ayt Israil d ikehhanen d Ilawiyyen d imedyazen d iɛessasen n tewwura d imsexxaren n Zzawect Tameqqrant. ^□   8 Deg uyur wiss xemsa n useggʷas wiss sebɛa n ujeǧid yiweḍ Ɛizra ɣar Urcalim. 9 Deg wass amezwaru n uyur amezwaru tuɣa-t d beddu n wuffuɣ zi Babil uca deg umezwaru n uyur wiss xemsa yiweḍ ɣar Urcalim, minzi tuɣa afus iṣebḥen n AREBBI xas,

10 maɣar Ɛizra igga deg wuř nnes ad yarzu di Ccariɛa n SIDI u ad tt igg u ad isseřmed tiweṣṣa d lfarayiḍ di Israil.

11 Ta d tiřemt n tebrat i iwca ujeǧid Artaḥcasta ak-d Ɛizra, akehhan d umseřmad n tira iqeddsen, wenni d amseřmad deg wawařen n řumurat n SIDI d tweṣṣa nnes i Israil:

12 “Artaḥcasta, ajeǧid n ijeǧiden, i Ɛizra, akehhan d umseřmad n Ccariɛa n AREBBI n ijenwan, řehna imun!” Uca řexxu min yuran di tebrat.

13 “Ittwassuffeɣ-dd zzayi řumur ḥima kuř ijj di tgeldit inu, zi řgens n Israil u zeg ikehhanen d Ilawiyyen, wenni s yixef nnes ixs ad yuyur ɣar Urcalim, ad kidek yuyur.

14 Aqa cek tᵉttwasekked s ufus n ujeǧid d sebɛa n imcawaren nnes ḥima ad tbeqqced di Yahuda u di Urcalim zi jjihet n Ccariɛa n AREBBI tenni iǧan deg ifassen nnek

15 u ḥima ad din tawyed nnuqart d wureɣ nni tuɣa iwca ujeǧid d imcawaren nnes s řxaḍar i AREBBI n Israil, wenni ɣar teǧa tzeddiɣt di Urcalim, ^■  

16 u ɛawed marra nnuqart d wureɣ i ɣa tafed di marra lɛamala n Babil, ak-d tewhibt n uṭewweɛ n řgens d ikehhanen, zeg inni i ɣa iwcen s uṭewweɛ i Taddart n AREBBI nsen tenni iǧan di Urcalim,

17 ḥima xenni ad tesɣed s nnuqart-a s cḍaret ifunasen, icarriyyen, izmaren ak-d tewhibin nnes n řɣiǧet d tewhibin n useyyeb ḥima ad tent tqeddmed x uɛalṭar n Taddart n AREBBI nnek, tenni iǧan di Urcalim.

18 S min ɣa iqqimen n nnuqart d wureɣ ggem zzayes min tᵉttwařid cek d aytmac mliḥ, ɛlaḥsab řxaḍar n AREBBI nwem.

19 Uca řeqcuɛ i d ac immewcen i tsexxart di Taddart n AREBBI, seɛdu ten i AREBBI n Urcalim. 20 Min i ɣa ixeṣṣen ɛad ktar i Taddart n AREBBI nnek, min ɣa yiři xak ad t txeǧṣed, ewc i-t zeg wexxam n txubay n ujeǧid. 21 Necc, ajeǧid Artaḥcasta, ssuffeɣ-dd řumur i marra imeḥḍayen n txubay di temmurt aɣirin i iɣzar, maḥend ad ittwagg s cḍaret marra min zzaywem ɣa ittar ukehhan Ɛizra, amseřmad n Ccariɛa n AREBBI n ijenwan, 22 ař mya n talintat n nnuqart, ař mya ikuruten n irden, ař mya ibatuten n binu, ař mya ibatuten n zzect uca i tmeǧaḥt war din bu tewṣeyyet. 23 Marra min iǧan zi řumur n AREBBI n ijenwan, ad ittwagg s cḍaret i Taddart n AREBBI n ijenwan, minzi mayemmi i dd ɣa yas weɣḍab x tgeldit n ujeǧid u x iḥenjiren nnes? 24 Zi jjihet n marra ikehhanen d Ilawiyyen, d imeɣnujen d iɛessasen n tewwura d imsexxaren n Zzawect Tameqqrant d imsexxaren n Taddart n AREBBI wanita, aqa ad kenniw nxebbar, war izemmar ad xasen ittwagg řeɛcur, řa d ljizya uřa d ḍḍariba n webrid. 25 Cek maca, Ɛizra, s tiɣit i d ac immewcen zi AREBBI, řeqqem imḍebbaren d řquḍat nni i ɣa iḥekmen x marra řgens nni iǧan di temmurt aɣirin i iɣzar, i marra inni issnen izerfan n AREBBI. Uca i yenni war ten issinen, ittxeṣṣa ad ten dd-tessargbed. ^□   26 Kuř ijjen wenni war iḍfaren Ccariɛa n AREBBI nwem d uzerf n ujeǧid, ittxeṣṣa ad ittwaḥkem s cḍaret, ma s řmewt niɣ s lmenfa niɣ s multa n wagřa niɣ s řeḥbes.”

27 Asemɣar i SIDI, Arebbi n ibabaten nneɣ, wenni iggin aya ammu deg wuř n ujeǧid ḥima ad yarni acenneɛ di Taddart n SIDI nni iǧan di Urcalim. 28 Aqa Netta isscen ayi tamexsiwt nnes icewwaren zzat i wudem n ujeǧid d imcawaren nnes d marra řḥukkam n ujeǧid! Uca umi xafi tuɣa afus n SIDI, AREBBI inu, ggiɣ uř u ssmuneɣ izeǧifen n Israil ḥima ad kidi geɛɛden.