1 Xenni issuffeɣ ujeǧid Dariyus řumur uca arzun di taddart n idlisen ittwannḍen mani ttwaxemmřent txubay din di Babil. 2 Xenni ittwaf di Aḥmata ijj n wedlis ittwannḍen di lqelɛa tenni iǧan di lɛamala n Midya u dayes tuɣa tira aya n řidaret:

3 “Deg useggʷas amezwaru n ujeǧid Kurac, issuffeɣ Kurac řumur-a: ‘X Taddart n AREBBI di Urcalim. Aqa ittxeṣṣa ad tᵉttwabna Taddart nni twařa nneɣnit deg wemcan mani qeddmen tiɣarṣa u ittxeṣṣa ad ttwasgeɛɛden dsusa nnes. Řuɛřa nnes ad tiři settin n iɣaǧen, tiru nnes settin n iɣaǧen, 4 s třata n řesdud n tṣuḍar timeqqranin d ijj n ssedd n tefřewt d jdid, u min din ixeṣṣen ad zzayes tᵉttwakellef zi taddart n ujeǧid. 5 Uřa d řeqcuɛ n wureɣ d nnuqart n Taddart n AREBBI, inni ikkes Nabuxadnaṣṣar zi Zzawect Tameqqrant nni iǧan di Urcalim u iwyi ten ɣar Babil, ad ttwarren u man aya ad dd-idweř ɣar Zzawect Tameqqrant nni iǧan di Urcalim, ɣar wemcan nnes uca cek ad temmarsed aya di Taddart n AREBBI.’

6 S man aya, Tatnay, lwali n temmurt aɣirin i yeɣzar, Catar-Buznay d iqqrinen nnes di řxedmet, iqqrinen nni iǧan aɣirin i yeɣzar, aggʷejem ssenni! 7 Jjem řxedmet di ṭṭweɛ n Taddart-a n AREBBI, ḥima lwali n Wudayen ak-d imɣaren n Wudayen ad bnan Taddart-a n AREBBI twařa nneɣnit deg wemcan nnes.

8 Ɛawed ittwassuffeɣ-dd zzayi řumur x min ittxeṣṣa ad teggem i imɣaren n Wudayen-a maḥend ad tᵉttwabna Taddart-a n AREBBI twařat nneɣni. Zeg wagřa n ujeǧid, zi ljizya n temmurt aɣirin i iɣzar, ad ittwaxeǧeṣ s cḍaret min ittxeṣṣen iryazen-a maḥend war tᵉttbeddi ca řxedmet. 9 U min ittxeṣṣen zeg iyenduzen d icarriyyen d izmaren d tɣarṣi n wecmaḍ i Arebbi n ijenwan, u zeg irden d tmeǧaḥt d binu d zzect, ɛlaḥsab awař n ikehhanen i iǧan di Urcalim, ad asen immewc zeg wass ɣar wass, ḥima war ittxiṣṣa uřa d walu,

10 ḥima ad qeddmen ict n řefwaḥet ittfuḥen i AREBBI n ijenwan uca ad ẓẓaǧen di ṭṭweɛ n tudart n ujeǧid d iḥenjiren nnes.

11 ittwassuffeɣ-dd zzayi řumur ḥima kuř ijjen wenni i ɣa ibeddřen tawṣeyyet-a, ad ittwakkes ijj n weɛmud zi taddart nnes ad t ssbedden, ad xas ittwayeř netta uca di ssibbet-a ad tedweř taddart nnes d ict n tzubact n řeɣbar.

12 Ejj ad ihdem AREBBI, wenni din issezdɣen Isem nnes, marra ijeǧiden d řegnus nni i ɣa isswiẓẓḍen afus nsen maḥend ad beddřen niɣ ad areddǧen Taddart n AREBBI nni iǧan di Urcalim. Necc Dariyus, d wenni iwcin řumur. Ejj ad ittwagg man aya s cḍaret.”

13 Xenni Tatnay, lwali n temmurt aɣirin i iɣzar ak-d Catar-Buznay d iqrinen nnes di řxedmet ggin s cḍaret ɛlaḥsab řumur i tuɣa dd-issekk ujeǧid Dariyus.

14 Bnan imɣaren n Wudayen, u nitni arnin mliḥ di řebni umi tuɣa ittnebba Ḥaggay d Zakariyya, mmis n Ɛiddu. Nitni bnan u kemmřen tt ɛlaḥsab řumur n AREBBI n Israil u ɛlaḥsab řumur n Kurac d Dariyus d Artaḥcasta, ajeǧid n Lfurs.

15 Tettwakemmeř Taddart deg wass wiss třata n uyur Adar, aqa-t d aseggʷas wiss setta n tgelda n ujeǧid Dariyus.

16 Ayt n Israil, ikehhanen d Ilawiyyen d ayt n lmenfa i iqqimen, deccnen Taddart-a n AREBBI s řefraḥet.

17 I udeccen n Taddart n AREBBI iwyen nitni mya n ifunasen, mitayen n icarriyyen d arebɛa-mya n izmaren d taɣarṣt uřa d tenɛac n imuyan i taɣarṣt n ddenb i marra Israil ɛlaḥsab řqedd n tqebbař n Israil.

18 Nitni ssbedden ikehhanen s terbiɛin nsen u Ilawiyyen di terbiɛin nsen i tsexxart i AREBBI wenni iǧan di Urcalim, ɛlaḥsab tawṣeyyet n wedlis n Musa. ^■  

19 Deg wass wiss arbeɛṭac n uyur amezwaru sswejden ayt n lmenfa uřa d Taɣarṣt n Useɛdu. ^■   20 Minzi ikehhanen d Ilawiyyen ggin ad ssizdgen ixef nsen am ijj n weryaz. Tuɣa-ten marra d imezdagen u nitni ɣarṣen Taɣarṣt n Useɛdu i marra ayt n lmenfa u i aytmatsen ikehhanen u i yixef nsen. 21 Ayt n Israil, inni idewřen zi lmenfa, ccin zzayes uřa d kuř ijjen wenni tuɣa issarxun ixef nnes zi řexmej n řegnus n temmurt am ɣarsen iggur ḥima ad yarzu SIDI, AREBBI n Israil. 22 Sebɛa n wussan ɛeyyden nitni Řɛid n Weɣrum břa Antun, minzi SIDI tuɣa issefraḥ i-ten uca issmeyyeř uř n ujeǧid n Accur ɣarsen maḥend ad issejhed ifassen nsen ɣar řxedmet n Taddart n AREBBI, AREBBI n Israil.