1 Xenni nebban inabiyyen, anabiy Ḥaggay d Zakariyya, mmis n Ɛidu, i Wudayen nni iǧan di Yahuda d Urcalim. Nabben ɣarsen s Yisem n AREBBI n Israil. ^■   2 Xas uca ikkar Zarubbabil, mmis n Caɛaltiyil, d Yacuɛa, mmis n Yuṣadaq, uca nitni bdan ad bnan Taddart n AREBBI wenni izeddɣen di Urcalim, uca inabiyyen n AREBBI, inni akidsen ibedden, tuɣa aten din akidsen.

3 Di řweqt nni yusa-dd Tatnay, lwali n weqlim aɣirin i iɣzar, ak-d Catar-Buznay u ɣarsen iqrinen nnes di řxedmet, uca nnan asen ammu: “Man wen i kenniw yumuren, maḥend ad tebnam Taddart-a u maḥend ad tkemmřem řḥiḍ-a?” 4 Xenni nenna asen ismawen n yeryazen i tuɣa ibennan řebni aya. 5 Maca tiṭṭ n AREBBI nsen tuɣa-tt x imɣaren n Wudayen uca war ggin ad ten ssbedden zi řxedmet ař ɣa taweḍ tmesřact ɣar Dariyus uca awarni aya ad ṭṭfen tabrat x man aya.

6 Tiřemt n tebrat nni issekk Tatnay, lwali n temmurt aɣirin i iɣzar, ak-d Catar-Buznay d iqrinen nnes di řxedmet, iqrinen nni iǧan aɣirin i iɣzar, ɣar ujeǧid Dariyus.

7 Nitni ssekken as-dd ict n tebrat tura dayes ammu:

“Ad yiři i ujeǧid Dariyus řehna zi marra iɣezdisen!”

8 “Iři ad issen ujeǧid, aqa neccin nuyur ɣar lɛamala n Yahuda, ɣar Taddart n AREBBI ameqqran. Aqa ggur ad tᵉttwabna s iẓra imeqqranen u ittwagg ukeccuḍ di řeḥyuḍ. Tᵉttwagg řxedmet-a s cḍaret uca teggur mliḥ jar ifassen nsen. 9 Neccin nesseqsa imɣaren-a u nenna asen ammu: ‘Man wen i d awem iwcin řumur maḥend ad tessbeddem taddart-a u ad tkemmřem řḥiḍ-a?’

10 Nesseqsa ten uřa x ismawen nsen ḥima ad ac ten-dd nini, ařami niweḍ ad nzemmem ismawen n yeryazen nni iǧan ɣar uzeǧif nsen.

11 Nitni arrin aneɣ-dd, nnan ammu: ‘Neccin d imsexxaren n AREBBI n ijenwan d temmurt u nebna taddart tenni tᵉttwabna danita aṭṭas n iseggʷusa zeg wami. Ijj n ujeǧid d ameqqran n Israil ibna tt u ikemmeř i-tt.

12 Maca awarni řami ssɛaren ibabaten nneɣ AREBBI n ijenwan, aqa iwca i-ten deg ufus n Nabuxadnaṣṣar, ajeǧid n Babil, Axaldiwi, wenni ihedmen Taddart-a u indeh řgens ɣar lmenfa ɣar Babil. ^■  

13 Maca deg useggʷas amezwaru n Kurac, ajeǧid n Babil, yumur Kurac ad ssbedden Taddart-a n AREBBI twařat nneɣni. ^■  

14 Uřa d řeqcuɛ n wureɣ d nnuqart zi Taddart n AREBBI, inni ikkes Nabuxadnaṣṣar zi Zzawect Tameqqrant di Urcalim, issidef i-ten ɣar zzawect n Babil, aqa issuffeɣ i-ten Kurac zi zzawect di Babil u iwca i-ten i ijj n weryaz qqaren as Cicbaṣṣar, wenni tuɣa igga d lwali. ^■  

15 Netta inna as: Ksi řeqcuɛ-a ruḥ, ggem ten di Zzawect Tameqqrant di Urcalim. Ittxeṣṣa ad tᵉttwabna Taddart n AREBBI deg wemcan nnes n zic.

16 Xas uca yusa-dd Cicbaṣṣar nni uca issars dsusa i Taddart n AREBBI di Urcalim u ssenni ař řexxu aqa bennan tt, maca war tᵉttwakemmeř ɛad.’

17 Xenni řexxu, mařa yarḍa i ujeǧid, ejj ad arzun deg wexxam n txubay n ujeǧid di Babil, ma s tidett immewc řumur zi ɣar ujeǧid Kurac ḥima ad tᵉttwabna Taddart-a n AREBBI di Urcalim twařa nneɣni uca ad aneɣ-dd ittwassekk xenni lqarar n ujeǧid.”