1 Umi sřen řɛedyan n Yahuda d Binyamin, aqa ayt n lmenfa tuɣa bennan Zzawect Tameqqrant i SIDI, AREBBI n Israil, 2 usin-dd nitni ɣar Zarubbabil d izeǧifen jar ibabaten n řaǧat uca nnan asen: “Ejj aneɣ ad nebna jmiɛ akidwem, minzi uřa d neccin narezzu AREBBI, am kenniw, aqa tuɣa nqeddem tiɣarṣi zeg wussan n Asarḥaddun, ajeǧid n Accur, wenni d aneɣ dd da issgeɛɛden.” ^■   3 Maca Zarubbabil d Yecuɛa d izeǧifen iqqimen jar ibabaten n Israil, nnan asen: “War iǧi i kenniw d neccin maḥend ad nebna jmiɛ ict n Taddart i AREBBI nneɣ. Neccin weḥḥᵉdneɣ ad tt nebna i SIDI, AREBBI n Israil, am mammec i d aneɣ yumur ujeǧid Kurac, ajeǧid n Lfurs.” ^■  

4 Uca imsar, aqa řgens n temmurt ssarxun ifassen n řgens n Yahuda uca ssiggʷiden ten x řebni. 5 Cran imcawaren ḍidd nsen maḥend ad ssbeṭṭřen anway nsen u aya ikka marra ussan n Kurac, ajeǧid n Lfurs, ař tgelda n Dariyus, ajeǧid n Lfurs. 6 Umi tuɣa Aḥacwiruc d ajeǧid, ɣar beddu n tgelda nnes, uran nitni ijj n ucetci ḍidd i imezdaɣ n Yahuda d Urcalim.

7 Deg wussan n Artaḥcasta yura Biclam ak-d Mitradat d Ṭabayil d iɛciren nnes inneɣni, i ujeǧid Artaḥcasta, ajeǧid n Lfurs. Tuɣa tabrat tura s tira n iřes n Tramit u tuɣa tarjmen tt ɛawed ɣar Tramit.

8 Raḥum, amsuffeɣ n řeḥkamat, d umarir Cimcay urin ict n tebrat i ujeǧid Artaḥcasta ḍidd i Urcalim, tenni dayes yura ammu:

9 “Raḥum, amsuffeɣ n řeḥkamat, d umarir Cimcay d inni iqqimen zeg iqrinen nsen di řxedmet, Idiniyyen d Ifarstikiyyen d Iṭarfiliyyen d Ifarsiyyen d Irkawiyyen d Ibabiluniyyen d Icucaniyyen, aqa-ten d Iɛilamiyyen,

10 d řegnus nneɣni, inni iwyi ten Asnaffar ameqqran amcenneɛ ɣar lmenfa u issezdeɣ i-ten di tendint n Samarya u di jjihet iqqimen x ujemmaḍ n yeɣzar.” Uca řexxu min yuran di tebrat.”

11 Ta d tiřemt n tebrat i d as dd-ssekken i ujeǧid Artaḥcasta:

“Imsexxaren nnek, iryazen nni iǧan x ujemmaḍ n iɣzar.” Uca řexxu min yuran di tebrat.

12 “Iři ad issen ujeǧid aqa Udayen i dd-igeɛɛden zi ɣarek, aqa iwḍen-dd ɣarneɣ ɣar Urcalim uca nitni aqa bennan tandint nni iɣewwɣen taɛeffant, aqa ttkemmařen řeḥyuḍ u ɛeddřen dsusa.

13 Xenni řexxu, ittxeṣṣa ad issen ujeǧid, mařa tandint nni ad tᵉttwasbedd twařa nneɣni u řeḥyuḍ ad ttwakemmřen, aqa nettat war tᵉttic ljizya řa d řeɛcur uřa d ḍḍariba n webrid uca ammu i ɣa tessexsar tendint arbeḥ n ijeǧiden.

14 Xenni řexxu, umi neccin nettmeǧaḥ macca nneɣ s tmeǧaḥt n řeqṣer u war d aneɣ-dd tusi mařa neccin nxezzar umi ittwasbehdeř ujeǧid, x uyenni nessekk-dd tabrat-a uca nessargeb aya i ujeǧid,

15 ḥima ad arzun deg wedlis n imezruyen n ibabaten nwem uca ad tafed deg wedlis n imezruyen uca ad zzayes tessned aqa tandint-a d ict n tendint iɣewwɣen, tiwi-dd arrẓiyyet i ijeǧiden u i lɛamalat u zeg wecḥař uya ssekkaran dayes aɣewweɣ. S uyenni tᵉttwahdem tendint-a.

16 Neccin nessargeb ajeǧid, aqa, mařa ad tᵉttwabna tendint-a ɛawed uca ad ttwakemmřen řeḥyuḍ nnes, xenni war ɣarek ttᵉttiři ca teṣɣart ɛad aɣirin i iɣzar.”

17 Issekk ujeǧid tamwarrit i Raḥum, amsuffeɣ n řeḥkamat, u i umarir Cimcay d inni iqqimen zeg iqrinen nsen di řxedmet inni izeddɣen di Samarya, u uřa i yenni iqqimen zeddɣen aɣirin i iɣzar:

“Řehna!” Uca řexxu min yuran di tebrat.

18 “Tabrat i d aneɣ dd-tessekkem, aqa tᵉttwaɣar xafi am mammec teǧa nican.

19 Uca awarni řami umureɣ aya, tᵉttwagg ict n tarezzut uca ufin aqa tandint-a tɣewweɣ x ijeǧiden zeg wecḥař uya uca ssekkaren dayes řebda aɣewweɣ d řehweř. 20 Ɛawed tuɣa din ijeǧiden imeqqranen x Urcalim, inni tuɣa iḥekkmen di marra jjwayeh aɣirin i iɣzar uca tᵉttwaxeǧeṣ asen ljizya d řeɛcur d ḍḍariba n webrid. 21 Iwa, řexxu umurem ad ssbeddem iryazen-a. Tandint war tbenni twařa nneɣnit ař ɣa ittwassuffeɣ zzayi řumur i uya. 22 Ɣarwem aqa ad tarxum zi tmesřact-a. Mayemmi i ɣa temɣar druct ɛad i zi ɣa ttwasexsaren ijeǧiden?”

23 Řami tᵉttwaɣar tebrat n ujeǧid Artaḥcasta i Raḥum d Cimcay, amarir, d iqrinen nsen di řxedmet, uyuren ina s tazřa ɣar Urcalim, ɣar Wudayen uca ssbedden ten zi řxedmet nsen s uɣiř u s řxuncet. 24 Xenni tbedd řxedmet i Taddart n AREBBI wenni izeddɣen di Urcalim uca iqqim ibedd ař aseggʷas wiss tnayen n tgelda n Dariyus, ajeǧid n Lfurs.