1 Umi dd-yiweḍ uyur wiss sebɛa u ayt n Israil tuɣa aten di tneddam, issmun řgens am ijj n weryaz di Urcalim. 2 Ikkar Yecuɛa, mmis n Yuṣadaq, ak-d aytmas, ikehhanen, d Zarubbabil, mmis n Caɛaltiyil, ak-d aytmas, uca bnan aɛalṭar n AREBBI n Israil, ḥima ad xas qeddmen tiɣarṣa n wecmaḍ am mammec tura di Ccariɛa n Musa, aryaz n AREBBI. ^■   3 Nitni ssbedden aɛalṭar deg wemcan nnes mani t tuɣa d amezwaru, minzi tiggʷudi zi řegnus n temmura tewḍa-dd xasen, uca qeddmen xas tiɣarṣa n wecmaḍ i SIDI, tiɣarṣa n wecmaḍ i tuffut u i tmeddit. ^■   4 Uca ɛeyyden Řɛid n Iɛuccuten, am mammec t yura, uca qeddmen tiɣarṣa n wecmaḍ, ass iḍfar umas. Tuɣa řqedd nsent i yijj n wass ɛlaḥsab min ittwaggen i wass nni. ^■   5 Awarni as qeddmen nitni taɣarṣt n wecmaḍ n řebda d tɣarṣa i wussan n uyur n jdid u i marra řeɛyudat ittwaggen n SIDI inni tuɣa ittwaqeddsen u ɛawed tiɣarṣa n kuř ijj wenni iṭṭewɛen ḥima ad iqeddem ict n tewhibt s řxaḍar i SIDI. ^■  

6 Zeg wass amezwaru n uyur wiss sebɛa bdan nitni ad qeddmen tiɣarṣa n wecmaḍ i SIDI, maca dsas n Zzawect Tameqqrant n SIDI war ittwagg ɛad. 7 Wcin nnuqart i imassuten u i yenni ineqqcen akeccuḍ, uca i ayt n Sidun u i ayt n Ṣur wcin nitni macca d tissit d zzect maḥend ad awyen akeccuḍ n tneglin n Lubnan ɣar řebḥar ɣar Yafa ɛlaḥsab ttesriḥ i d asen iwca Kurac, ajeǧid n Lfurs. 8 Deg useggʷas wiss tnayen awarni wawaḍ nsen ɣar Taddart n AREBBI di Urcalim, deg uyur wiss tnayen, bdan Zarubbabil, mmis n Caɛaltiyil, d Yecuɛa, mmis n Yuṣadaq, d aytmas nsen i iqqimen, ikehhanen d Ilawiyyen d marra inni dd-yusin zi tmeḥbast ɣar Urcalim, di řxedmet. Nitni ggin Ilawiyyen zi ɛicřin iseggʷusa sennej maḥend ad ṭṭfen acbar x řxedmet n Taddart n SIDI. 9 Uca ikkar Yecuɛa d iḥenjiren nnes d aytmas, Qadmyil d iḥenjiren nnes, ayt n Yahuda, am ijj n weryaz maḥend ad ṭṭfen acbar x yenni iggin řxedmet di Taddart n AREBBI, u ɛawed iḥenjiren n Ḥinadad ak-d iḥenjiren nsen d aytmatsen Ilawiyyen.

10 Umi tuɣa ibennayen ssrusan dsas i Zzawect Tameqqrant n SIDI, ssbedden nitni ikehhanen s warruḍ nsen ak-d řɣayṭat, d Ilawiyyen, ayt n Asaf, s teǧunin n wuzzař, ḥima ad ssemɣaren SIDI am mammec tuɣa i d asen isscen ufus n Dawud, ajeǧid n Israil.

11 Nitni ɣennjen s nnubat i SIDI s usemɣar d uqadi, aqa Netta iṣbeḥ minzi tamexsiwt nnes icewwaren x Israil tᵉttɣima i řebda. U marra řgens isɣuyy s yijj n usřiwřew imɣar i usemɣar n SIDI maɣar dsas i Taddart n SIDI tuɣa immars. ^■  

12 Aṭṭas n ikehhanen d Ilawiyyen d izeǧifen n tudrin n ibabaten, imeqqranen inni iẓrin umi ittwagg dsas n Taddart tamezwarut, inni ɣar iǧa ɛad Taddart nni zzat i tiṭṭawin nsen, run s tmijja ijehden, maca uřa d aṭṭas arenyen di tmijja nsen s usřiwřew u s řefraḥet,

13 ařami war izemmar řgens ad meyyzen jar řḥess n usřiwřew d řḥess n iɣuyyan s imeṭṭawen n řgens, minzi řgens isɣuyy s yijj n usřiwřew imɣar ařami ittwaseř řḥess zi řaggʷaj.