1 Umi tuɣa Dawud iwsar u ijjiwen ussan, igga netta mmis Suliman d ajeǧid x Israil. 2 Netta issmun-dd marra imgewwaden n Israil uřa d ikehhanen d Ilawiyyen. 3 Ttwaḥesben Ilawiyyen zi třatin n iseggʷusa d sennej. Tuɣa řqedd nsen azeǧif azeǧif tmenya u-třatin-ařef n yeryazen. 4 Zzaysen tuɣa din arebɛa u-ɛicrin-ařef n yinni ittwaggen d imseyyaren x řxedmet di Taddart n SIDI uca aqa din ɛad setta-ařaf n iweqqafen d řquḍat, 5 arbeɛa-ařaf n iɛessasen n tewwart d arebɛa-ařaf n imedyazen i iẓran n uṣebbaḥ i SIDI, ak-d dduzanat n lmusiqa nni ggiɣ, inna Dawud, ḥima ad ssemɣaren SIDI s yezřan n uṣebbaḥ.

6 Dawud ibḍa ten di terbiɛin, ttwasettfen ɛlaḥsab iḥenjiren n Lawi: Jarcun, Qahat d Marari.

7 Zeg Ijarcuniyyen tuɣa aten d Laɛdan d Cimɛi.

8 Tarwa n Laɛdan tuɣa aten d azeǧif Yaḥiyil, Zitam d Yuwil, třata n yeryazen.

9 Tarwa n Cimɛi tuɣa aten d Calumit, Ḥaziyil d Haran, třata n yeryazen. Ina tuɣa aten d izeǧifen jar ibabaten n řaǧat n Laɛdan.

10 Iḥenjiren n Cimɛi tuɣa aten d Yaḥat, Zayna, Yaɛuc d Bariɛa. Ina tuɣa aten d iḥenjiren n Cimɛi.

11 Yaḥat tuɣa-t d azeǧif u Ziza wiss tnayen, maca Yaɛuc d Bariɛa war tuɣi ɣarsen iḥenjiren aṭṭas. Ɣar řeḥsab ttwaḥesben nitni d ijj n řaǧ.

12 Tarwa n Qahat tuɣa aten d Ɛamram, Yiṣhar, Ḥabrun d Ɛuzziyil, arebɛa n yeryazen.

13 Iḥenjiren n Ɛamram tuɣa aten d Harun d Musa.

Ittwaɛzeř Harun ḥima ad t ittwaqeddes d amqeddes qaɛ, netta d iḥenjiren nnes, i řebda, ḥima ad issbexxar jjawi zzat i wudem n SIDI, ḥima ad as isexxar u ḥima ad ibarek s Yisem nnes i řebda.

14 Tarwa n Musa, aryaz n AREBBI, ttwařaɣan jar teqbič n Lawi.

15 Tarwa n Musa tuɣa aten d Jarcum d Iliɛazar.

16 Zeg iḥenjiren n Jarcun tuɣa Cabuwil d azeǧif.

17 Mmis n Iliɛazar tuɣa d azeǧif Raḥabya. War tuɣi ɣares ɣar Iliɛazar iḥenjiren nneɣni. Iḥenjiren n Raḥabya maca tuɣa aten deg waṭṭas.

18 Zeg iḥenjiren n Yiṣhar tuɣa Calumit d azeǧif.

19 Zeg iḥenjiren n Ḥabrun tuɣa Yariya d azeǧif, Amarya wiss tnayen, Yaḥziyil wiss ṭrata d Yaqmaɛam wiss arebɛa.

20 Zeg iḥenjiren n Ɛuzziyil tuɣa Mixa d azeǧif, u Yaciya wiss tnayen.

21 Tarwa n Marari tuɣa aten d Maḥli d Muci.

Tarwa n Maḥli tuɣa aten d Aliɛazar d Qis. 22 Aliɛazar immut u netta war ɣares tuɣi bu iḥenjiren, maca yessis wah. Tarwa n Qis, aytmatsen, iwyen tent d tamɣart.

23 Tarwa n Muci tuɣa aten d Maḥli d Ɛadir d Yarimut, třata n yeryazen.

24 Ina tuɣa aten d iḥenjiren n Lawi, inni ittwasettfen ɛlaḥsab řaǧat nsen, ɛlaḥsab izeǧifen n řaǧat, inni ittwazemmen ɣar řeḥsab nsen s řqedd n ismawen nsen azeǧif azeǧif, inni iggin tasexxart i Taddart n SIDI, zi ɛicrin iseggʷusa sennej. 25 Maɣar Dawud tuɣa inna: “SIDI, AREBBI n Israil, iwca řhudnet i řgens nnes u Netta ad izdeɣ di Urcalim i řebda.” 26 Netta inna ɛawed x Ilawiyyen: “Nitni war ḥdijen ɛad ad arbun Tazeddiɣt d marra řeqcuɛ nni dd ittasen ak-d tsexxart.” 27 Minzi ɛlaḥsab awařen ineggura n Dawud, tuɣa řqedd n iḥenjiren n Lawi d inni iǧan zi ɛicrin iseggʷusa sennej. 28 Nitni bedden ak-d iḥenjiren n Harun di tsexxart di Taddart n SIDI, ɣar uḥeṭṭu x řemraḥat barra u x ixxamen n řexzen u x usizdeg n marra řeqcuɛ iqeddsen d řxedmet n tsexxart di Taddart n AREBBI, 29 umi sswejden nitni aɣrum n wescan d waren n ssmid i tewhibt n řɣiǧet d teřfaf břa antun, umi ssxedmen axdim u ggʷin arecti u man aya i marra řqedd d marra řeqyas. 30 Tuɣa ittxeṣṣa ad bedden wejden di kuř tuffut ḥima ad ṣebbḥen u ad ssemɣaren SIDI, ammu uřa ɣar tmeddit, 31 uřa řami dd-yiwyen marra tiɣarṣa n wecmaḍ i SIDI, deg wussan n ssebt, deg wussan n uyur n jdid u di řeɛyudat ittwaggen, ɛlaḥsab řqedd i yeǧa di lfariḍa i d as ittřiqan, břa aqeṭṭu zzat i wudem n SIDI. 32 Ittxeṣṣa asen ad ḥḍan taweqqaft nsen i Uqiḍun n Umsagar d tweqqaft nsen i Zzawect Iqeddsen d tweqqaft nsen ɣar uɣezdis n iḥenjiren n Harun, aytmatsen, ɣar tsexxart n Taddart n SIDI.