1 Inna Dawud: “Da i ɣa tbedd Taddart n SIDI AREBBI, u da i ɣa yiři uɛalṭar n tɣarṣa n wecmaḍ i Israil.” 2 Yumur Dawud ad ssmunen ibarraniyyen inni iǧan di temmurt n Israil u netta igga isuydayen ḥima ad ssuydan iẓra i řebni n Taddart n AREBBI. ^□   3 Dawud issewjed aṭṭas n wuzzař i řewtadat i tewwura n wadaf u i tḥenya n uɛarreḍ uřa d waṭṭas n nnḥas, ařami war izemmar ad ittwawzen řqedd nnes, 4 uřa d akeccuḍ n tengelt, ijj n řqedd war izemmar ad ittwaḥseb, minzi ayt n Ṣidun d ayt n Ṣur ssiwḍen aṭṭas n ukeccuḍ n tcejjart n tengelt ɣar Dawud. 5 Dawud inna: “Mmi Suliman d aḥudri ɛad u d arhef. Taddart maca i ɣa ittwasbedden i SIDI ad tiři d tameqqrant d issɛuǧen ḥima Isem nnes d řɛezz nnes ad idweř ɣar marra timmura. Necc ad as sswejdeɣ.” Ammu i issewjed Dawud aṭṭas qbeř i řmewt nnes.

6 Xenni iřaɣa netta i mmis Suliman uca yumur i-t ḥima ad ibna ict n Taddart i SIDI, AREBBI n Israil. 7 Inna Dawud i Suliman: “Mmi, necc simant inu tuɣa-t deg wuř inu ḥima ad bniɣ ict n Taddart i Yisem n SIDI, AREBBI inu. 8 Maca yusa-dd ɣari wawař n SIDI, inna: ‘Cek tessizzřed aṭṭas n idammen u teggid imenɣan iqesḥen. Cek war tbennid i Yisem inu Taddart, maɣar cek tessizzřed zzat i wudem inu aṭṭas n idammen x temmurt. 9 Xzar, mmic wenni d ac i ɣa dd-ittwarwen i ɣa yiřin d ijj n weryaz n řḥudnet, maɣar Necc ad as wceɣ řhudnet zi marra řɛedyan nnes i d as dd-innḍen, maɣar isem nnes ad yiři Suliman u deg wussan nnes ad wceɣ řehna d řhudnet i Israil.

10 Netta ad ibna ict n Taddart i Yisem inu u netta ad yiři i Necc d mmis u Necc ad as iřiɣ d Tbabat u Necc ad ssmetneɣ řɛarc n tgelda nnes x Israil i řebda.’

11 Xenni řexxu, mmi inu, SIDI ad yiři akidek u cek ad tfeřḥed u ad tebnid Taddart n SIDI, AREBBI nnek, am mammec tuɣa xak issiweř.

12 Iři ad ac iwc SIDI řeɛqeř d řefhamet uřa d usuyar x Israil ḥima ad teḥḍid Ccariɛa n SIDI, AREBBI nnek.

13 Xenni ad tiřid tfeřḥed xmi i ɣa teḥḍid ḥima ad ggen tiweṣṣa d lfarayiḍ, tinni yumur SIDI s Musa i Israil. Iři d aryaz u iři tmeḥḍed, war tteggʷed ca u war tefciř!

14 Xzar-dd, di řeḥṣaret inu sswejdeɣ ɣar ufus i Taddart n SIDI myat-ařef n talintat n wureɣ d wařef x wařef n talintat n nnuqart uřa d nnḥas d wuzzař ařami war zemmaren ad weznen. Uřa d akeccuḍ d iẓra iwyeɣ ten-dd. U cek ad xas tarenyed ɛad.

15 Cek ɣarek ɛawed aṭṭas n yeryazen ḥima ad ggen řxedmet, isuydayen d řemɛuǧam i uneqqac n weẓru d ukeccuḍ d ɛřam kuř iwdan nni ɣar teǧa řefhamet di ɛřam kuř řxedmet.

16 Ureɣ d nnuqart d nnḥas d wuzzař anect war izemmar ad t ḥesben. Kkar, egg i-t uca SIDI ad kidek yiři.”

17 Dawud yumur ɛawed i marra imgewwaden n Israil, maḥend ad wcen afus i mmis Suliman, inna:

18 “Ma war iǧi SIDI, AREBBI nwem, akidwem u ma war d awem iwci řhudnet ɣar marra iɣezdisen nwem? Maɣar Netta igga marra imezdaɣ n temmurt deg ufus inu uca tᵉttwagg temmurt sadu ufus inu zzat i wudem n SIDI u zzat i wudem n marra řgens.

19 Xenni řexxu, wcem uř d řeɛmar nwem ḥima ad tarzum x SIDI, AREBBI nwem, uca kkarem uca bnam Zzawect Iqeddsen n SIDI AREBBI ḥima Ttabut n Řɛahd n SIDI d marra řeqcuɛ iqeddsen n AREBBI zemmaren ad ttwassidfen di Taddart i ɣa ittwabnan i Yisem n SIDI.”