1 Xenni ikkar-dd cciṭan x Israil uca iɣarren Dawud ḥima ad iḥseb Israil. 2 Dawud inna i Yuwab u i imgewwaden n řgens: “Uyurem, ḥesbem Israil zi Bi’r-Sebɛa ař Dan uca awyem ayi-dd mecḥař, maḥend ad ssneɣ mecḥař idsen.” 3 Xenni inna Yuwab: “Iři ad yarni SIDI di řgens nnes am iǧa řexxu ɛad mya n tseqqar. Ma war ǧin marra, a sidi inu ajeǧid, d imsexxaren n sidi inu? Mayemmi i zzayi ittraja sidi inu man aya? Mayemmi i ɣa issarbu Israil s umarwas?” 4 Maca awař n ujeǧid ijhed x Yuwab u Yuwab iffeɣ. Ikka marra Israil uca iɛqeb-dd ɣar Urcalim. 5 Yuwab iwca i Dawud řqedd n řeḥsab n řgens am ikmeř. Marra Israil dayes milyun u-mya-ařef n yeryazen inni izemmaren x ssif u Yahuda dayes arebɛa-mya u-sebɛin-ařef n yeryazen nni izemmaren x ssif. 6 Maca ayt n Lawi d Binyamin war ten iḥsib ca, maɣar awař n ujeǧid tuɣa d aɛiffi i Yuwab.

7 Tamesřact-a tuɣa d taɛeffant di tiṭṭawin n AREBBI uca Netta iwta Israil. 8 Xenni inna Dawud i AREBBI: “Necc xḍiɣ xak aṭṭas, s minzi necc ggiɣ aya. Xenni řexxu, kkes řmuɛṣiyyet x umsexxar nnek, minzi necc ggiɣ s tubbuheřya aṭṭas.” 9 Issiweř SIDI ɣar Jad, amwařaw n Dawud, inna:

10 “Uyur, siweř ɣar Dawud, ini: ‘Ammu i iqqar SIDI: Ad ac dd-ssarseɣ třata n tmesřayin. Ixḍar ict zzaysent i cek. Ad ac tt ggeɣ.’ ”

11 Jad yusa-dd ɣar Dawud, inna as: ‘Ammu i iqqar SIDI: ‘Ixḍar cek:

12 Třata n iseggʷusa n řaẓ, niɣ třata n iyuren i di i ɣa tᵉttwahellked zzat i wudem n yinni cek iḥṣaren u ssif n řɛedyan nnek ad cek iḍfar, niɣ třata n wussan n ssif n SIDI, aqa-t d ṭṭaɛun di temmurt u Lmalak n SIDI ad iḍeyyeɛ marra tammurt n Israil? Xenni řexxu, xzar, mammec i ɣa yarreɣ x wenni d ayi dd-issekken.’ ”

13 Xenni inna Dawud i Jad: “Necc ttwaḥṣareɣ aṭṭas. Ejj ayi ad wḍiɣ deg ufus n SIDI, maɣar arreḥmet nnes d tameqqrant aṭṭas, war ttegg ad wḍiɣ deg ufus n bnadem.”

14 Uca issiweḍ SIDI ṭṭaɛun x Israil uca wḍan di Israil sebɛin-ařef n yeryazen.

15 Issekk AREBBI Lmalak ɣar Urcalim ḥima ad t iḍeyyeɛ u umi ibda netta ad t iḍeyyeɛ, iẓra i-t SIDI uca indem x tuɛeffna uca netta inna i lmalak n uḍeyyeɛ: “Cfa, sehwa řexxu afus nnek!” Tuɣa Lmalak n SIDI ibedd ɣar unedrar n Uyabusi Urnan.

16 Umi issgeɛɛed Dawud tiṭṭawin nnes, iẓra Lmalak n SIDI ibedd jar temmurt d ujenna am iṭṭef ufus nnes ssif isswiẓẓeḍ i-t x Urcalim. Xenni iwḍa Dawud d imeqqranen n řgens, am tuɣa řeḥḥfen s txuncay n wecḍan, s uɣembub nsen ɣar temmurt.

17 Uca inna Dawud i AREBBI: “Ma war iǧi d necc i innan aqa ittxeṣṣa ad ḥesben řgens? Wah, d necc i tuɣa ixḍan u iggin řmuɛṣiyyet aṭṭas, maca uǧi aya, min ggint? A SIDI, AREBBI inu, ejj ad yiři ufus nnek i tecti ɣari u ɣar taddart n baba, war iǧi maca ɣar řgens nnek.”

18 Xenni inna Lmalak n SIDI i Jad, ad yini i Dawud belli ittxeṣṣa i Dawud ad igeɛɛed ḥima ad issbedd ijj n uɛalṭar i SIDI x unedrar n Uyabusi Arnan.

19 Uca Dawud igeɛɛed ɛlaḥsab awař n Jad nni issiweř s Yisem n SIDI.

20 Uca inneqřeb-dd Arnan, iẓra Lmalak. Arebɛa n iḥenjiren nnes i tuɣa ɣares iǧan, nnuffaren. Urnan tuɣa issarwat irden.

21 Yiweḍ Dawud ɣar Arnan uca issgeɛɛed Arnan tiṭṭawin, iẓra Dawud. Xenni iffeɣ-dd zeg unedrar uca yuḍar zzat i Dawud s uɣembub nnes ɣar temmurt. 22 Inna Dawud i Arnan: “Ewc ayi andrar ḥima ad xas bniɣ ijj n uɛalṭar i SIDI. Ewc ayi amcan s ttaman nnes imun, ḥima ad ibedd ticti aya di řgens.” 23 Arnan inna i Dawud: “Ksi t i cek uca ad yegg sidi inu ajeǧid min iǧan d aṣebḥan di tiṭṭawin nnes. Xzar, ad wceɣ ifunasen-a am tɣarṣa n wecmaḍ d teřwiḥin itteḥřuǧuḍen i usarwet d ukeccuḍ i tmessi d irden i tewhibt n řɣiǧet. Necc ad wceɣ aya marra.” 24 Maca inna ujeǧid Dawud i Arnan: “Lla, necc xseɣ nican ad t sɣeɣ s ttaman nnes ikmeř, minzi min iǧan nnek war t kessiɣ i SIDI, ḥima ammu i ɣa wehhbeɣ taɣarṣt n wecmaḍ i SIDI i d ɣa inqamen baṭeř.” 25 Ammu i iwca Dawud i Arnan i wemcan nni iciqlen n wureɣ s yijj n řewzen n setta-mya n iciqlen. 26 Dawud issbedd dinni ijj n uɛalṭar i SIDI uca yiwi xas tiɣarṣa n wecmaḍ d tewhibin n řɣiǧet. Netta iřaɣa i SIDI u wanita yarra-dd xas s tmessi zeg ujenna x uɛalṭar n wecmaḍ. 27 Inna SIDI i Lmalak ad yarr ssif deg ufurru n weɣřaf nnes.

28 Di řweqt nni, umi iẓra Dawud aqa SIDI yarra-dd xas x unedrar n Uyabusi Arnan, yiwi din tiɣarṣa. 29 Di řweqt nni tuɣa Tazeddiɣt n SIDI, tenni tuɣa igga Musa di řexřa, d uɛalṭar i tɣarṣa n wecmaḍ x řgeɛɛdet n Jibɛun. 30 Dawud maca war izemmar ad din yuyur ḥima ad yarzu x AREBBI, maɣar tuɣa teřqef i-t tiggʷudi zi ssif n Lmalak n SIDI.