1 Ɣar uqeṭṭu n useggʷas n jdid, di řweqt i dd itteffɣen ijeǧiden ɣar umenɣi, imsar aqa Yuwab igewwed řɛeskar. Yareddeǧ tammurt n ayt n Ɛammun uca inneḍ i Rabba, iḥṣar i-tt, mintřa Dawud iqqim di Urcalim. Yuwab iɣřeb x Rabba uca iteḥḥa i-tt. 2 Dawud ikkes ttaj n ujeǧid x uzeǧif nnes, uca yufa řewzen nnes d ict n talint n wureɣ u tuɣa xas tayaqutin iɣřan. Ittwassars ttaj x uzeǧif n Dawud. Netta yiwi-dd ɛawed takeccaḍt d tameqqrant aṭṭas zi tendint. 3 Řgens nni dayes iǧan, issuffeɣ i-t uca isseẓẓeř i-ten sadu řmencarat u sadu iyařzimen n wuzzař u sadu ccwaqar n wuzzař. Ammu i igga Dawud ak-d marra tineddam n ayt n Ɛammun. Xenni iɛqeb Dawud d marra řgens ɣar Urcalim.

4 Awarni as imsar, aqa ikkar ɛawed umenɣi ak-d Ifilisṭiniyyen di Jazar. Řexdenni iɣřeb Sabkay, Aḥucayi, x Saffay, wenni d ijj zeg iḥenjiren n Rafa, uca ttwaswaḍɛen nitni.

5 Tuɣa din ɛawed amenɣi ak-d Ifilisṭiniyyen. Ilḥanan, mmis n Yaɛir, iɣřeb x Laḥmi, umas n Juliyat, zi Jat. Akeccuḍ n lansa nnes igga am ijj n weɛmuḍ n ukeccuḍ n uxeyyeḍ. 6 Uca ikkar ɛawed umenɣi di Jat. Tuɣa din ijj n weryaz d azirar, s setta n iḍewḍan deg ifassen nnes u setta n tfednin deg iḍaren nnes, marra řqedd nsen arebɛa u-ɛicrin. Uřa d netta ittwaxřeq-dd i Rafa. 7 Netta isstehza zi Israil, maca Yunatan, mmis n Cimɛa, umas n Dawud, iɣřeb xas. 8 Ina ttwaxeřqen-dd i Rafa di Jat u nitni wḍan s ufus n Dawud u s ufus n imsexxaren nnes.