1 Awarni aya imsar, aqa Naḥac, ajeǧid n ayt n Ɛammun, immut. Mmis idweř d ajeǧid deg wemcan nnes. 2 Xenni inna Dawud: “Necc xseɣ ad ssecneɣ tamexsiwt icewwaren i Ḥanun, mmis n Naḥac, am mammec d ayi isscen babas tamexsiwt icewwaren.” Dawud issekk ireqqasen ḥima ad t iɛezza x řmewt n babas uca iwḍen imsexxaren n Dawud ɣar temmurt n ayt n Ɛammun. 3 Xenni nnan řḥukkam n ayt n Ɛammun i sidi nsen Ḥanun: “Ma ixs Dawud ad iweqqar babac s tidett di tiṭṭawin nnek, minzi issekk-dd inni cek i ɣa iɛezzan? Maɣar war dd-issekk Dawud imsexxaren nnes ɣarek, ḥima ad arzun di temmurt maḥend ad tt ssenqeřben u ad tt bergagen?” 4 Xenni iṭṭef Ḥanun imsexxaren n Dawud uca iḥeff asen azyen zi tmart uca iqess asen azyen n warruḍ ař ḍeffar uca issekk i-ten. 5 Nitni ṭṭfen abrid uca ḥajan ireqqasen x yeryazen-a i Dawud. S uyenni d asen issekk, minzi nitni tuɣa ttseḍḥan aṭṭas. Inna ujeǧid: “Qqimem di Ariḥa ař d i ɣa temɣar tmart nwem, xenni ad dd-tdewřem.”

6 Umi ẓrin ayt n Ɛammun belli nitni tuɣa ssarzgen ixef nsen ɣar Dawud, issekk Hanun ak-d ayt n Ɛammun ařef n talintat n nnuqart ḥima ad cran i yixef nsen ikarruten d imnayen zi Misibutamya, zi Aram-Maɛka u zi Ṣuba. 7 Nitni cran i yixef nsen tnayen u-třatin-ařef n ikarruten n umenɣi u cran ɛawed ajeǧid n Maɛka d řgens nnes. Nitni usin-dd uca wtin iqiḍan nsen zzat i wudem n tendint n Maydaba. Uřa d ayt n Ɛammun nyarwen zi tneddam nsen uca ffɣen ɣar umenɣi. 8 Umi isřa Dawud aya, issekk Yuwab s marra řɛeskar nnes, ayt n bu-teɣruḍt. 9 Ffɣen uřa d ayt n Ɛammun uca sedden ixef nsen i umenɣi ɣar wadaf n tendint, u ijeǧiden nni dd-usin, tuɣa aten s yixef nsen deg iyyar.

10 Umi iẓra Yuwab, aqa amenɣi řa zeg urendad uřa zi ḍeffar n uɣembub nnes, ixḍar zi marra inni ittwafarzen di řɛeskar n Israil uca issbedd i-ten i umenɣi ajemmaḍ n Iramiyyen.

11 Min iqqimen n řgens igga i-ten sadu i ufus n umas Abicay u nitni ssbedden ixef nsen ajemmaḍ n ayt n Ɛammun.

12 Inna netta: “Mařa Aram ijhed xafi, xenni as-dd, ewc ayi afus! Mařa ayt n Ɛammun jehden xak, xenni ad dd-aseɣ ad cek fekkeɣ.

13 Iři d aryaz u ejj aneɣ ad niři nemḥeḍ di ṭṭweɛ n řgens nneɣ u di ṭṭweɛ n tneddam n AREBBI. Iři ad igg SIDI min iǧan mliḥ di tiṭṭawin nnes.”

14 Xenni iqarreb-dd Yuwab d řgens i ɣares iǧan ař zzat i wudem n Aram i umenɣi uca Iramiyyen ṭṭfen di tarewřa zzat i wudem nnes.

15 Umi ẓrin ayt n Ɛammun, aqa Iramiyyen arewřen, ṭṭfen uřa d nitni di tarewřa zzat i wudem n umas Abicay uca ɛeqben ɣar tendint. Xenni yiweḍ Yuwab ɣar Urcalim.

16 Umi iẓra Aram aqa nitni ɣellben xas zzat i wudem n Israil, ssekken nitni ireqqasen uca ggin af ffɣen Iramiyyen inni tuɣa izeddɣen x ujemmaḍ n yeɣzar n Lfuraṭ, u Cubak, akumandar n řɛeskar n Hadad-Ɛazar yuyur zzat i uɣembub nsen.

17 Umi nnan aya i Dawud, issmun netta marra Israil, iẓwa L'Urdun, yusa-dd ɣarsen uca isedd ixef nnes i umenɣi. Umi isedd Dawud ixef nnes i umenɣi ak-d Iramiyyen, mmenɣen nitni akides.

18 Iramiyyen arewřen zzat i wudem n Israil uca iqḍa Dawud x sebɛa-ařaf n yenni ineddhen ikarruten n umenɣi d arebɛin-ařef n yerazen x iḍaren zeg Iramiyyen. Ɛawed inɣa Cubak, akumandar n řɛeskar nsen.

19 Umi ẓrin marra imsexxaren n Hadad-Ɛazar, aqa ɣellben xasen zzat i wudem n ayt n Israil, ggin nitni řehna ak-d Israil uca sexxaren as. War dd-yusi di řeɛqeř ɣar Iramiyyen ɛad ad fekken ayt n Ɛammun ict n twařa nneɣnit.