Iɣellaben n Dawud
18
1 Awarni i aya imsar, aqa Dawud iɣřeb x Ifilisṭiniyyen uca yarra i-ten sadu nnes. Netta ikkes Jat d tneddam i ɣares dd-iqqnen zeg ufus n Ifilisṭiniyyen. 2 Iɣřeb uřa x ayt n Mu’ab ařami ayt n Mu’ab dewřen d imsexxaren i Dawud, inni ittxeṣṣan ad wcen tirzifin. 3 Dawud iɣřeb ɛawed x Hadad-Ɛazar, ajeǧid n Ṣuba, ɣares ař Ḥamat, umi tuɣa dd-iffeɣ wanita ḥima ad issemtem řeḥkamet nnes ɣar yeɣzar n Lfuraṭ. □ 4 Dawud ikkes zzayes ařef n ikarruten d sebɛa-ařaf n imnayen d ɛicrin-ařef n yeryazen x iḍaren u Dawud iqess iḍaren n marra iysan n ikarruten uca ijja zzayes mya n iysan n ikarruten waha.
5 Yusa-dd Aram zi Dimacq ḥima ad iwc afus i Hadar-Ɛazar, ajeǧid n Ṣuba, maca Dawud iɣřeb x tnayen u-ɛicrin-ařef n yeryazen n Aram. 6 Dawud igga řɛeskarat n uḥewwes jar Iramiyyen n Dimacq, u Iramiyyen dewřen d imsexxaren n Dawud inni ittxeṣṣan ad as wcen tirzifin. SIDI igga ttasiɛ i Dawud mani ma iruḥ wanita. 7 Dawud yiwi tiseddariyin n uɛeskari iqesḥen i ttwaggent s wureɣ nni tuɣa iǧan n imsexxaren n Hadad-Ɛazar u yiwyi tent ɣar Urcalim. 8 Dawud iksi aṭṭas n nnḥas zi Ṭabḥat d Xun, tineddam n Hadad-Ɛazar. Zzayes igga Suliman tarimant tameqqrant n nnḥas d ipilaren d řeqcuɛ n nnḥas. □
9 Umi Tuɛi, ajeǧid n Ḥamat, isřa aqa Dawud iɣřeb x marra řɛeskar n Hadad-Ɛazar, ajeǧid n Ṣuba,
10 issekk netta mmis Haduram ɣar ujeǧid Dawud ḥima ad isseqsa x umeddur nnes u ḥima ad as ibarek, minzi netta imneɣ ak-d Hadad-Ɛazar uca iɣřeb xas - maɣar Hadad-Ɛazar tuɣa i Tuɛi d ijj n weryaz yarezzu amenɣi řebda - u netta yiwi akides ɛřam kuř řeqcuɛ n wureɣ u n nnuqart uřa n nnḥas.
11 Ajeǧid Dawud issqeddes i-ten i SIDI, jmiɛ ak-d nnuqart d wureɣ i d yiwi zi marra řegnus, zi Idum, zi Mu’ab, n ayt n Ɛammun, n Ifilisṭiniyyen u n ayt n Ɛamaliq.
12 Abicay, mmis n Ṣarawya, iɣřeb x Idum di teɣzurt n Tameǧaḥt, tmenṭac-ařef n yeryazen.
13 Netta igga řɛeskarat n uḥewwes di Idum ařami marra Idumiyyen dewřen d imsexxaren i Dawud u SIDI igga ttasiɛ i Dawud mani ma iffeɣ netta.
Imdebbaren imeqqranen n Dawud
14 Dawud iḥkem x marra Israil u igga s řḥeqq d tsegda i marra řgens nnes.
15 Yuwab, mmis n Ṣaruya, tuɣa-t x řɛeskar u Yahucafaṭ, mmis n Axilud, tuɣa-t d amarir n umezruy.
16 Ṣaduq, mmis n Axiṭub, d Abimalik, mmis n Abyatar, tuɣa aten d ikehhanen, u Cawca tuɣa-t d amarir.
17 Banaya, mmis n Yahuyadaɛ, tuɣa-t x iɛessasen n arrimet n ujeǧid u x ireqqasen n tazřa. Iḥenjiren n Dawud tuɣa aten d imezwura ɣar ufus n ujeǧid.