1 Umi izdeɣ Dawud di taddart nnes, inna Dawud i unabi Natan: “Xzar, necc zeddɣeɣ deg ict n taddart n ukeccuḍ n tcejjart n tengelt, maca Ttabut n Řɛahd n SIDI aqa-tt di řkettan n Uqiḍun.” 2 Natan yarra-dd x Dawud: “Egg marra min ɣarek deg wuř nnek, maɣar AREBBI akidek.”

3 Di ǧiřet nni imsar aqa yusa-dd wawař n AREBBI ɣar Natan, inna: 4 “Uyur, ini i umsexxar inu Dawud: ‘Ammu i iqqar SIDI: War d ayi tbennid Taddart i Necc ḥima ad dayes zedɣeɣ, 5 maɣar zeg wass umi dd-ssgeɛɛdeɣ Israil zi Miṣra, Necc war zdiɣeɣ ɛemmarṣ deg ict n taddart. Maca Necc tuɣa ggureɣ zeg uqiḍun ɣar uqiḍun, zi tzeddiɣt ɣar tzeddiɣt. 6 Mani ma uyureɣ ak-d marra Israil, ma Necc ssiwřeɣ ɛemmarṣ uřa s ijj n wawař ak-d ijjen zi řquḍat n Israil, inni tuɣa ggiɣ ad arewsen řgens inu Israil, nniɣ: ‘Mayemmi kenniw war d ayi tbennim ca taddart s ukeccuḍ n tcejjart n tengelt?’ ”

7 Xenni řexxu, ammu i ɣa tinid i umsexxar inu, i Dawud: “Ammu i iqqar SIDI n řɛeskarat ijehden: ‘Necc iwyeɣ-dd cek zi řkuri, zi ḍeffar n wuǧi, maḥend ad tdewřed d amgewwed x řgens inu Israil. 8 Mani ma tuyured, tuɣa ayi akidek u Necc teḥḥiɣ marra řɛedyan zzat i tiṭṭawin nnek u Necc ggiɣ ac ijj n yisem am yisem n imeqqranen x temmurt. 9 Necc neyyceɣ ijj n wemcan i řgens inu uca ẓẓuɣ t din maḥend ad izdeɣ deg wemcan nnes u war ittwassenhezzi ɛad u war t ḥeṣṣaren ɛad ayt n řmuɛṣiyyet, am deg umezwaru,

10 zeg wussan umi Necc ggiɣ řquḍat x řgens inu Israil. Necc sswaḍɛeɣ marra řɛedyan nnek u ssargbeɣ cek belli SIDI ad ac ibna ict n taddart.

11 X minni i ɣa qefřen wussan nnek u ad tᵉttwasarsed deg wenḍeř ak-d řejdud nnek, ad imsar, Necc ad ssekkareɣ mmic awarni ac, wenni i ɣa iffɣen zeg iḥenjiren nnek, u Necc ad ssmetneɣ Tageldit nnes. ^□  

12 Netta ad ayi ibna ict n Taddart u Necc ad ssbeddeɣ řɛarc nnes i řebda.

13 Necc ad iřiɣ d Babas i netta u netta ad ayi yiři d Mmi u Necc war xas ssḥeyyideɣ ca tamexsiwt inu icewwaren am mammec tt sḥeyydeɣ x wenni tuɣa d ac izwaren.

14 Necc ad t ssmetneɣ di Taddart inu u di Tgeldit inu i řebda u řɛarc nnes ad ibedd imten i řebda.’ ”

15 Issiweř Natan ak-d Dawud nican am mammec marra awařen-a u am mammec marra tameẓriwt-a.

16 Xenni yudef ujeǧid Dawud uca iqqim zzat i wudem n SIDI, inna: “Min ɛniɣ necc, SIDI AREBBI, u min teɛna taddart inu aqa cek tnedhed ayi-dd ař danita?

17 Di tiṭṭawin nnek tuɣa man aya drus waha, a AREBBI, u řexxu tessiwřed ɛad x taddart n umsexxar nnek deg ijj n yimar iggʷej u txezzared dayi am ijj n ufiřu n iḥenjiren n bnadem i dd-ittawyen ɣar sennej, a SIDI, AREBBI!

18 Min d ac i ɣa yini Dawud ɛad ktar x ccenɛet i tessecned i umsexxar nnek? Aqa Cek tessned amsexxar nnek!

19 A SIDI, aqa teggid marra řemɣaret-a di ṭṭweɛ n umsexxar nnek u ɛlaḥsab uř nnek, ḥima ad tessargbed ammu marra timesřayin-a timeqqranin. 20 A SIDI, uřa d ijj war iǧi am Cek. War din AREBBI mɣir Cek, s marra min nesřa s imezzuɣen nneɣ. 21 Man wen i iǧan am řgens nnek Israil, ayenni n řgens i iǧan x temmurt i ɣar iřaḥ AREBBI ḥima ad t ifdi i yixef nnes d řgens ḥima ad igg i yixef nnes Isem s tmegga timeqqranin d issiggʷden u ḥima ad yaẓẓeř x řegnus zzat i wudem n řgens nnek, wenni tefdid zi Miṣra? ^□   22 Cek teggid řgens nnek Israil d ijj n řgens i yixef nnek i řebda. Cek, a SIDI, aqa Cek tdewřed d AREBBI i nitni.

23 Xenni řexxu, a SIDI AREBBI, ejj awař nni tessiwřed x umsexxar nnek u x taddart nnes ad ibedd i řebda u egg am mammec tessiwřed. 24 Ejj Isem nnek ad ittwassemɣar i řebda umi ɣa inin: ‘SIDI n řɛeskarat ijehden, AREBBI n Israil, aqa-t d AREBBI x Israil’ uca iři ad tᵉttwasemten taddart n umsexxar nnek Dawud zzat i wudem nnek. 25 Maɣar cek, AREBBI inu, tessargbed deg imezzuɣen n umsexxar nnek aqa Cek ad as tebnid ict n taddart. S uyenni tusa-dd i umsexxar nnek deg wuř ḥima ad iẓẓaǧ zzat i wudem nnek. 26 Xenni řexxu, a SIDI, Cek d AREBBI nni u Cek tessiwřed s marra tcuni aya x umsexxar nnek. 27 Xenni řexxu, aqa yarḍa i Cek ad tbarked taddart n umsexxar nnek ḥima ad tiři zzat i wudem nnek i řebda. Minzi Cek, a SIDI, tbarked tt uca ad tᵉttwabarek i řebda.”