1 Nitni ssidfen Ttabut n AREBBI ɣar daxeř uca ssarsen tt di řwest n Uqiḍun nni tuɣa d as dd-icedd Dawud uca Dawud iqeddem tiɣarṣa n wecmaḍ d tiɣarṣa n řehna zzat i wudem n AREBBI. 2 Umi Ikemmeř Dawud aqeddem n tɣarṣt n wecmaḍ d tɣarṣa n řehna, ibarek řgens deg Yisem n SIDI. 3 Netta ibḍa i marra di Israil, i yeryazen d temɣarin, i kuř ijj ijj n wengur n weɣrum, ijj n uceǧiq n weysum n ufunas d ijj n wareqqiɛ n zzbib. 4 Netta igga ca n Ilawiyyen d imsexxaren i Ttabut n SIDI u ḥima ad ssɛeqřen u ad qadan u ad ssemɣaren SIDI, AREBBI n Israil. 5 Asaf tuɣa-t d azeǧif d Zakariyya tuɣa-t d wiss tnayen awarni as u xenni Yaɛiyil, Camiramut, Yaḥiyil, Mattitya, Iliyab, Banaya, Ɛubid-Idum d Yaɛiyil s dduzanat am lharpat d řgambriyat uca Asaf igga ad as sřen s teǧunin n wuzzař. 6 Ikehhanen Banaya d Yaḥziyil uyuren s řɣayṭat zzat i Ttabut n Řɛahd n AREBBI.

7 Deg wass nni igga Dawud i twařa tamezwarut x Asaf d aytmas maḥend ad ssemɣaren SIDI.

8 “Qadam SIDI, řaɣam x Yisem nnes,

barrḥem s tmegga nnes jar řegnus.

9 Ɣennjem as, zehhdem i Netta,

siwřem x marra lmuɛjizat nnes.

10 Cennɛem s Yisem nnes amqeddes,

ḥima uř n yinni yarezzun SIDI, ad ifarḥ.

11 Seqsam x SIDI d jjehd nnes,

arzum udem nnes řebda.

12 Ɛeqřem x řeɛjayeb nnes i igga,

x řeɛřamet nnes u di řeḥkamat n uqemmum nnes.

13 Zzariɛet n Israil, amsexxar nnes,

ayt n Yaɛqub, inni zzayes ittwafarzen!

14 Netta d SIDI, AREBBI nneɣ.

Řeḥkamat nnes i dd-ittasen x marra tammurt.

15 Ɛeqřem x Řɛahd nnes i řebda,

awař nni i iweṣṣa i ařef n řecyur,

16 řɛahd i igga ak-d Ibrahim,

issemten i-t s tjaǧit nnes i Isḥaq.

17 Netta igga i-t d ict n tewṣeyyet i Yaɛqub,

i Israil igga i-t d ijj n Řɛahd i řebda

18 umi inna: “Ad ac wceɣ tammurt n Kenɛan,

tasɣart i d awem dd-ikkaren!”,

19 umi kenniw tuɣa d ijj n wuru n yeryazen, s drust waha,

d ibarraniyyen di temmurt.

20 Telɛen zi řgens ɣar řgens nneɣni,

zeg ict n tgeldit ɣar ijj n řgens nneɣni.

21 Netta war ijji uřa d ijj ad ten iḥṣar,

u Netta iɛaqeb ijeǧiden di ṭṭweɛ nsen.

22 ‘War ttḥadam ca imedhan inu,

u war tteggem řɣar deg inabiyyen inu!’

23 Ɣennjem i SIDI, marra tammurt,

barrḥem i usenjem nnes ass x wass.

24 Ḥajam aɛuǧi nnes jar řegnus,

řeɛjayeb nnes jar marra řegnus.

25 Maɣar SIDI d ameqqran, issdaḥeǧ asemɣar aṭṭas,

Netta d amaggʷed mahu marra irebbiten.

26 Minzi marra irebbiten n řegnus aqa aten d l’aṣnam,

maca SIDI igga ijenwan.

27 Tissiqt d řɛezz aqa aten zzat i wudem nnes,

jjehd d řefraḥet deg wemcan nnes.

28 Wcem i SIDI, a tiqebbař n řegnus,

wcem i SIDI aɛuǧi d jjehd.

29 Wcem i SIDI aɛuǧi n Yisem nnes,

awyem tawhibt uca asem-dd zzat i wudem nnes,

sejdem i SIDI s ucewwar iqeddsen.

30 Arjijjem zzat i wudem nnes, a marra tammurt!

Nican, řexxu ddunect tbedd temten, war ttenhezzi ɛad.

31 Ejj ajenna ad ifarḥ u tammurt ad tfarḥ,

ad inin jar řegnus:

SIDI iḥekkem.

32 Ejj ad izhar řebḥar d uɛemmar nnes,

ejj ad isřiwřew yeyyar s řefraḥet,

s marra min dayes.

33 Xenni ad sřiwřiwent marra ticejjura n wezɣar zzat i wudem n SIDI,

maɣar Netta ad dd-yas, ḥima ad isegged tammurt. ^□  

34 Qadam SIDI, maɣar Netta iṣbeḥ,

maɣar tamexsiwt nnes icewwaren tᵉttɣima i řebda.

35 Inim: Senjem aneɣ, a AREBBI n usenjem nneɣ,

ndeh aneɣ nmun, senjem aneɣ zi řegnus,

ḥima ad nqada Isem amqeddas nnek

u ad Cek nṣebbeḥ s izřan n uṣebbeḥ.

36 Ad ittwabarek SIDI, AREBBI n Israil,

zi řebda ař řebda!”

U marra řgens inna: “Amin!” uca imdeḥ SIDI.

37 Netta igga din, zzat i wudem n Ttabut n SIDI, i Asaf d yaytmas ḥima ad sexxaren řebda zzat i wudem n Ttabut, ḥima ad ggen kuř ass min yurin i wass nni. 38 Ɛubid-Idum, ... ak-d aytmatsen, tuɣa aten jmiɛ tmenya u-settin n yeryazen. Ɛubid-Idum, mmis n Yaditun, d Ḥusa tuɣa aten d iɛessasen n tiwwura, 39 uca akehhan Ṣaduq d yaytmas, ikehhanen, tuɣa ttsexxaren zzat i Tzeddiɣt n SIDI x řgeɛɛdet nni iǧan ɣar Jibɛun, 40 ḥima ad awyen tiɣarṣa n wecmaḍ břa aqeṭṭu i SIDI x uɛalṭar n wecmaḍ, ɣar tuffut u ɣar tmeddit, am mammec marra min yuran di Ccariɛa n SIDI, tenni igga d tewṣeyyet i Israil. 41 Ɣarsen tuɣa Hayman d Yadutun ak-d inneɣni inni ittwafarzen u ittwaggen s yismawen nsen ḥima ad qadan SIDI: ‘Maɣar tamexsiwt nnes icewwaren tᵉttɣima i řebda!’ 42 Tuɣa ɣar Hayman d Yadutun d wenneɣni řɣayṭat d taǧunin n wuzzař maḥend ad ggen ad asen sřen yewdan, uřa d dduzanat n lmusiqa inneɣni i usemɣar n AREBBI. Arrawen n Yadutun tuɣa bedden ɣar tewwart n wadaf.

43 Xenni yuyur marra řgens, kuř ijj ɣar taddart nnes. Uřa d Dawud iɛqeb ɣar taddart nnes ḥima ad ibarek taddart nnes.