1 Dawud igga i yixef nnes tudrin di tendint n Dawud u netta igga ɛawed ijj n wemcan i Ttabut n AREBBI uca issbedd as ijj n uqiḍun. 2 Xenni inna Dawud: “Uřa d ijjen war izemmar ad yarbu Ttabut n AREBBI mɣir Ilawiyyen waha, maɣar SIDI ifarz i-ten ḥima ad arbun Ttabut n AREBBI u ḥima ad as sexxaren i řebda.” 3 Dawud issmun-dd marra Israil ɣar Urcalim ḥima ad ssgeɛɛden Ttabut n SIDI ɣar wemcan nnes nni tuɣa d as igga.

4 Dawud issmun uřa d iḥenjiren n Harun d Ilawiyyen.

5 Zeg iḥenjiren n Qahat tuɣa Uriyil d řqebṭan nsen. Aytmas tuɣa aten di mya u-ɛicrin.

6 Zeg iḥenjiren n Marari tuɣa Ɛasaya d řqebṭan nsen. Aytmas tuɣa aten di mitayen u-ɛicrin.

7 Zeg iḥenjiren n Jarcum tuɣa Yuwil d řqebṭan nsen. Aytmas tuɣa aten di mya u-třatin.

8 Zeg iḥenjiren n Iliṣafan tuɣa Cmaɛya d řqebṭan nsen. Aytmas tuɣa aten di mitayen.

9 Zeg iḥenjiren n Ḥabrun tuɣa Iliyil d řqebṭan nsen. Aytmas tuɣa aten di tmenyin.

10 Zeg iḥenjiren n Ɛuzziyil tuɣa Ɛamminadab d řqebṭan nsen. Aytmas tuɣa aten di mya u-tenɛac n yeryazen.

11 Dawud iřaɣa i ikehhanen Ṣaduq d Abyatar uřa i Ilawiyyen Uriyil, Ɛasaya, Yuwil, Cmaɛya, Iliyil d Ɛamminab.

12 Netta inna asen: “Kenniw d izeǧifen n ibabaten n řaǧat n Ilawiyyen. Sqeddsem ixef nwem, kenniw d aytmatwem, ḥima ad tessgeɛɛdem Ttabut n SIDI, AREBBI n Israil ɣar wemcan nni d as sswejdeɣ.

13 Minzi kenniw war teggim aya twařa tamezwarut, aqa SIDI, AREBBI nneɣ, isɛar xaneɣ, minzi war xas narzu ɛlaḥsab lfariḍa.

14 Ikehhanen d Ilawiyyen ssqeddsen ixef nsen ḥima ad ssgeɛɛden Ttabut n SIDI, AREBBI n Israil.

15 Ayt n Lawi arbun Ttabut n AREBBI x tɣarḍin nsen, am mammec t yumur Musa ɛlaḥsab awař n SIDI, u iɛumad n trebbut tuɣa xasen mmarsen.

16 Dawud inna i řqebṭanat n Ilawiyyen, aqa ad ssbedden aytmatsen, imedyazen ak-d dduzan n ǧɣa, ak-d lharpat, ak-d řgambriyat u ak-d taǧunin n wuzzař, maḥend ad ittwaseř řḥess issefraḥen ijhed.

17 Nitni ssbedden Hayman, mmis n Yuwil, u zeg aytmas: Asaf, mmis n Baraxya, u zeg ayt n Marari, umatsen, Itan, mmis n Qucaya,

18 u akidsen aytmatsen di dduq n tɛessast wiss tnayen: Zakariyya, Bin, Yaɛziyil, Camiramut, Yaḥiyil, Ɛunni, Iliyab, Banaya, Maɛasya, Mattitya, Ilifalya, Maqniya, Ɛubid-Idum d Yaɛiyil, nitni tuɣa aten d iɛessasen n tewwart.

19 Imedyazen tuɣa aten d Hayman d Asaf d Itan ak-d teǧunin n nnḥas ḥima ad tent jjen ad ddendunen, 20 u Zakariyya d Ɛuzziyil d Camiramut d Yaḥiyil d Ɛunni d Iliyab d Maɛasya d Banaya ak-d lharpat ittwarriglan ɣar sennej, 21 d Mattitya d Ilifalya d Maqniya d Ɛubid-Idum d Yaɛiyil d Ɛazazya ak-d řgambriyat di řmeftaḥ tmenya ḥima ad ssuyuren izřan. 22 Kananya, řqebṭan n Ilawiyyen, tuɣa-t x llɣa. Netta isseřmed asen lmusiqa, maɣar netta issen as. 23 Baraxya d Ilqana tuɣa aten d iɛessasen n tewwart ɣar Ttabut. 24 Ikehhanen Cabanya d Yahucafaṭ d Natanayil d Ɛamasay d Zakariyya d Banaja d Iliɛazar ṣuḍen di řɣayṭat zzat i Ttabut n AREBBI u Ɛubid-Idum d Yaḥiya tuɣa aten d iɛessasen n tewwart ɣar Ttabut.

25 Ammu i imsar, aqa Dawud d imeqqranen n Israil d řqebṭanat x wařef ṭṭfen abrid ḥima ad ssgeɛɛden Ttabut n Řɛahd n SIDI s řefraḥet zi taddart n Ɛubid-Idum. 26 Řami arbun Ilawiyyen Ttabut n Řɛahd n SIDI am d asen iwca AREBBI afus, imsar aqa nitni qeddmen sebɛa n iyenduzen d sebɛa n icarriyyen d taɣarṣt. 27 Dawud tuɣa yarḍ ijj n useřham n řeqṭen azdad, uřa marra Ilawiyyen, inni yarbun Ttabut d yenni tuɣa ittɣennajen, d Kananya, ameḥḍayi x yenni ittɣennajen. Dawud yarḍ uřa d netta ijj n upalṭu n ukehhan n řeqṭen. 28 Ammu i issgeɛɛed marra Israil Ttabut n Řɛahd n SIDI s iɣuyyan n řefraḥet u s uṣuḍi deg uyicc n icarri, s wesruddeḥ n řɣayṭat u s řḥess n taǧunin n wuzzař, u nitni tuɣa ttiraren s lharpat d řgambriyat. 29 Řami dd-tiweḍ Ttabut n Řɛahd n SIDI ɣar tendint n Dawud, imsar, aqa Mixal, yeǧis n Cawul, texzar zi řkazi uca teẓra mammec ineggez u mammec iceṭṭeḥ ujeǧid Dawud uca tesseḥqar i-t deg wuř nnes.