1 Ḥiram, ajeǧid n Ṣur, issekk ireqqasen ɣar Dawud uřa d tcejjura n tengelt d ineqqacen n weẓru n řḥiḍ d ineqqacen n ukeccuḍ. Nitni ssbedden as ict n taddart. 2 Dawud issen, aqa SIDI tuɣa igga i-t d ajeǧid x Israil u tuɣa issgeɛɛed SIDI tageldit nnes aṭṭas di ṭṭweɛ n řgens nnes Israil.

3 Dawud iksi ɛad timɣarin nneɣnit di Urcalim u Dawud yarni ijja-dd ɛad iḥenjiren d tḥenjirin nneɣni. 4 Ina d ismawen n iḥenjiren i ɣares-dd ittwarwen di Urcalim: Cammuɛ, Cubab, Natan, Suliman, 5 Ibḥar, Ilicuɛ, Ilfalaṭ, 6 Nujah, Nafaj, Yafiɛ 7 Ilicamaɛ, Baɛalyadaɛ d Ilifalaṭ.

8 Umi sřin Ifilisṭiniyyen, aqa dehnen Dawud d ajeǧid x Israil, geɛɛden marra Ifilisṭiniyyen ḥima ad arzun x Dawud. Dawud isřa i man aya uca iffeɣ maḥend ad kidsen imsagar. 9 Usin-dd Ifilisṭiniyyen uca keccḍen di teɣzurt n Irafawiyyen.

10 Xenni isseqsa Dawud AREBBI, inna: “Ma ad geɛɛdeɣ ḍidd i Ifilisṭiniyyen? Ma ad ten tegged deg ufus inu?” Inna as SIDI: “Gaɛɛed, Necc ad ten ggeɣ deg ufus nnek!”

11 Nitni geɛɛden ɣar Baɛl-Faraṣim. Dinni iwta Dawud Ifilisṭiniyyen, inna: “S ufus inu icuqq AREBBI di řɛedyan inu am tareẓẓit n waman.” S uyenni igga as i wemcan nni Baɛl-Faraṣim.

12 Ifilisṭiniyyen jjin irebbiten nsen dinni uca yumur Dawud u nitni sscemḍen ten s tmessi.

13 Ifilisṭiniyyen geɛɛden ɛawed uca bezzɛen ixef nsen di řewḍa n teɣzurt.

14 Dawud isseqsa AREBBI u AREBBI inna as: “War ttgiɛɛid ca awarni asen, maca nneḍ asen-dd, ad ɣarsen dd-tased zeg urendad n tcejjura n umetti.

15 Xmi i ɣa tesřed i tecři n iṣuraf di tqiccat n tcejjura n umetti, xenni ad teffɣed ɣar umenɣi, maɣar xenni ad ac yizwar AREBBI zzat i wudem nnek ḥima ad iwwet řɛeskar n Ifilisṭiniyyen.”

16 Dawud igga am mammec d as yumur AREBBI u nitni wtin řɛeskar n Ifilisṭiniyyen zi Jibɛun ař Jazar.

17 Ammu i iffeɣ isem n Dawud di marra timmura uca SIDI issiweḍ tiggʷudi zzayes x marra řegnus.