1 Dawud imcawar ak-d řqebṭanat x wařef d x mya u ak-d marra imgewwaden. 2 Dawud inna i marra agraw n řgens n Israil: “Mařa yarḍa i kenniw uřa i SIDI, AREBBI nneɣ, ejj aneɣ ad nessekk deɣya ireqqasen ɣar yaytmatneɣ nni iqqimen di marra timmura n Israil u ɣar ikehhanen d Ilawiyyen nni izeddɣen akidsen di tneddam ak-d ddmani nsent n tarewsa, ḥima nitni ad ɣarneɣ nnyarwen 3 u ejj aneɣ ad ɣarneɣ dd-narr Ttabut n AREBBI, maɣar deg wussan n Cawul war akides neřhi. 4 Marra agraw n řgens inna belli ad ggen ammu, maɣar d man aya d ict n tmesřact d taṣebḥant di tiṭṭawin n marra řgens.

5 Dawud issmun marra Israil, zeg yeɣzar n Ciḥur ɣar Miṣra ař mani i ɣa tiwḍed ɣar Ḥamat, ḥima ad ssgeɛɛden Ttabut n AREBBI zi Qaryat-Yaɛarim. 6 Xenni iffeɣ Dawud ak-d marra Israil ɣar Baɛla, ɣar Qaryat-Yaɛarim wenni iǧan di Yahuda ḥima ad ssgeɛɛden Ttabut n AREBBI ssenni. Ttabut n SIDI wenni ittɣiman sennej i ikiruben mani ittwařaɣa x Yisem nnes. ^□   7 Nitni iwyen-dd Ttabut n AREBBI x ijj n ukarru n jdid zi taddart n Abinadab. Ɛuzza d Axiyu nedhen akarru. 8 Dawud d marra Israil ttiraren lmusiqa s marra jjehd nsen zzat i wudem n AREBBI s yezřan d řgambriyat d lharpat d ibendiren d teǧunin n wuzzař d řɣayṭat.

9 Umi dd-iwḍen nitni ɣar unedrar n Kidun, isswiẓẓeḍ Ɛuzza afus nnes, ḥima ad iṭṭef Ttabut minzi nderfen ifunasen.

10 Xas uca yarɣa weɣḍab n SIDI x Ɛuzza uca iwta i-t maɣar wanita isswiẓẓeḍ afus nnes ɣar Ttabut uca immut din zzat i wudem n AREBBI.

11 Yiweḍ ssem ɣar wuř n Dawud, aqa SIDI isɛar ammu x Ɛuzza u igga as i wemcan nni Fariṣ-Ɛuzza ař ass-a.

12 Deg wass nni teřqef Dawud tiggʷudi zi AREBBI, inna: “Mammec i ɣa ggeɣ ad ɣari-dd awyeɣ Ttabut n AREBBI?”

13 X uya Dawud war ijji ad ɣares-dd awyen Ttabut di tendint n Dawud, maca ijja i-tt ad taggʷej ɣar taddart n Ɛubid-Idum, Ajitti.

14 Tekka Ttabut n AREBBI třata n iyuren di taddart nnes ɣar aytbab n taddart n Ɛubid-Idum, u ibarek SIDI taddart n Ɛubid-Idum d marra min ɣares iǧan.