1 Ina i dd-yusin ɣar Dawud ɣar Ṣiqlaɣ, umi tuɣa ittxeṣṣa ɛad ad iqqim Dawud itteggʷej x wudem n Cawul, mmis n Qic. Nitni tuɣa tteqqen i ayt n bu-teɣruḍt inni iwcin afus i Dawud deg umenɣi. 2 Nitni tuɣa ḥezmen s řeqwas u zemmaren ad ḥejjaren s yeẓra u ad wten fřitcat s řqews s ufus afusi u s ufus azeřmaḍ. Nitni tuɣa aten zeg aytmas n Cawul zi Binyamin.

3 Axiɛazar tuɣa d azeǧif nsen, xenni Yuwac, nitni s tnayen idsen d iḥenjiren n Camaɛa, Ajibaɛi,

xenni Yazu’il d Falaṭ, nitni s tnayen idsen d iḥenjiren n Ɛazmut,

u Baraxya d Yahu, zi Ɛanatut,

4 u Yacmaɛya, Ajibɛuni, wenni tuɣa d ijj n bu-teɣruḍt jar třatin u tuɣa x třatin, 5 uřa d Irmiya d Yaḥziyil d Yuḥanan d Yuzabad, Ajadiri,

6 d Ilɛuzay d Yarimut d Baɛliya d Camarya d Cafaṭya, Aḥarufi,

7 d Ilqana d Yaciyahu d Ɛazriyil d Yuɛazar d Yacubɛam, nitni d Iquraḥiyyen,

8 u ɣar uneggar Yuɛila d Zabadya, nitni s tnayen idsen d iḥenjiren n Yaruḥam zi Jadur.

9 Uřa zeg ayt n Jad aqa din inni issebḍan ixef nsen ḥima ad ẓwan ɣar Dawud, di lqelɛa di řexřa. Ayt n bu-teɣruḍt imeḥḍen, iɛeskariyyen wejden i umenɣi, ttwaḥezmen s tseddariyin n uɛeskari timeqqranin u s iḥricen. Udmawen nsen am wudmawen n weyraden u nitni uyuren s tazřa am iɣayḍen n wezɣar x idurar.

10 Ɛazar tuɣa-t d azeǧif,

Ɛubadya d wiss tnayen, Iliyab d wiss třata,

11 Micmanna d wiss arebɛa, Irmiya d wiss xemsa,

12 Ɛattay d wiss setta, Iliyil d wiss sebɛa,

13 Yuḥanan d wiss tmenya, Ilzabad d wiss tesɛa,

14 Irmiya d wiss ɛecra, Maxbanay d wiss ḥiṭac.

15 Ina tuɣa aten zeg iḥenjiren n Jad, řqebṭanat x řɛeskar. Ameẓyan ḥesben t am mya n yeryazen u ameqqran am ařef.

16 Ina d inni iẓwan L'Urdun deg uyur amezwaru, umi isfi L'Urdun barra marra timuwwa nnes u nitni uẓẓřen x marra imezdaɣ n řewḍat n teɣzurt, i iǧan ɣar ccarq d řɣarb.

17 Uřa zeg iḥenjiren n Binyamin u zeg iḥenjiren n Yahuda usin-dd yeryazen ɣar Dawud ɣar lqelɛa n wedrar.

18 Dawud iffeɣ-dd ɣarsen ḥima ad ten iřqa u iṭṭef deg wawař, inna asen: “Mařa kenniw tusim-dd ɣari ḥima ad ayi tewcem afus, xenni necc ad iřiɣ s wuř d ijj akidwem, maca mařa kenniw tusim-dd ḥima ad ayi tsellmen i řɛedyan inu, waxxa war din iǧi řexcunect ɣar ifassen inu, xenni iři ad t iẓar AREBBI n řejdud nneɣ u ad kenniw ixeǧes!”

19 Iwḍa-dd Arruḥ am warruḍ x Ɛamasay, azeǧif n třatin, uca netta inna: “Neccin akidek, Dawud, u neccin akidek, mmis n Yassa. Řehna, řehna ad kidek yiři u řehna ad yiři ak-d yenni d ac iwcin afus, maɣar AREBBI nnek iwca ac afus.” Xenni issidef i-ten Dawud u igga i-ten d izeǧifen x terbiɛin n řɛeskar.

20 Uřa zi Manassa tuɣa din inni iɛdun ɣar Dawud, umi dd-iffeɣ ak-d Ifilisṭiniyyen ɣar umenɣi ak-d Cawul. Ifilisṭiniyyen maca war d asen jjin ad wcen afus, minzi řbacat n Ifilisṭiniyyen ssekken t, nnan: “Zeɛma netta izemmar ad iɛdu s izeǧifen nneɣ deg ufus nnes ɣar Cawul, sides.” 21 Umi dd-iɛqeb ɣar Ṣiqlaɣ, ɛdun ina ɣares zeg ayt n Manassa: Ɛadnaḥ, Yuzabad, Yadiɛil, Mixayil, Yuzabad, Ilihu d Ṣilltay, řqebṭanat x řuruf n Manassa. 22 Nitni wcin afus i Dawud ḥima ad igewwed bandiyya n řɛeskar, maɣar nitni marra tuɣa aten d ayt n bu-teɣruḍt imeḥḍen u nitni tuɣa aten d řqebṭanat di řɛeskar. 23 Maɣar di řweqt nni usin-dd yeryazen ɣar Dawud zeg wass ař ass ḥima ad as wcen afus ařami dewřen d řɛeskar d ameqqran, amecnaw řɛeskar n AREBBI.

24 Wa d řqedd n iɛeskariyyen n řqebṭanat i tuɣa isswejden i umenɣi, inni dd-yusin ɣar Dawud di Ḥabrun maḥend ad sseɛdun tagelda n Cawul ɣares, am mammec t yumur SIDI:

25 Zeg ayt n Yahuda tuɣa řqedd n yinni yarbun tiseddariyin n uɛeskari timeqqranin d iḥricen setta-ařaf u-temn-mya n yeryazen. Nitni tuɣa sswejden i umenɣi.

26 Zi ayt n Cimɛun tuɣa řqedd n ayt n bu-teɣruḍt imeḥḍen i řɛeskar sebɛa-ařaf u-mya n yeryazen.

27 Zeg iḥenjiren n Lawi arebɛa-ařaf u-setta-mya n yeryazen.

28 Yahuyadaɛ tuɣa d amgewwed n iḥenjiren n Harun. Netta yiwi akides teřt-ařaf u-sebɛa-mya n yeryazen.

29 Ṣaduq tuɣa d aḥudri, bu-teɣruḍt imeḥḍen. Zi taddart nnes tuɣa din tnayen u-ɛicrin n řqebṭanat.

30 Zeg iḥenjiren n Binyamin, aytmas n Cawul, tuɣa din teřt-ařaf n yeryazen, minzi azyen ameqqran zzaysen tuɣa ḥeṭṭan taddart n Cawul.

31 Zeg iḥenjiren n Ifrayim tuɣa din ɛicrin-ařef u-tmenya-mya n yeryazen, ayt n bu-teɣruḍt imeḥḍen, iryazen s yisem di taddart n babatsen.

32 Zeg wezyen n teqbič n Manassa tuɣa din tmenṭac-ařef n yeryazen, inni tuɣa ttwařaɣan s yismawen nsen maḥend ad dd-asen ad ggen Dawud d ajeǧid.

33 Zeg iḥenjiren n Issakar inni issnen u fehhmen ikuden ḥima ad ssnen min tuɣa x Israil ad igg, tuɣa řqebṭanat nsen, mitayen n yeryazen, u marra aytmatsen tuɣa aten sadu afus nsen. ^□  

34 Zeg ayt n Zabulun, zeg yenni dd-iffɣen ak-d řɛeskar s marra řesnaḥ nsen, tuɣa din xemsin-ařef n yeryazen. Nitni tuɣa sswejden ḥima ad settfen ixef nsen deg useddi s wuř imun nican.

35 Zeg ayt n Naftali tuɣa din ařef n řqebṭanat. Tuɣa-ten di sebɛa u-třatin-ařef n yeryazen inni yarbun taseddart n uɛeskari tameqqrant d lansa,

36 Zeg ayt n Dan tuɣa din tmenya u-ɛicrin ařef u-setta-mya n yeryazen, wejden i umenɣi.

37 Zeg ayt n Acir ffɣen-dd arebɛa-ařaf n yeryazen ak-d řɛeskar ḥima ad ssbedden ixef nsen deg useddi.

38 Zeg ujemmaḍ n L'Urdun, zeg ayt n Irubiniyyen d Ijadiyyen u zeg ayt n wezyen n teqbič n Manassa tuɣa din mya u-ɛicrin-ařef n yeryazen ak-d marra řesnaḥ i umenɣi.

39 Marra iɛeskariyyen-a usin-dd, ttwasettfen deg iseddiyyen u s wuř imun, ɣar Ḥabrun ḥima ad ggen Dawud d ajeǧid x marra Israil. Uřa min iqqimen n ayt n Israil tuɣa aten s wuř d ijj ḥima ad ggen Dawud d ajeǧid. 40 Nitni qqimen třata n wussan dinni ɣar Dawud, ccin swin, maɣar aytmatsen tuɣa bedden akidsen. 41 Uřa d yenni yudsen ɣares ař Issakar d Zabulun d Naftali usin-dd, iwyen-dd weɣrum x iɣyař, x iřeɣman, x isarḍan u x ifunasen, s řeɛweč am farina d iɣrumen n tazart d iɣrumen n zzbib d binu d zzect d ifunasen d wuǧi s ufeyyeḍ, maɣar tuɣa din řefraḥet di Israil.