1 Marra Israil yusa-dd ɣar Dawud ɣar Ḥabrun, nnan: “Xzar, neccin d iɣsan d weysum nnek. 2 Ɛad umi tuɣa Cawul d ajeǧid xaneɣ, aqa d cek i dd-issuffɣen Israil ɣar umenɣi uca tjebded t-i-dd ad dd-idweř. Ɛawed inna ac SIDI, AREBBI nnek: ‘Cek ad tarewsed řgens inu Israil u cek ad tiřid d amgewwed x Israil.’ ” 3 Xenni usin-dd marra imɣaren n Israil ɣar ujeǧid di Ḥabrun uca igga ujeǧid Dawud ijj n řɛahd akidsen di Ḥabrun zzat i wudem n SIDI. Nitni dehnen Dawud d ajeǧid x Israil ɛlaḥsab awař n SIDI s uqemmum n Camwil. ^□  ■  

4 Dawud iffeɣ ak-d marra Israil ɣar Urcalim, aqa-t d Yabus. Dinni tuɣa zeddɣen ayt n Yabus, imezdaɣ n temmurt. 5 Imezdaɣ n Yabus nnan i Dawud: “Cek war da tᵉttidfed ca.” Maca Dawud iṭṭef lburj n Ṣihyun, aqa-t d tandint n Dawud. 6 Maɣar Dawud inna: “Kuř ijj wenni i ɣa iwten ayt n Yabus d amezwaru, ad idweř d azeǧif n ikumandaren. Uca Yuwab, mmis n Saraya, igeɛɛed d amezwaru, s uyenni idweř netta d azeǧif. 7 Tuɣa Dawud izeddeɣ di lqelɛa. S uyenni qqaren as i lqelɛa tandint n Dawud. 8 Netta ibna tandint i d as dd-innḍen, zi lqelɛa u ssenni iquwwar as-dd. Iɛdeř Yuɛab min iqqimen n tendint. 9 Idweř Dawud yarenni di řemɣaret, maɣar SIDI n řɛeskarat tuɣa-t akides.

10 Ina d izeǧifen n ayt n bu-teɣruḍt n Dawud inni issjjehden akides tgelda nnes di marra Israil, ḥima ad t ggen d ajeǧid x Israil ɛlaḥsab awař n SIDI.

11 Ta d lista n lɛadad n ayt n bu-teɣruḍt n Dawud: Yacubɛam, mmis n Hakmuni, azeǧif n třatin. Netta iḥenneḍ s lansa nnes x teřt-mya n yeryazen nni issnuqqeb deg ijj n umur.

12 Awarni as yusa-dd Aliɛazar, mmis n Dudu, Axuxi. Netta tuɣa d ijj zi třata n ayt n bu-teɣruḍt.

13 Netta tuɣa-t ak-d Dawud di Fas-Dammim. Ifilisṭiniyyen nnyarwen din i umenɣi. Udem n yeyyar tuɣa iccur s imendi umi yarweř řgens zeg Ifilisṭiniyyen.

14 Nitni bedden di řwest n yeyyar uca fekken t. Nitni ɣeřben x Ifilisṭiniyyen. Ammu i yarra SIDI d asenjem d ameqqran.

15 Třata zi třatin n izeǧifen hwan ař taṣḍart, usin-dd ɣar Dawud deg ifri n Abdullam. Řɛeskar n Ifilisṭiniyyen tuɣa iwta iqiḍan nnes di teɣzurt n Irafawiyyen.

16 Dawud tuɣa-t di lqelɛa u tuɣa din ijj n řɛeskar n uḥewwes n Ifilisṭiniyyen di Bayt-Laḥm.

17 Dawud iřqef i-t ufadi, inna: “Wi i d ayi dd ɣa yawyen aman zi tařa n Bayt-Laḥm nni iǧan ɣar tewwart n tendint?”

18 Xenni cuqqen třata nni řmargeḥ n řɛeskar n Ifilisṭiniyyen, uymen-dd aman zi tařa n Bayt-Laḥm, tenni iǧan ɣar tewwart n tendint. Ksin ten akidsen uca iwḍen ɣar Dawud. Netta yugi ad ten isu, maca izeǧeɛ i-ten zzat i SIDI.

19 Netta inna: “Aya iggʷej xafi, a AREBBI, aqa necc ad ggeɣ man aya. Ma ad sweɣ idammen n yeryazen s řeɛmar nsen daysen, maɣar nitni sebbřen tudart nsen simant nsen?” U netta war ixs ad ten isu. D man aya i ggin třata n ayt n bu-teɣruḍt nni. 20 Abicay, mmis n Yuwab, tuɣa d azeǧif n třata nni. Netta iḥenneḍ lansa nnes x teřt-mya n yeryazen, issnuqqeb i-ten. Netta ɣares ijj n yisem ittwacennɛen jar třata nni. 21 Jar třata-ya tuɣa Abicay d wenni ittwacennɛen tnayen n imuren u netta tuɣa d řqebṭan i nitni. Maca netta war yiwiḍ uřa am třata n imezwura.

22 Xenni Banaya, mmis n Yahuyadaɛ, mmis n ijj n weryaz imeḥḍen, timegga nnes mɣarent, netta zi Qabḍiyil. Iɣřeb x tnayen n iyraden jehden zi Mu’ab. Ɛawed tuɣa ihwa ict n twařa, iɣřeb x ijj n weyrad di řwest n ijj n wanu deg ijj n wass umi iwta wedfeř. 23 Netta iɣřeb uřa x yijj n weryaz d Amiṣri, s yijj tiddi n xemsa n iɣaǧen. Amiṣri tuɣa ɣares lansa deg ufus nnes tegga am yijj n weɛmud n ukeccuḍ n uxeyyeḍ. Ihwa ɣares s weɛmud, ikkes as lansa zeg ufus n Umiṣri uca inɣa i-t s lansa nnes. 24 D man aya i igga Banaya, mmis n Yahuyadaɛ. S uya ɣares iǧa isem icneɛ jar třata n ayt n bu-teɣruḍt. 25 Netta tuɣa d wenni ittwacennɛen aṭṭas zi třatin , maca war yiweḍ ař třata imezwura. Dawud igga i-t jar imtiqqan nnes.

26 Ayt bu-teɣruḍt imeḥḍen i iqqimen tuɣa aten:

Ɛasayil, umas n Yuwab,

Ilḥanan, mmis n Dudu, zi Bayt-Laḥm,

27 Cammut, Aharudi,

Ḥaliṣ, Alfaluni,

28 Ɛira, mmis n Ɛiqqic, Ataquɛi,

Abiɛazar, Aɛanatuti,

29 Sibbikay, Aḥucati,

Ɛilay, Axuxi,

30 Maharay, Anaṭufati,

Xalid, mmis n Baɛna, Anaṭufati,

31 Ittay, mmis n Ribay, zi Jibɛa zeg iḥenjiren n Binyamin,

Banaya, zi Firɛatun,

32 Huray zi teɣzarin n Jaɛac,

Abiyil, Aɛarabati,

33 Ɛazmut, Abaḥrumi,

Ilyaḥba, Acaɛalbuni,

34 Tarwa n Hacim, Ajazuni,

Yunatan, mmis n Cajay, Aharari,

35 Axiyam, mmis n Sakar, Aharari,

Ilifal, mmis n Ur,

36 Ḥafir, Amakirati,

Axiya, Afaluni,

37 Ḥaṣru, Akarmali,

Naɛray, mmis n Izbay,

38 Yuwil, umas n Natan,

Mibḥar, mmis n Hajri,

39 Ṣaliq, Aɛammuni,

Naḥray, Aba’iruti, aḥemmař n řesnaḥ n Yuwab, mmis n Ṣaruya,

40 Ɛira, Ayitri,

Jarib, Ayitri,

41 Uriya, Aḥitti,

Zabad, mmis n Aḥlay,

42 Adina, mmis n Ciza, Arubini, wenni d azeǧif n ayt n Rubin u sennej nnes ɛad třatin n yeryazen,

43 Ḥanan, mmis n Maɛka,

d Yucafaṭ, Amatni, 44 Ɛuzziya Aɛactaruti,

Camaɛ d Yaɛiyil, iḥenjiren n Ḥutam, Aɛaruɛiri,

45 Yadiɛil, mmis n Cimri,

d Yuḥa, umas, Atiṣi,

46 Iliyil Amaḥwim,

Yaribay d Yucuwya, iḥenjiren n Ilnaɛam,

d Yitma Amu’abi,

47 Iliyil d Ɛubid d Yaɛsiyil zi Maṣubaya.