1 Mmenɣen Ifilisṭiniyyen ak-d Israil. Iryazen n Israil arewřen zzat i wudem n Ifilisṭiniyyen uca wḍan d imettan x temmurt n idurar n Jilbuɛa. 2 Ifilisṭiniyyen ḍfaren Cawul d iḥenjiren nnes břa qeṭṭu uca nɣin Ifilisṭiniyyen Yunatan d Abinadab d Malkicuɛa, iḥenjiren n Cawul. 3 Tuɣa amenɣi ak-d Cawul iwɛar. Imjebbaden n řqews ufin t u netta tuɣa iggʷed aṭṭas zeg imjebbaden n řqews. 4 Inna Cawul i uḥemmař n řesnaḥ nnes: “Suffeɣ-dd ssif nnek, snuqqeb ayi zzayes! Niɣ ad dd-asen inni war ittwaxetnen, ad zzayi stehzan.” Maca aḥemmař nnes n řesnaḥ war ixs ad tt igg, maɣar tuɣa iggʷed aṭṭas. Xenni iksi Cawul ssif uca isseɣḍeř ixef nnes xas. 5 Umi iẓra uḥemmař n řesnaḥ, aqa Cawul immut, iwḍa řa d netta x ssif nnes uca immut. 6 Immut Cawul ak-d třata n iḥenjiren nnes uca ammu temmut qaɛ taddart nnes. 7 Umi ẓrin marra yeryazen n Israil, inni tuɣa di řewḍa n teɣzurt, belli iryazen n Israil arewřen u Cawul d iḥenjiren nnes ttwanɣen, semḥen nitni di tneddam nsen uca arewřen. Řexdenni usin-dd Ifilisṭiniyyen uca dewřen zeddɣen din.

8 Tiwecca nnes umi dd-usin Ifilisṭiniyyen ḥima ad keccḍen inni ittwanɣen, imsar, aqa ufin Cawul d iḥenjiren nnes, inni tuɣa iwḍan x wedrar n Jilbuɛa. 9 Nitni keccḍen t uca iwyen azeǧif nnes d řesnaḥ nnes uca ssekken ten di temmurt n Ifilisṭiniyyen, ḥima ad ssiwḍen řexbar aṣebḥan ɣar řexyařat n ṣṣanam nsen u ɣar řgens.

10 Nitni ssarsen řesnaḥ n Cawul di taddart n arebbi nsen u aceqquf n uzeǧif nnes semmaren t ɣar řḥiḍ n Bayt-Can.

11 Umi sřan marra imezdaɣ n Yabic min ggin Ifilisṭiniyyen ak-d Cawul,

12 kkaren marra iryazen imeḥḍen uca ksin řxecbet n Cawul d řxecbat n iḥenjiren nnes uca iwyen tent ɣar Yabic. Nitni neḍřen ixsan nsen sadu i tcejjart n yigg di Yabic uca ẓummen sebɛa n wussan.

13 Cawul immut di ssibbet n řeɣdar nnes i zi tuɣa iɣeddar SIDI, di ssibbet n wawař n SIDI i war dayes iṭṭif netta, u umi yarzu ccwar ɣar wenni issawařen ak-d imettan

14 uca war isseqsi SIDI. S uyenni inɣa i-t SIDI uca issmuṭṭiy tagelda i Dawud, mmis n Yassa.