1 Ifilisṭiniyyen ssmunen marra řɛeskar nsen ɣar Afiq uca Israil tuɣa iwta iqiḍan nnes ɣar tařa nni iǧan ɣar Yazraɛil. 2 Uca řbacat n Ifilisṭiniyyen ẓwan ɣar din s řmyawat u s řuřuf nsen uca iẓwa Dawud d yeryazen nnes ak-d Axic ɣar uɣezdis aneggaru. 3 Xenni nnan řḥukkam n Ifilisṭiniyyen: “Min da tteggen Iɛibraniyyen-a?” Yarra-dd Axic x řḥukkam n Ifilisṭiniyyen: “Ma wa war iǧi d Dawud, amsexxar n Cawul, ajeǧid n Israil, wenni tuɣa ɣari iǧan aseggʷas d wass? Zeg wass i ɣari dd-yeɛdu ɣares ař ass-a necc war dayes ufiɣ uřa d ijj n řɛib.”

4 Ffuggmen xas aṭṭas řḥukkam n Ifilisṭiniyyen. Nnan as řḥukkam n Ifilisṭiniyyen: “Sekk aryaz ad iɛqeb, ḥima ad idweř ɣar wemcan nnes nni i d as tessecned. War izemmar akidneɣ ihwa ɣar umenɣi, ḥima xenni war iddikkwiř d řeɛdu nneɣ deg umenɣi. Maɣar s minzi izemmar wanita ad iṣřeḥ ak-d sidis nnes? Ma war iǧi ak-d izeǧifen n yeryazen-a? ^■   5 Ma wanita war iǧi d Dawud wenni x ɣennjent d ceḍḥent s nnubat, nnant: ‘Cawul netta iɣřeb x řuřuf nnes, maca Dawud netta x ɛecra n řuřuf nnes?’ ” ^■  

6 Uca iřaɣa-dd Axic i Dawud inna as: “S tidett am iddar SIDI, cek d aṣdiq. Ufuɣ nnek d weɛqab nnek akidi di řɛeskar aqa aten mliḥ di tiṭṭawin inu, maɣar necc war dayek ufiɣ qaɛ ca n řɣecc zeg wass i ɣari dd-tusid ɣares ař ass-a. Maca cek war teǧid mliḥ di tiṭṭawin n řbacat. 7 Xenni řexxu, ɛqeb uca uyur di řehna ḥima war tᵉttegged qaɛ ca n řɣecc di tiṭṭawin n řbacat n Ifilisṭiniyyen.” 8 Xenni inna Dawud i Axic: “Maɣar min ggiɣ? Min tufid deg umsexxar nnek zeg wass amezwaru i d ayi tuɣa zzat i wudem nnek ɣares ař ass-a, ařami war ruḥeɣ akidwem ad menɣeɣ ak-d řɛedyan n sidi inu, ajeǧid?” 9 Axic yarra-dd, inna i Dawud: “Necc ssneɣ tt, minzi cek d lmliḥ di tiṭṭawin inu am ijj n lmalak n AREBBI, maca řḥukkam n Ifilisṭiniyyen nnan: ‘Netta war akidneɣ itteffeɣ ɣar umenɣi.’

10 S uyenni kkar tiwecca zic s imsexxaren n sidi nnek, inni akidek dd-yusin. Mařa tekkarem s wass zic uca iṣbeḥ řḥař, ffɣem xenni.”

11 Dawud ikkar zic, netta d yeryazen nnes, ḥima ad uyuren di ṣṣbeḥ, ad dd-ɛeqben ɣar temmurt n Ifilisṭiniyyen. Ifilisṭiniyyen maca ffɣen geɛɛden ɣar Yazraɛil.