1 Deg wussan nni, řami ssmunen Ifilisṭiniyyen řɛeskar nsen i umenɣi ḥima ad mmenɣen ak-d Israil, imsar, aqa Axic inna i Dawud: “Ittxeṣṣa ad tessned mliḥ, aqa cek ad kidi teffɣed s uɣiř di řɛeskar, cek d yeryazen nnek.” 2 Xenni inna Dawud i Axic: “Di man aya ad tẓared min izemmar ad yegg umsexxar nnek!” Axic inna i Dawud: “S uyenni ad cek ggeɣ d aɛessas xafi, di marra ussan.” ^□  

3 Camwil tuɣa immut d marra Israil tuɣa icḍen xas. Nitni neḍřen t di Rama, di tendint nnes. Cawul tuɣa issuffuɣ inni issawařen ak-d imettan uřa d igezzanen zi temmurt. ^■  

4 Ifilisṭiniyyen munen marra. Nitni usin-dd uca wtin iqiḍan nsen ɣar Cunam u Cawul issmun marra Israil u nitni wtin iqiḍan nsen ɣar Jilbuɛa. 5 Umi iẓra Cawul řmargeḥ n řɛeskar n Ifilisṭiniyyen, tusa as-dd tiggʷudi u wuř nnes idweř itteqdiddis s waṭṭas. 6 Cawul isseqsa SIDI, maca SIDI war xas dd-yarri ca, war iǧi s tirja, uřa s Urim, uřa s inabiyyen. 7 Xenni inna Cawul i imsexxaren nnes: “Arzum ayi-dd ict n temɣart iddebbaran x buḥbeřat n imettan, ḥima necc ad ɣares raḥeɣ u ad tt sseqsiɣ.” Imsexxaren nnes nnan as: “Xzar, di Ɛayn-Dur aqa din ict n temɣart tenni iddebbaran x buḥbeřat n imettan.” 8 Cawul issneqřeb ixef nnes, yarḍ arruḍ nneɣni uca yuyur. Tnayen n yeryazen ruḥen akides u nitni iwḍen di ǧiřet ɣar temɣart uca inna netta: “Gezzen ayi zi buḥbeř n ijj n umettin uca řaɣa ayi-dd x wenni d am i ɣa iniɣ.” 9 Xenni tenna xas temɣart: “Aqa da cek tessned mliḥ min igga Cawul, mammec tuɣa iteḥḥa inni issawařen ak-d imettan d igezzanen zi temmurt. Mayemmi i d ayi tᵉttegged taxceft, ḥima ad ayi tenɣed?”

10 Cawul maca ijjuǧ as ɣar SIDI, inna: “S tidett am iddar SIDI, war cem iřeqqef di tmesřact-a ca řɛib!”

11 Xenni tenna temɣart: “Man wen i xef-dd i ɣa řaɣiɣ i cek?” Netta inna “Řaɣa ayi-dd x Camwil!”

12 Xenni tamɣart teẓra Camwil, tesɣuyy deg ujenna u tessiweř temɣart ak-d Cawul, tenna as: “Mayemmi i d ayi tcemted? Cek aqa d Cawul!”

13 Inna as ujeǧid: “War tteggʷed ca, maca min tᵉttwařid?” Xenni tenna temɣart i Cawul: “Necc ttwařiɣ inni yařewsen deg irebbiten i dd-igeɛɛden zi temmurt.”

14 Netta inna as: “Mammec tegga tiddi nnes?” Nettat tenna: “Ijj n uwessar igeɛɛed u yarḍ s yijj n useřham.” Umi issen Cawul, aqa-t d Camwil, yuḍar netta s uɣembub nnes ɣar temmurt uca ibbendeq.

15 Uca Camwil inna: “Mayemmi i d ayi thewřed, tejjid ad xafi dd-řaɣan?” Cawul inna: “Necc ttwaḥṣareɣ aṭṭas, maɣar Ifilisṭiniyyen ttmenɣan akidi u AREBBI iḥeyyed xafi u war iqqim ittarra-dd xafi ɛad, war iǧi x tebridin n inabiyyen uřa s tirja. S uyenni řaɣiɣ-dd xak, maḥend ad ayi tessecned min ɣa ggeɣ.”

16 Xenni inna Camwil: “Mayemmi i d ayi tᵉttseqsid, mařa SIDI iḥeyyed xak u netta idweř d řeɛdu nnek?

17 SIDI simant nnes igga am mammec tuɣa zzayi inna u netta iqřeɛ i cek tageldit zeg ufus nnek, iwca i-tt i umqarreb nnek, i Dawud.

18 Minzi cek war tesřid ca ɣar tmijja n SIDI u cek war tessiwḍed ca řḥaduq n weɣḍab nnes ɣar Ɛamaliq, x uyenni i d ac igga SIDI ass-a aya.

19 SIDI ad kidek igg uřa d Israil deg ufus n Ifilisṭiniyyen, u tiwecca ad tiřid cek d iḥenjiren nnek ɣari. Uřa d řɛeskar n Israil ad t igg SIDI deg ufus n Ifilisṭiniyyen.” 20 Xenni iwḍa Cawul deɣya ibeqqeḍ di temmurt, tuɣa itteggʷed aṭṭas zeg wawařen n Camwil. Uřa d jjehd war dayes iqqim, minzi war icci aɣrum, ass d ǧiřet kemmřen.

21 Tamɣart tuyur ɣar Cawul, uca teẓra i-t yarjef aṭṭas. Tenna as: “Xzar, tayya nnek tesřa ɣar tmijja nnek u necc sebbřeɣ tudart inu, sřiɣ ɣar wawařen i d ayi tennid. 22 Xenni řexxu maca seř ɣar tmijja n tayya nnek! Necc ad ac qeddmeɣ ijj n uřeqqim n weɣrum. Ecc ḥima ad tᵉttwasjheded xmi i ɣa tᵉṭṭfed abrid.” 23 Maca netta yugi, inna: “Necc war ttᵉtteɣ!” Maca imsexxaren nnes uřa d tamɣart ḥṣaren ɣares ařami isřa netta ɣarsen uca netta ikkar zi temmurt uca iqqim x qama. ^□   24 Tamɣart tuɣa ɣares ijj n uyenduz imseř di taddart uca tɣarṣ as deɣya. Nettat teksi awren, teggʷa arecti u teggʷa zzayes aɣrum břa antun.^□   25 Nettat tqeddem aya i Cawul d imsexxaren nnes uca ccin nitni. Awarni aya kkaren u areggʷḥen di ǧiřet nni.