1  Umi dd-yusa Dawud d yeryazen nnes ɣar Ṣiqlaɣ deg wass wiss třata, tuɣa imsar, aqa Iɛamaliqiyyen keccḍen ljanub uřa d Ṣiqlaɣ. Nitni wtin Ṣiqlaɣ, qqden as timessi 2 uca ḥebbsen timɣarin nni din iǧan. War nɣin uřa d ijj, ameẓyan niɣ d ameqqran, maca iwyen ten uca xenni uyuren abrid nsen. 3 Yusa-dd Dawud ak-d yeryazen nnes ɣar tendint, uca xzar, aqa tᵉttwasecmeḍ tendint s tmessi u timɣarin d iḥenjiren d tḥenjirin tuɣa ttwaḥewwsen. 4 Dawud d řgens i ɣares iǧan ssgeɛɛden tmijja nsen, sɣuyyen ařami war daysen iqqim jjehd ḥima ad sɣuyyen. 5 Uřa d tnayen n temɣarin n Dawud ttwaḥewwsent, Axinuɛam zi Yazraɛil u Abijayil zi Karmil. 6 Tuɣa Dawud itteggʷed aṭṭas, minzi řgens tuɣa issawař maḥend ad t arejmen, maɣar řeɛmur n marra řgens tuɣa arezgen, kuř aryaz x txessart n iḥenjiren nnes d tḥenjirin nnes. Maca Dawud issejhed ixef nnes di SIDI, AREBBI nnes.

7 Inna Dawud i ukehhan Abyatar, mmis n Aximalik: “Awi-dd da ɣari apalṭu n ukehhan!” U Abyatar yiwi-dd apalṭu n ukehhan ɣar Dawud. 8 Xenni isseqsa Dawud i SIDI: “Ma ad ḍfareɣ bandiyya-ya? Ma ad xasen ḥarteɣ?” SIDI yarra-dd xas: “Ḍfar i-ten, maɣar cek ad xasen tḥarted u ad tessnejmed imeḥbas nican.” 9 Iffeɣ-dd Dawud, netta d setta-mya n yeryazen nni tuɣa ɣares. Umi dd-iwḍen nitni ař tiɣzart n Basur, bedden din inni iqqimen ɣar ḍeffar.

10 Dawud iḍfar i-ten, netta d arebɛa-mya n yeryazen akides. Mitayn n yeryazen, inni tuɣa yuḥřen aṭṭas maḥend ad ẓwan tiɣzart n Bacur, qqimen bedden din.

11 Nitni ufin ijj n weryaz d Amiṣri deg iyyar uca iwyen t ɣar Dawud. Nitni wcin as aɣrum u netta icca u nitni wcin as aman ad isu.

12 Arnin as ict n tesɣart n ijj n weɣrum n tazart yuẓɣen d tnayen n iɣrumen n zzbib u netta tuɣa icca aya uca idweř as-dd buḥbeř nnes, maɣar netta tuɣa war icci war iswi třata n wussan d třata n ǧiyaři.

13 Xenni inna as Dawud: “Wi cek yiřan u manis cek?” Xenni inna uḥudri Amiṣri: “Necc d ijj n ismeɣ n ijj n weryaz Aɛamaliqi u sidi inu ijja ayi, řami heřceɣ třata n wussan zeg wami.

14 Neccin tuɣa nkecceḍ tammurt n ljanub n Ikaritiyyin uřa d tenni n Yahuda uřa d tammurt n ljanub n Kalib u neccin nessecmeḍ Ṣiqlaɣ s tmessi.”

15 Dawud inna as: “Ma tzemmared cek ad ayi tnedhed ɣar tegrawt-a n ixewwanen?” Netta inna: “Jaǧ ayi ɣar AREBBI, aqa cek war d ayi tneqqed u war d ayi tessɛeddud i sidi inu! Xenni necc ad cek nedheɣ ɣar bandiyya aya.”

16 Uca indeh t din, u xzar, nitni tuɣa qqimen ttwabezzɛen x marra tammurt, ccin, swin u ceḍḥen zi ssibbet n tkeccaḍt tameqqrant i tuɣa dd-iwyen zi temmurt n Ifilisṭiniyyen d temmurt n Yahuda.

17 Dawud iwta xasen zi tbambast ař tameddit n wass i-tt-i-dd iḍfaren uca uřa d ijjen zzaysen war injim, mɣir arebɛa-mya n yeryazen nni inyin x iřeɣman, arewřen.

18 Ammu dd-ifekk Dawud marra min kksen Iɛamaliqiyyen. Dawud ifekk-dd uřa d tnayen n temɣarin nnes.

19 Zeg umeẓyan ař ameqqran, zeg iḥenjiren d tḥenjirin, zi tkeccaḍt u zi marra min zzaysen kksen, war iweddar walu. Marra yarra i-t-i-dd Dawud. 20 Iksi Dawud ɛawed marra uǧi d ifunasen d tfunasin. Nedhen ten ɣar zzat i řeksibet nsen uca nnan: “Ta d takeccaḍt n Dawud.”

21 Umi dd-yiweḍ Dawud ɣar mitayen n yeryazen, inni tuɣa yuḥřen aṭṭas ḥima ad ḍfaren Dawud ɛad, inni ten ijjin ɣar teɣzart n Bacur, ffɣen-dd nitni ɣar umsagar ak-d Dawud u ak-d řgens nni tuɣa ɣares. Dawud iqarreb-dd ɣarsen uca isseqsa x umeddur nsen. 22 Xenni yarra-dd kuř aryaz war iḥřin d wenni war isekkwin jar yeryazen nni tuɣa dd-iffɣen ak-d Dawud, nnan: “Maɣar nitni war kidneɣ ffiɣen, x uyenni war d asen ntic walu zi tkeccaḍt i dd-nfekk, mɣir i kuř aryaz tamɣart nnes d iḥenjiren nnes, d ina zemmaren nitni ad awyen uca ad kidsen areggʷḥen.” 23 Maca Dawud inna: “War tzemmarem ad teggem amenni, aytma, aqa SIDI d wenni d aneɣ iwcin aya u Netta iḥḍa aneɣ u iwca bandiyya i d aneɣ-dd iwḍan deg ufus nneɣ. 24 Wi i ɣarwem dd ɣa isřen ɣar wawař-a? Maɣar tasɣart n wenni iffɣen ɣar umenɣi ad tiři am tesɣart n wenni iqqimen ɣar řexzin. Nitni ad tt bḍan jmiɛ.” 25 Ammu i teqqim zeg wass nni, minzi netta igga i-tt d ict n tewṣeyyet d ict n lfariḍa di Israil, ɣares ař ass-a.

26 Umi yareggʷeḥ Dawud ɣar Ṣiqlaɣ, issekk netta tirzefin zi tkeccaḍt ɣar imɣaren n Yahuda, imeddukkař nnes, am i d asen inna: “Ta d ict n lbaraka i kenniw zi tkeccaḍt n řɛedyan n SIDI”. 27 Issekk i imɣaren di Bayt-Il, i yenni di Ramat di ljanub, i yenni di Yattir, 28 i yenni di Ɛaruɛir, i yenni di Sifmut, i yenni di Icitimuɛa, 29 i yenni di Raxil u i yenni tuɣa izeddɣen di tneddam n Iyarḥamtiliyyen u i yenni izeddɣen di tneddam n Iqiniyyen 30 u i yenni di Ḥurma, i yenni di Kur-Ɛacan, i yenni di Ɛatak 31 u i yenni di Ḥabrun u ɣar marra imucan manis tuɣa ikka Dawud, netta ak-d iryazen nnes.