Dawud deg ifri n Adullam
22
1 Xenni yuyur Dawud ssenni, issenjem ixef nnes ɣar ifri n Adullam. Aytmas d marra taddart n babas sřan aya uca hwan ɣares dinni. 2 Uca kuř aryaz wenni tuɣa itteḥṣaren u kuř aryaz i di tuɣa iǧa umarwas u kuř aryaz s řbař d amerzag, aqa ffɣen ɣares uca netta idweř d akumandar nsen. Tuɣa ɣares řqedd n arebɛa-mya n yeryazen. 3 Ssenni iffeɣ Dawud ɣar Miṣfat di Mu’ab. Inna netta i ujeǧid n Mu’ab: “Ejj baba d yemma ad ɣarwem dd-asen, ɣares ař ɣa ssneɣ min kidi i ɣa yegg SIDI.” 4 Netta yiwyi ten zzat i wudem n ujeǧid n Mu’ab uca nitni qqimen ɣares marra ussan i di ikka Dawud di lburj deg idurar. 5 Maca anabi Jat inna i Dawud: “War ttɣimi di lburj deg idurar, maca aggʷej u adef ɣar temmurt n Yahuda!” Xenni yuyur Dawud, yiweḍ ɣar wezɣar n Ḥarit. □
Tamenɣiwt n ikehhanen n Nub
6 Cawul isřa belli Dawud d iryazen, inni tuɣa ɣares iǧan, ttwafen. Tuɣa Cawul iqqim di Jibɛa sadu ict n tcejjart n tmarist ɣar Rama u tuɣa ɣares ict n lansa deg ufus nnes u marra imsexxaren nnes bedden-dd ɣares. □ 7 Uca inna Cawul i imsexxaren nnes i ɣares dd-ibedden: “Ttzawgeɣ sřem-dd, kenniw ayt n Binyamin! Ma ad iwc mmis n Yassa iyyaren d imarjaɛen n uḍiř i kenniw marra? Ma ad yarr kenniw marra d imeqqranen x ařef d imeqqranen x mya? 8 Aqa kenniw marra teggim xafi tameɛmuč uca uřa d ijjen war d ayi issargeb belli mmi igga ijj n řɛahd ak-d mmis n Yassa uca uřa d ijj zzaywem war d as cqiɣ, war d ayi tessargbem aqa mmi issamar-dd amsexxar inu xafi maḥend ad ayi izeyyar am mammec iǧa ass-a.”
9 Xenni yarra-dd Duwaɛ, d wenni zeg Idum, d wenni tuɣa d ameḥday x imsexxaren n Cawul, inna: “Necc ẓriɣ mmis n Yassa řami dd-yusa di Nub ɣar Aximalik, mmis n Axiṭub.
10 Netta ittar SIDI di ṭṭweɛ nnes u iwca as macca. Iwca as uřa d ssif n Julyat, Afilisṭini.”
11 Xas uca issekk ujeǧid ijj maḥend ad dd-iřaɣa x ukehhan Aximalik, mmis n Axiṭub, jmiɛ ak-d marra taddart n babas, ikehhanen, inni iǧan di Nub. Uca marra usin-dd ɣar ujeǧid.
12 Inna Cawul: “Seř, cek, mmis n Axiṭub!” Uca inna netta: “Xzar, aqa ayi da, a sidi inu!”
13 Cawul inna as: “Mayemmi xafi teggim tameɛmuč, cek d mmis n Yassa, aqa cek tewcid as macca d ssif u tᵉttared AREBBI di ṭṭweɛ nnes ḥima ad xafi iɣewweɣ am wenni d ayi izeyyaren, am mammec iǧa ass-a.”
14 Aximalik yarra-dd x ujeǧid, inna: “Man wen zi marra imsexxaren nnek d amtiqqi am Dawud, aḍeggʷař n ujeǧid, u man wen i ɣa yawḍen amenni ɣar imtiqqan nnek u wi ɣar iǧa ccan ammu di taddart nnek?
15 Ma ass-a waha i kkareɣ ad ttareɣ SIDI di ṭṭweɛ nnes? Aqa man aya iggʷej xafi. Ejj ajeǧid war ineṭṭar řbaṭeř x umsexxar nnes d marra taddart n baba s ca n řḥajjet, minzi amsexxar nnek war issin walu x marra aya, ma tamesřact d tameẓyant niɣ d tameqqrant i teǧa.”
16 Maca ajeǧid inna: “Cek s tidett ad temmted, a Aximalik, cek d marra taddart n babac.”
17 Uca ajeǧid inna i iɛessasen nnes n arrimet nni ɣares-dd ibedden: “Nqeřbem u nɣem ikehhanen n SIDI, maɣar uřa d nitni wcin afus i Dawud, minzi nitni ssnen aqa netta tuɣa ittrakkwař u nitni war d ayi xas ssargben ca .” Maca imsexxaren n ujeǧid war xsen ad sswiẓẓḍen afus nsen ḥima ad zzayes wten ikehhanen n SIDI.
18 Xenni inna ujeǧid i Duwaɛ: “Neqřeb uca wwet ikehhanen!” Xenni inneqřeb Duwaɛ, wenni zi Idum i yeǧa, uca iwta ikehhanen uca inɣa deg wass nni xemsa u-tmanyin n yeryazen, inni yarḍen apalṭu n ukehhan.
19 Netta iwta uřa d Nub, tandint n ikehhanen, s řeqḍeɛ n ssif, iryazen d temɣarin, iḥenjiren d iseyman. Iwta ɛawed uřa d ifunasen d yeɣyař d wuǧi s řeqḍeɛ n ssif. 20 Ijj zeg iḥenjiren n Aximalik, mmis n Axiṭub, issenjem ixef nnes. Tuɣa isem nnes Abyatar u netta iqeǧeq ixef nnes awarni i Dawud.
21 Abyatar iḥaja i Dawud, aqa Cawul tuɣa inɣa ikehhanen n SIDI. 22 Xenni inna Dawud i Abyatar: “Deg wass nni, umi tuɣa Duwaɛ zi Idum dinni, ssneɣ aqa netta ad iḥaja aya i Cawul. Necc d wenni x iǧan marra řeɛmur n taddart n babac. 23 Qim ɣari, war tteggʷed ca, maɣar wenni yarezzun ad ineɣ řeɛmar inu, yarezzu ad ineɣ uřa d řeɛmar nnek. Aqa cek ɛawed ɣari tᵉttwaḥḍid.”