1 Xenni ikkar Dawud, yuyur, uca yudef Yunatan ɣar tendint. 2 Xenni yiweḍ Dawud ɣar Nub ɣar ukehhan Aximalik. Aximalik iffeɣ-dd ɣar Dawud yarjef, inna as: “Mayemmi cek weḥḥdek, war akidek uřa d ijj?” 3 Dawud inna i ukehhan Aximalik: “Ajeǧid iwca ayi ijj n wareqqas, inna ayi: ‘Uřa d ijj war ittriggib x tmesřact i d ac-dd ssekkeɣ u xak ggiɣ!’ Sargbeɣ i iḥudriyyen aqa ruḥeɣ ɣar wemcan-a d wemcan-in. 4 Xenni řexxu, min ɣarek deg ufus? Ewc ayi xemsa n tecnifin deg ufus niɣ min ma tzemmared ad tafed.”

5 Akehhan yarra-dd x Dawud, inna: “War din aɣrum n macca ɣar ufus, mɣir aɣrum amqeddes waha i da. Maca meɛlik mɣir tuɣa ggʷejen iḥudriyyen x temɣarin!” 6 Dawud yarra-dd x ukehhan, inna as: “S tidett, timɣarin ttwaḥeyydent xaneɣ, iḍennaḍ d fariḍennaḍ, zeg wami ffɣeɣ, u řeqcuɛ n iḥudriyyen ttwaqeddsen. Waxxa manawya d ijj n wufuɣ am řebda, waxxa amenni aqa ittwaqeddes ass-a s řeqcuɛ.”

7 Xenni iwca as ukehhan aɣrum iqeddsen, maɣar war tuɣi dinni aɣrum mɣir aɣrum n wescan nni ittwakkes zi zzat i wudem n SIDI ḥima ad ssarsen deg wemcan nsen aɣrum iḥma deg wass nni ittwakkes. ^■   8 Deg wass nni tuɣa dinni ijj zeg imsexxaren n Cawul. Netta tuɣa ittwaḥṣar dinni zzat i wudem n SIDI. Tuɣa qqaren as Duwaɛ, zi Idum, wenni ijehden aṭṭas jar imeksawen inni iǧan ɣar Cawul. 9 Uca inna Dawud i Aximalik: “Ma war da ɣarek ict n lansa niɣ ijj n ssif ɣar ufus? Maɣar war kidi-dd ksiɣ ssif d řesnaḥ inu deg ufus inu, minzi areqqas n ujeǧid tuɣa ittqeǧiq.”

10 Inna ukehhan: “Ssif n Julyat, Afilisṭini wenni x teɣřeb di řewḍa n teɣzurt n tcejjura n yigg, aqa-t da ittwanneḍ deg ijj n warruḍ awarni i upalṭu n ikehhanen. Mařa texsed ad t teksid, ksi t, minzi war da walu mɣir wanita.” Inna Dawud: “War iǧi ijj am netta! Ewc ayi t!”

11 Uca Dawud ikkar, yarweř deg wass nni zzat i wudem n Cawul uca netta yusa-dd ɣar Axic, ajeǧid n Jat.

12 Imsexxaren n Axic nnan as: “Ma wanita war iǧi d Dawud, ajeǧid n temmurt? Ma war iǧi d wenni zi ɣennjent u ceḍḥent temɣarin s nnubtat, qqarent: ‘Cawul iɣřeb x řuřuf nnes, maca Dawud x ɛecra n řuřuf nnes?’ ”^■  

13 Dawud ijja awařen-a deg wuř nnes u tuɣa itteggʷed aṭṭas zzat i wudem n Axic, ajeǧid n Jat.

14 Xenni igga ixef nnes axmi iweddar řeɛqeř nnes zzat i tiṭṭawin nsen uca netta inneqřeɛ as uzeǧif deg ifassen nsen uca ibda ixebbec di tewwura n tewwart n tendint, ijja ikuffan nnes hekkwan-dd x tmart nnes.

15 Xenni inna Axic i imsexxaren nnes: “Xzarem, kenniw tᵉttwařam aqa aryaz ibbuhři. Mayemmi i-t-i-dd-tiwyem ɣari?”

16 Ma ttxeṣṣan ayi ibuhařiyyen, aqa tiwyem-dd ɣari wanita maḥend ad ɣari igg tubbuheřya? Ma d wanita i dd ɣa yadfen ɣar taddart inu?”