1 Dawud yarweř zi Nayut tenni ɣar Rama uca yusa-dd ɣar Yunatan, inna: “Min ggiɣ necc? Man ljarima inu d ddenb i d as ggiɣ i babac, aqa netta ixs ad zzayi ikkes tudart?” 2 Inna as Yunatan: “War xas nessiweř! Cek war tᵉttmettid ca. Xzar baba war ittegg walu, uřa d ict n řḥajjet d tameqqrant niɣ tameẓyant, břa ma i d ayi tt ɣa issargeb. Mayemmi baba zzayi i ɣa issnuffar tamesřact-a? Aya war izemmar.” 3 Xenni ijjuǧ as Dawud twařa nneɣnit, inna: “Babac issen nican, aqa ufiɣ řxaḍar di tiṭṭawin nnek. X uya inna: ‘War ittejji ad issen Yunatan man aya, ḥima war ikessi s wemnus!’ X uya, s tidett am iddar SIDI u am ddareɣ necc, aqa din jar ayi d řmewt mɣir ijj n uṣurif waha!”

4 Yunatan inna i Dawud: “Min iǧan deg wuř nnek, necc ad ac t ggeɣ.” 5 Dawud yarra-dd x Yunatan: “Xzar, tiwecca ad ibedd uyur uca ittxeṣṣa ayi ad qqimeɣ ɣar ṭṭabřa ak-d ujeǧid ad cceɣ. Ejj ayi ad uyureɣ, maḥend ad nuffareɣ deg iyyar ɣares ař tameddit wiss třata. 6 Mařa yarzu xafi babac, ifqed ayi, xenni ini: ‘Dawud iḥeccem ayi s waṭṭas ḥima izemmar ad iraḥ ɣar tendint nnes, ɣar Bayt-Laḥm, minzi dinni i ɣa tiři tɣarṣt n useggʷas i marra řaǧ.’ 7 Mařa netta xenni inna: ‘Mliḥ!’, ad yiři řehna i umsexxar nnek, maca mařa yarɣa ufugem nnes, xenni ad tessned, aqa netta igga di řbař nnes ad d ayi igg řɣar. 8 Egg s tmexsiwt icewwaren ak-d umsexxar nnek, minzi tessidfed amsexxar nnek akidek deg ijj n řɛahd n SIDI. Maca mařa ggiɣ ict n ljarima, neɣ ayi cek xenni. Mayemmi texsed ad ayi tawyed ɣar babac?” ^■   9 Xenni inna Yunatan: “Ad yiři uya iggʷej xak! Minzi waxxa aregbeɣ xas, aqa baba igga di řbař nnes ad dayek igg řɣar, ma xenni necc war d ac t qqareɣ?”

10 Inna Dawud i Yunatan: “Man wen i d ayi-dd i ɣa yawyen areqqas, mařa iwca ac babac ict n temwarrit teqseḥ?”

11 Xenni inna Yunatan i Dawud: “As-dd, ejj aneɣ ad neffeɣ barra ɣar yeyyar.” Uca ffɣen nitni s tnayen idsen, ɣar yeyyar barra.

12 Inna Yunatan i Dawud: “Jjuǧeɣ ɣar SIDI, AREBBI n Israil, mařa necc tiwecca niɣ farwicca ɣar řweqt-a, aqa wtiɣ řeḥsab ammu d wammu zi jjihet n baba, ufiɣ aqa mliḥ i Dawud uca xenni necc war ssekkiɣ ḥed ad ac t yini,

13 xenni ad igg SIDI amenni s Yunatan u ɛad mahu. Maca mařa ittɣiř as mliḥ i baba ad dayek igg řɣar, xenni necc ad ac t iniɣ, ad cek jjeɣ ad teffɣed ḥima tzemmared ad tuyured di řehna. SIDI ad yiři akidek, am mammec t tuɣa ak-d baba.

14 War ittiři waha am ddareɣ, war ittiři xenni waha ad ayi tessecned tamexsiwt icewwaren n SIDI ḥima war ttmettiɣ ca,

15 maca uřa war tqeṭṭɛed tamexsiwt nnek icewwaren i řebda x taddart inu, uřa xmi i ɣa iqḍeɛ SIDI marra řɛedyan n Dawud zeg wudem n temmurt!”

16 Uca igga Yunatan ijj n řɛahd ak-d taddart n Dawud uca SIDI ittar i-t zeg ufus n řɛedyan n Dawud.

17 Yunatan ijja Dawud ad ijjaǧ twařa nneɣnit, minzi netta tuɣa ittexs i-t, aqa ittexs i-t am mammec tuɣa ittexs ixef nnes.

18 Xas uca inna as Yunatan: “Tiwecca d ayur amaynu u cek ad daysen teqqimed maɣar řkursi nnek ad iqqim ixwa.

19 Mařa ɛdun třata n wussan, hwa qaɛ uca ruḥ ɣar wemcan mani tuɣa tennuffared deg wass n tmeggit u qqim ɣar uɣezdis n weẓru n Ha’izil. 20 Necc ad wteɣ třata n fřitcat zzates axmi xseɣ ad řeqfeɣ tandayt. 21 U xzar, necc ad ssekkeɣ aḥudri awarni asent, ad as iniɣ: ‘Uyur, arzu x fřitcat!’ Mařa necc ad iniɣ nican i uḥudri: ‘Ḥḍa, fřitcat aqa udsent ɣar uɣezdis-a zi ɣarek!’, xenni awyi tent-i-dd, as-dd, maɣar aqa din řehna i cek u war din walu aqa ammu s tidett i iddar SIDI! 22 Maca mařa necc nniɣ i uḥudri: ‘Xẓar, fřitcat aqa iggʷejent xak ɛad ktar!’, xenni aggʷej, maɣar SIDI issekka cek ɣar řaggʷaj. 23 Uca x wawař nni nenna necc d cek, aqa SIDI ad yiři d acehhad jar ayi d cek i řebda!”

24 Issnuffar Dawud ixef nnes barra deg iyyar. U řami dd-yusa uyur amaynu iqqim ujeǧid ɣar ṭṭabřa ḥima ad icc. 25 Tuɣa ajeǧid iqqim ɣar umensi aya deg wemcan nnes am mammec tuɣa iqqim ɣar imensiyyen inneɣni, di řkursi i iǧan ɣar řḥiḍ. Yunatan ikkar u Abnir iqqim ɣar uɣezdis n Cawul u řkursi n Dawud iban-dd ixwa. 26 Deg wass nni Cawul war ini walu, maɣar netta inna deg ixef nnes: “Imsar as ca ařami netta war iǧi d amezdag. Aqa nican netta war iǧi d amezdag.”

27 Tiwecca nnes, deg wass wiss tnayen awarni i uyur amaynu, umi iqqim řkursi n Dawud ixwa ɛawed, imsar, aqa inna Cawul i mmis Yunatan: “Mayemmi mmis n Yassa war dd-yusi iḍennaḍ d wass-a ɣar umensi?” 28 Yunatan yarra-dd x Cawul: “Dawud iḥeccem ayi aṭṭas maḥend izemmar ad iraḥ ɣar Bayt-Laḥm. 29 Netta inna: ‘Ejj ayi ad uyureɣ, maɣar neccin ad negg ict n tɣarṣt n řaǧ nneɣ di tendint uca uma igga xafi ad ḥḍareɣ. Mařa xenni ufiɣ řexxu arḍa di tiṭṭawin nnek, ttzawgeɣ, ejj ayi ad uyureɣ ḥima ad ẓareɣ aytma.’ S uyenni Dawud war dd-yusi ɣar ṭṭabřa n ujeǧid.”

30 Xenni yareɣ uxeyyeq n Cawul x Yunatan, inna as: “Cek, mmis n temɣart i di teǧa tɣennant ifarɣen! Necc ssneɣ mliḥ, aqa cek tixḍared aɣezdis n mmis n Yassa, d man aya d řefḍiḥet i cek d řefḍiḥet i tuɛɛaryent n yemmac! 31 Minzi marra ussan min ɣa yekk mmis n Yassa iddar x temmurt, war tbeddid cek uřa d tageldit nnek. Xenni řexxu, sekk ijjen, awyi t-i-dd ɣari, maɣar netta d aḥenjir n řmewt.”

32 Yarra-dd Yunatan x babas Cawul, inna as: “Mayemmi ittxeṣṣa netta ad ittwaneɣ? Min igga?” 33 Xenni iḥejjar i-t Cawul s lansa ḥima ad t iřqef. Ammu i issen Yunatan, aqa babas tuɣa igga di řbař nnes ad ineɣ Dawud. 34 Ikkar Yunatan x ṭṭabřa umi yarɣa uxeyyeq nnes u war icci aɣrum deg wass wiss tnayen n uyur amaynu, maɣar netta tuɣa ikessi s wemnus i Dawud, minzi babas tuɣa issbehdeř i-t ammu.

35 Tiwecca nnes ɣar tuffut, imsar aqa Yunatan yuyur barra deg iyyar, di řweqt i igga amsagar ak-d Dawud u tuɣa akides ijj n uḥudri d ameẓyan. 36 Netta inna i uḥudri: “Uyur, arzu x fřitcat nni i ɣa wteɣ.” Aḥenjir yuyur u netta iwta ict n fřitca tekka sennej nnes. 37 Umi dd-yiweḍ uḥudri ɣar wemcan mani teǧa fřitca, iřaɣa-dd Yunatan awarni i uḥenjir, inna: “Ma war tewḍi fřitca zzayek aɣirin ɛad xak?” 38 Iřaɣa Yunatan ɛawed i uḥudri “Deɣya, azzeř, war ttbeddi!” Aḥudri i iǧan ak-d Yunatan issmun fřitca uca iɛqeb ɣar bab nnes. 39 Aḥudri war issin walu. Mɣir Yunatan d Dawud ssnen x tmesřact jar asen. 40 Xenni iwca Yunatan řeqcuɛ n řesnaḥ nnes i uḥudri i tuɣa ɣares iǧan, inna as: “Uyur, arr i-ten ɣar tendint!” 41 Umi yuyur uḥenjir, ikkar Dawud zeg uɣezdis n ljanub uca iwḍa s uɣembub nnes ɣar temmurt uca yuḍar třata n twařawin. Nitni ssudmen ayawya, run s tnayen idsen ařami Dawud yarni dayes. 42 U Yunatan inna i Dawud: “Uyur di řehna. Aqa nejjuǧ s tnayen idneɣ s Yisem n SIDI, nenna: ‘Ad yiři SIDI d acehhad jar ayi d cek, jar zzariɛet inu d zzariɛet nnek, i řebda!’ ”