1 Ḥajan i Dawud, nnan: “Aqa Ifilisṭiniyyen ttmenɣan ak-d Qaɛila uca ttkeccaḍen inedrar.” 2 Isseqsa Dawud SIDI, inna: “Ma ad ffɣeɣ din, ad wteɣ Ifilisṭiniyyen?” SIDI yarra-dd x Dawud: “Ffeɣ, wwet Ifilisṭiniyyen uca fekk Qaɛila!” 3 Nnan as yeryazen n Dawud: “Xzar, neccin netteggʷed deɣya da di Yahuda, mammec ɛad xenni mařa neccin neffeɣ ɣar Qaɛila ɣar iseddiyyen n řɛeskar n Ifilisṭiniyyen.” 4 Uca Dawud isseqsa SIDI twařa nneɣnit u SIDI yarra-dd xas, inna: “Kkar, hwa ɣar Qaɛila, minzi Necc ad ac wceɣ Ifilisṭiniyyen deg ifassen nnek.” 5 Xas uca iffeɣ Dawud ak-d yeryazen nnes ɣar Qaɛila, imneɣ ak-d Ifilisṭiniyyen. Netta yuẓẓeř x tḥimarin nsen uca iwta ten s ict n tecti d tameqqrant. Ammu i ifekk Dawud imezdaɣ n Qaɛila.

6 Umi Abyatar, mmis n Aximalik, yarweř ɣar Dawud ɣar Qaɛila, imsar, netta aqa ihwa ak-d upalṭu n ukehhan deg ifassen nnes. ^■  

7 Ḥajan as i Cawul, aqa Dawud yiweḍ ɣar Qaɛila. Xenni inna Cawul: “AREBBI igga ayi i-t deg ufus inu, minzi netta ittwaḥebbes ařami yudef ɣar ict n tendint s tewwura d zzekrunat.” 8 Ijja Cawul ad dd-řaɣan x marra řgens ɣar umenɣi, ḥima ad hwan ɣar Qaɛila maḥend ad nnḍen i Dawud d yeryazen nnes.

9 Řami yargeb Dawud belli Cawul igga dayes tuɛeffna aya s tnuffra, inna netta i ukehhan Abyatar: “Awi-dd apalṭu n ukehhan da!”

10 Inna Dawud: “A SIDI, AREBBI n Israil, amsexxar nnek isřa nican, aqa Cawul iɛemmed ad dd-yas ɣar Qaɛila ḥima ad ixarreb tandint di ṭṭweɛ inu.

11 Ma ad ayi sseɛdun imezdaɣ n Qaɛila di ṭṭweɛ nnes? Ma ad ihwa Cawul am mammec isřa umsexxar nnek? A SIDI, AREBBI n Israil, ini t i umsexxar nnek!” SIDI yarra-dd: “Netta ad ihwa.”

12 Xas uca inna Dawud: “Ma imezdaɣ n Qaɛila ad sseɛdun necc d yeryazen inu i Cawul?” Inna SIDI “Nitni ad cek sseɛdun.”

13 Xas uca ikkar Dawud ak-d yeryazen nnes, amenni setta mya n yeryazen, uca ffɣen nitni zi Qaɛila uca dewřen gguren mani ma zemmaren ad uyuren. Umi ittwanna i Cawul, aqa injem-dd Dawud zi Qaɛila, ijja zeg webrid nnes, war iffiɣ ca.

14 Dawud iqqim di řexřa di lqelɛat n idurar uca iqqim x idurar di řexřa n Zif. Cawul yarzu xas marra ussan, maca AREBBI war t iggi deg ufus nnes.

15 Umi iẓra Dawud, aqa Cawul tuɣa iffeɣ ḥima ad xas yarzu, tuɣa Dawud di řexřa n Zif di Xurisa. ^□  

16 Xenni ikkar Yunatan, mmis n Cawul, uca yuyur ɣar Dawud di Xurisa u netta issejhed afus nnes di AREBBI.

17 Netta inna as: “War tteggʷed ca, minzi afus n baba Cawul war cek dd-ittikkʷiḍ u cek ad tdewřed d ajeǧid x Israil u necc ad dewřeɣ d wiss tnayen ɣarek. Uřa d baba Cawul issen aya.”

18 U nitni s tnayen idsen ggin ijj n řɛahd zzat i wudem n SIDI. Dawud iqqim di Xurisa u Yunatan yareggʷeḥ ɣar taddart nnes.

19 Xas uca geɛɛden Izifiyyen ɣar Cawul di Jibɛa, nnan: “Ma war innuffar Dawud ɣarneɣ di lqelɛat deg idurar di Xurisa, x tewrirt n Ḥaxila, ɣar ljanub n tnezruft? ^□   20 Xenni řexxu, a ajeǧid, hwa-dd ɛlaḥsab meẓri n wuř nnek. Ad tiři xenni tmesřact nneɣ ḥima ad t nesseɛdu ɣar ufus n ujeǧid.” 21 Cawul inna: “Ad tᵉttwabarkem zi SIDI, minzi cqiɣ awem. 22 Uyurem u wejdem ɛad ktar u ḥḍam u snem amcan mani iǧa uḍar nnes u man wen i t dinni iẓrin, maɣar ittwanna ayi, aqa netta d aḥraymi aṭṭas. 23 Ḥḍam u ssnem marra imucan n tnuffra mani issnuffar ixef nnes u ɛeqbem mařa tkemmřem. Xenni ad kidwem uyureɣ u mařa netta di temmurt, ad imsar, necc ad xas arzuɣ jar marra řuřuf n Yahuda.” 24 Kkaren nitni u izzaren zzat i wudem n Cawul ɣar Zif. Dawud d yeryazen nnes tuɣa aten di řexřa n Maɛun, di Řewḍa ɣar ljanub n tnezruft.

25 Cawul d yeryazen nnes ffɣen ḥima ad xas arzun. Ittwanna aya i Dawud u netta ihwa-dd zi řejruf di řexřa n Maɛun. Umi t isřa Cawul, řexdenni iḍfar netta Dawud di řexřa n Maɛun. 26 Cawul ikka x ijj n uɣezdis n wedrar u Dawud d yeryazen nnes x uɣezdis nneɣni n wedrar. Řami iqeǧeq Dawud maḥend ad yaggʷej x wudem n Cawul, imsar, aqa Cawul d yeryazen nnes nnḍen-dd i Dawud d yeryazen nnes ḥima ad ten ṭṭfen. 27 Maca yusa-dd ijj n ureqqas ɣar Cawul inna: “Deɣya, as-dd, minzi Ifilisṭiniyyen hejmen x temmurt!” 28 Xenni iɛqeb-dd Cawul zeg weḍfar n Dawud uca iffeɣ ɣar umsagar ak-d Ifilisṭiniyyen. S uyenni qqaren as i wemcan nni Salaɛ-Hamaxlikut. ^□