1 Deg wussan nni, umi war din tuɣi ajeǧid di Israil, tuɣa din ijj n Ulawi izeddeɣ d abarrani ɣar iɣezdisen n idurar n Ifrayim. Netta yiwi ict n temɣart d tayya zi Bayt-Laḥm di Yahuda. ^■   2 Maca tayya nnes tedweř tessefḍeḥ ixef nnes umi ɣares tt tuɣa uca tesmeḥ dayes, teɛqeb ɣar taddart n babas di Bayt-Laḥm di Yahuda. Dinni teqqim aṭṭas n wussan, arebɛa n iyuren.

3 Xenni ikkar weryaz, iḍfar i-tt ḥima ad kis issiweř s wuř nnes maḥend ad tt-i-dd issareggʷeḥ. Tuɣa aḥudri nnes akides d ict n tyuya n yeɣyař. Uca nettat tiwyi i-t ɣar taddart n babas. Umi t iẓra babas n tebřiɣt, ifarḥ řami kides i ɣa immeřqa. 4 Aḍeggʷař nnes, babas n tebřiɣt, igga xas aṭṭas aɣiř maḥend akides iqqim třata n wussan. Nitni ccin, swin u ssensen dinni. 5 Imsar deg wass wiss arebɛa, aqa nitni faqen zic ɣar tuffut u netta ikkar ixs ad yuyur. Xenni inna babas n tebřiɣt i wesři nnes: “Semḥeḍ uř nnek s yijj n uřeqqʷuz n weɣrum, xenni ad taf tzemmarem ad tuyurem.” 6 Nitni qqimen, ccin, swin jmiɛ. Xenni inna babas n tebřiɣt i weryaz: “Ttzawgeɣ, qqim da ad tessensed uca ad ifarḥ wuř nnek.” 7 Aryaz ikkar ḥima ad yuyur, maca aḍeggʷař nnes ikellef xas, igga xas aɣiř ḥima ad dinni issens ɛawed. 8 Deg wass wiss xemsa ikkar zic ɣar tuffut ḥima ad yuyur. Inna babas n tebřiɣt: “Arni semḥeḍ uř nnek!” U nitni qqimen ttrajan ař ɣa iɛdu wass uca ccin tnayen idsen munen. 9 Xenni ikkar weryaz ḥima ad yuyur, netta ak-d tayya nnes d uḥudri nnes. Aḍeggʷař nnes, babas n tebřiɣt, inna: “Xzar maca, ass ggur ad iɛdu tiweḍ-dd tmeddit, ttzawgeɣ sensem da. Xzar, sfarḥ uř nnek u kkarem tiwecca zic maḥend ad tᵉṭṭfem abrid ɣar tqiḍunt nnek.”

10 Maca aryaz war ixs ca ɛad ad issens. Ikkar uca yuyur, yiweḍ ař qibač Yabus, tenni d Urcalim, u tuɣa ict n tyuya n yeɣyař bardɛen d tayya nnes aqa-tt akides.

11 Umi ten tuɣa nitni ɣar Yabus, tuɣa ass ggur ad iɛdu. Xenni inna uḥudri i bab nnes: “Uyur, ad da nḍar di tendint-a n Iyabusiyyen, ad dayes nessens.”

12 Maca sidi nnes yarra-dd xas: “Neccin war nettmeyyiř ɣar ict n tendint taɣribt, tenni war iǧin n ayt n Israil, maca ad narni ad nuyur ɣar Jibɛa.”

13 Netta inna ɛawed i uḥudri nnes: “As-dd, ejj aneɣ ad narzu ad naweḍ ɣar ijj zeg imucan nni, ad nessens di Jibɛa niɣ di Rama.”

14 Nitni arnin uyuren u teɣři xasen tfuct umi ten-tuɣa nitni ɣar Jibɛa nni iǧan n Binyamin.

15 Uca ssfarɣen zeg webrid, ḥima ad adfen ɣar din maḥend ad ssensen di Jibɛa. Umi ɣar din yudef, iqqim deg wazzay n tendint, minzi war ten issidef ḥed ɣar taddart maḥend ad ssensen.

16 Uca xzar, ɣar tmeddit iɛqeb-dd yijj n uwessar zi řxedmet nnes zeg iyyar. Tuɣa aryaz nni ɛawed zeg idurar n Ifrayim, maca izdeɣ am abarrani di Jibɛa, maca imezdaɣ n temmurt nni tuɣa aten d Ibinyaminiyyen.

17 Issgeɛɛed tamuɣři nnes, ixzar aryaz nni tuɣa dd-ikkin d abrid deg wazzay n tendint. Awessar inna: “Mani i ɣa tuyured u manis i dd-tusid?”

18 Inna as netta: “Neccin neffeɣ-dd zi Bayt-Laḥm ɣares ař ṭṭarf qaɛ ḍeffar x idurar n Ifrayim, ssenni i dd-usiɣ. Necc tuɣa uyureɣ ɣar Bayt-Laḥm di Yahuda, uca řexxu ggureɣ ɣar Taddart n SIDI uca war da uřa d ijj wenni ixsen ad ayi issidef ɣar taddart nnes,

19 waxxa neccin ɣarneɣ řum d řeɛřef i yeɣyař nneɣ uřa d aɣrum d binu i necc, i tayya nnek u i uḥudri wenni iǧan ɣar imsexxaren nnek. War d aneɣ ixeṣṣ walu.” 20 Xenni inna uwessar yarra-dd xas: “Ad kik yiři řehna! Maca min i d ac iqqimen, aqa-t ɣari, mɣir ittxeṣṣa war tᵉttnusid deg wazzay.”

21 Netta issidef i-t ɣar taddart nnes, iwca řeɛřef i iɣyař u nitni ssirden iḍaren nsen ccin swin.

22 Di řweqt d ict řami ifarḥ wuř nsen, xzar, deɣya nnḍen-dd yeryazen n tendint i taddart, - iryazen nni d ayt i war isekkwin - , uca ssqarqben di tewwart. Nitni ssiwřen ak-d uwessar, bab n taddart, nnan: “Suffeɣ-dd aryaz, wenni dd-yudfen ɣar taddart nnek, ɣar barra, neccin nexs akides newḍa.” ^■   23 Aryaz, bab n taddart, iffeɣ-dd ɣarsen, inna asen: “Lla, a aytma, war tteggem ca tuɛɛefna, awarni řami dd-yudef weryaz-a řexxu ɣar taddart inu. Ɣarwem ad teggem řefḍiḥet am tanita. 24 Xzar, yeǧi d taɛzarect d tayya nnes ad ɣarwem tent ssuffɣeɣ. Sehwam tent u ggem akidsent min texsem, maca deg weryaz-a war tteggem řefḍiḥet am tanita.”

25 Maca iryazen war xsen ad ɣarsen sřan. Xenni iṭṭef aryaz tayya nnes, issuffeɣ i-tt-dd ɣarsen ɣar barra. Nitni uřyen xas, jeyyḥen tt ǧiřet tekmeř ař tuffut u nitni jjin tt ad tuyur ɣares ařami isbeḥ řḥař.

26 Umi d tarreẓ tuffut tusa-dd temɣart-a uca tewḍa ɣar tewwart n taddart n weryaz mani tuɣa iǧan sidis nnes, ɣares ařami i dd-teffeɣ tfawt. 27 Umi dd-ikkar sidis ɣar tuffut, yarzem tiwwura n taddart uca iffeɣ ɣar barra ḥima ad iṭṭef abrid nnes, xzar, din i tewḍa temɣart, tayya nnes, ɣar tewwart n taddart s ifassen nnes x tnebdat. 28 Netta inna as: “Kkar bedd, neccin nexs ad nuyur!” Maca uřa d ijj war xas-dd yarri. Xenni issars i-tt x weɣyuř uca iṭṭef abrid ɣar wemcan n tzeddiɣt nnes. 29 Umi yiweḍ netta ɣar taddart, iksi ijj n řmus, iṭṭef tayya nnes, iqess i-tt x tenɛac n tseqqar uca issekk i-tent ɣar marra jjwayeh n Israil. 30 Uca imsar, aqa qaɛ wenni iẓrin aya, inna: “Man aya ɛemmarṣ ɛad war imsar uřa war t neẓri zeg wass i di ffɣen ayt n Israil zi Miṣra ɣares ař ass-a. Xemmem dayes, mcawarem ak-d wayawya uca inim řeḥkam!”