1 Deg wussan nni war din tuɣi ajeǧid di Israil u deg wussan nni tuɣa taqbič n Dan tarezzu tasɣart i yixef nnes maḥend ad tezdeɣ, minzi war d as dd-tekkar ɛad tesɣart jar tqebbař n Israil. ^■   2 Ssekken ayt n Dan zi řwacun nsen xemsa n yeryazen zeg imucan nsen i iggʷejen aṭṭas, iryazen nni d ayt n umenɣi inni dd-yusin zi Ṣurɛa d Icta’ul, ḥima ad arzun řexbar x temmurt, ad dayes yarzun. Nitni nnan asen: “Uyurem, arzum tammurt!” Usin-dd ɣar idurar n Ifrayim ɣar taddart n Mixa uca ssensen dinni. 3 Umi ten tuɣa nitni ɣar taddart n Mixa, ɛeqřen x tmijja n webřiɣ, Alawi, uca ffɣen zeg webrid ɣares, nnan as: “Min cek i da dd-yiwyen u min i da tᵉttegged u min i da tarezzud cek?” 4 Netta yarra-dd xasen: “Ta d ta igga i-tt akidi Mixa. Netta icra ayi u ammu i dewřeɣ necc d akehhan nnes.” 5 Nitni nnan as: “Seqsa aneɣ AREBBI, maḥend ad nessen, ma abrid i ɣa nuyur, ad yiři mliḥ.” 6 Yarra-dd xasen ukehhan: “Uyurem di řehna! Abrid i texsem ad t tekkem, aqa-t yarezmen zzat i tiṭṭawin n SIDI.”

7 Xenni ruḥen xemsa n yeryazen nni, iwḍen ɣar Layic. Nitni ẓrin aqa řgens izdeɣ dayes di řaman am mammec t tuɣa d lqaɛida ɣar ayt n Ṣidun, s řhudnet u di řaman. Tuɣa war din uřa d ijj di temmurt wenni iḥṣaren x yijjen di ca n řḥajjet niɣ iṭṭef ca s řexcunect. Nitni tuɣa iggʷejen aṭṭas x ayt n Ṣidun u war ɣarsen tuɣi walu uřa ak-d ijj n bnadem. 8 Uca usin-dd ɣar aytmatsen di Ṣurɛa d Icta’ul uca nnan asen aytmatsen: “Man awař i ɣarwem?” 9 Nitni arrin-dd xasen: “Kkarem, jjem ad ngeɛɛed, minzi neẓra tammurt, u xzar, aqa-tt tecna aṭṭas. Ma xenni texsem ad teqqimem tᵉttarsam ammu? War tteɛgizem ca maḥend ad tadfem ɣar temmurt ḥima ad tt tᵉṭṭfem d řwart.

10 Mařa kenniw ad tawḍem din, xenni ad tafem ijj n řgens izeddɣen di řaman uca tammurt tewseɛ aṭṭas ɣar tnayen n iɣezdisen, minzi AREBBI igga awem tt deg ufus nwem, aqa-t d ijj n wemcan mani war d as ittxeṣṣi walu n min iǧan x temmurt.”

11 Xas uca kksen iqiḍan nsen ssenni, zi řwacun n Dan, zi Ṣurɛa d Icta’ul, setta mya n yeryazen ḥezzmen s řesnaḥ.

12 Nitni geɛɛden uca wtin iqiḍan nsen ɣar Qaryat-Yaɛarim di Yahuda. S uyenni qqaren as i wemcan nni ‘Maxan-Dan’ ɣares ař ass-a. Xzar, aqa-tt awarni i Qaryat-Yaɛarim. ^□  ■  

13 Ssenni ffɣen, ɛdun ɣar idurar n Ifrayim iwḍen ɣar taddart n Mixa.

14 Xenni ssiwřen xemsa n yeryazen, inni tuɣa igguren ḥima ad bergen tammurt n Layic, nnan i aytmatsen: “Ma tessnem, aqa di tudrin nni aqa din ijj n upalṭu n ukehhan d řexyařat imeẓyanen n l’aṣnam d ijj n řexyař ineqcen d ijj n řexyař ifesyen? Xenni řexxu, tessnem min xawem ad t teggem.”

15 Řexdenni ffɣen zeg webrid nsen, usin-dd ɣar taddart n webřiɣ, ɣar taddart n Ulawi nni qqaren as Mixa, uca sseqsan x mammec iǧa.

16 Setta-mya n yeryazen zeg ayt n Dan i iḥezzmen s řesnaḥ nsen, qqimen bedden ɣar wadaf n tewwart.

17 Xemsa n yeryazen, inni tuɣa iffɣen ḥima ad bergen tammurt, geɛɛden, udfen u iwyen řexyař ineqcen d upalṭu n ukehhan d řexyařat imeẓyanen n l’aṣnam d řexyař ifesyen. Akehhan iqqim ibedd ɣar uqemmum n tewwart ak-d setta-mya n yeryazen iḥezzmen s řesnaḥ.

18 Xemsa ina udfen ɣar taddart n Mixa u kksen řexyař ineqcen d upalṭu n ukehhan d řexyařat imeẓyanen n l’aṣnam d řexyař ifesyen. Xenni inna asen ukehhan: “Min din tᵉtteggem?”

19 Nitni nnan as: “Susem, sars afus nnek x uqemmum nnek, uyur akidneɣ u dweř d baba d akehhan nneɣ! Min iḥřan, mařa cek d akehhan di taddart n ijj n weryaz waha niɣ mařa cek d akehhan i yict n teqbič d yijj n řaǧ di Israil?” 20 Řexdenni ifarḥ wuř n weryaz nni uca iksi apalṭu n ukehhan d řexyařat imeẓyanen n l’aṣnam d řexyař ineqcen uca yudef jar řgens. 21 Uca ɛeqben nitni, ffɣen uca nedhen iḥenjiren d řmař d ḍḍquřat akidsen ɣar zzat.

22 Umi nitni tuɣa iggʷejen aṭṭas x taddart n Mixa, ittwařaɣa-dd i yeryazen di tudrin yudsen x taddart n Mixa ḥima ad munen uca nitni xeccen x ayt n Dan. 23 Nitni řaɣan awarni i ayt n Dan u ina nnqeřben azeǧif nsen, nnan i Mixa: “Min cek yuɣin? Mayemmi třaɣid ḥima ad ttwasmunen marra?” 24 Inna netta: “Kenniw tekksem xafi irebbiten inu i ggiɣ uřa d akehhan uca tuyurem. Min ɣari řexxu ɛad? Mammec teggim ɛad teqqarem ayi: ‘Min cek yuɣin?’ ” 25 Ayt n Dan nnan as: “Ɣarek ad nseř i tmijja nnek ɣarneɣ niɣ izemmar ad xawem wḍan iryazen yewɛaren u iři ad taɣ ad iweddar řeɛmar nnek uřa d řeɛmur n taddart nnek.” 26 Uca uyuren ayt n Dan deg webrid nsen u umi iẓra Mixa belli nitni tuɣa jehden xas, inneqřeb, yareggʷeḥ ɣar taddart nnes.

27 Nitni maca iwyen min iggin Mixa uřa d akehhan wenni tuɣa ɣares ittsexxaren. Nitni iwḍen ɣar Layic, ɣar ijj n řgens izeddɣen di řhudnet d řaman uca nɣin ten s řeqḍeɛ n ssif u sscemḍen tandint s tmessi. 28 War din uřa d ijjen izemmar ad ten issenjem minzi Layic tuɣa-tt tiggʷwej aṭṭas x Ṣidun u war tuɣi ɣarsen walu uřa ak-d ijj n bnadem. Tuɣa-tt di řewḍa n teɣzurt nni ɣar Bayt-Raḥub. Awarni i uya bnan tandint ɛawed uca zedɣen dayes. 29 Nitni qqaren as i tendint ‘Dan’, x yisem n babatsen Dan, wenni dd-ittwarwen i Israil. Maca zic tandint tuɣa qqaren as Layic. ^■  

30 Ayt n Dan ssbedden řexyař ineqcen i yixef nsen. Uca Yahunatan, mmis n Jarcum, mmis n Musa, netta ak-d iḥenjiren nnes, tuɣa aten d ikehhanen n teqbič n Dan ař ass i di tᵉttwandeh temmurt ɣar lmenfa. ^□   31 Nitni tuɣa ssbedden řexyař ineqcen n Mixa, tenni igga, zzat i yixef nsen marra ussan min tekka Taddart n AREBBI teǧa di Cilu.