1 Ijj n weryaz tuɣa izeddeɣ x idurar n Ifrayim, qqaren as Mixa. 2 Netta inna i yemmas: “Ařef u-mya n uqiyyat n nnuqart i d am ittwakksen u xasent tennid ict n nneɛřet tenni i zi tneṭqed deg imezzuɣen inu, xzar, nnuqart nni aqa-tt ɣari, necc ksiɣ tt.” Yemmas tenna: “Ad ittwabarek mmi zi SIDI!” 3 Netta yarra ařef u-mya n uqiyyat n nnuqart i yemmas uca yemmas tenna as: “Nnuqart ssqeddseɣ tt i SIDI zeg ufus inu i mmi ḥima ad zzayes igg ijj n řexyař ineqcen d ijj n řexyař ifesyen. Xenni řexxu ad ac tt arreɣ.” 4 Netta maca yarra nnuqart ɛawed i yemmas. Xenni teksi yemmas mitayen n uqiyyat n nnuqart u tewca i-tent i yijj n wemziř n wureɣ, wenni zzayes iggin ijj n řexyař ineqcen d yijj n řexyař ifesyen uca ggin tent di taddart n Mixa. 5 Tuɣa Mixa ɣares ict n taddart n arebbi u netta igga ijj n upalṭu n ukehhan d řexyařat imeẓyanen n l’aṣnam u iřeqqem ijjen zeg iḥenjiren nnes ad ɣares yiři d akehhan.

6 Deg wussan nni war din tuɣi ajeǧid di Israil. Kuř ijj ittegg min iǧan nican di tiṭṭawin nnes. ^■   7 Di Bayt-Laḥm di Yahuda tuɣa din ijj n webřiɣ zi řwacun n Yahuda. Netta tuɣa d ijj n Ulawi, tuɣa izeddeɣ dinni d abarrani. 8 Aryaz-a iffeɣ zi tendint nni, zi Bayt-Laḥm di Yahuda, ḥima ad izdeɣ am ubarrani mani ma izemmar ad yaf amcan. X webrid nnes yiweḍ ɣar idurar n Ifrayim ɣar taddart n Mixa. 9 Mixa isseqsa t: “Manis i dd-tusid cek?” Netta yarra-dd xas: “Necc d Alawi zi Bayt-Laḥm di Yahuda, u necc ggureɣ, ḥima ad zedɣeɣ mani ma i ɣa yafeɣ amcan.”

10 Xenni inna as Mixa: “Qqim ɣari uca tiřid ayi d baba d akehhan! Necc ad ac wceɣ ɛecra n uqiyyat n nnuqart d ca n werruḍ d řeɛweč.” Uca Alawi yuyur akides.

11 Alawi yarḍa xas deg wawař ḥima ad iqqim ak-d weryaz u abřiɣ tuɣa i Mixa am ijjen zeg iḥenjiren nnes.

12 Mixa iccur Alawi uca idweř webřiɣ d akehhan i netta uca iqqim di taddart n Mixa.

13 Uca inna Mixa: “Řexxu ssneɣ necc, aqa SIDI ad ayi igg řxar, maɣar necc ɣari Alawi wanita d akehhan.”