1 Xenni ffɣen marra ayt n Israil, uca tmun tmesmunt am ijj n weryaz ɣar SIDI di Miṣfa, zi Dan ɣares ař Bi’r-Sebɛa uřa d tammurt n Jilɛad. 2 Imdebbaren n marra řgens, n marra tiqebbař n Israil, ssbedden ixef nsen di tmesmunt n AREBBI, arebɛa-ařaf n yeryazen x iḍaren, marra iryazen inni izemmaren x ssif. 3 Ayt n Binyamin sřin, aqa ayt n Israil geɛɛden ɣar Miṣfa. Ayt n Israil nnan: “Siwřem, mammec tzemmar ad temsar tuɛeffna-ya?” 4 Aryaz Alawi, aryaz n temɣart ittwanɣen, yarra-dd xasen: “Necc usiɣ-dd ak-d tayya inu zi Jibɛa tenni iǧan n Binyamin, ḥima ad ssenseɣ din. 5 Uca imezdaɣ n Jibɛa nnqeřben xafi, nnḍen ayi-dd di ǧiřet i taddart, nwan ad ayi nɣen u ɣeṣben tayya inu ařami temmut. 6 Xenni ksiɣ tayya inu, bḍiɣ tt d tiseqqar, ssekkeɣ ijj n wezyen zzayes ɣar marra jjwayeh n temmurt n řwart n Israil, minzi nitni ggin řefḍiḥet d tubbuheřya di Israil. 7 Xzar, kenniw marra d ayt n Israil. Arrem-dd kenniw x man aya s wawař d ccwar!”

8 Uca ibedd řgens imun am ijj n weryaz, inna: “Uřa d ijjen zzayneɣ war iggur ɣar tqiḍunt nnes u uřa d ijjen zzayneɣ war ittɛiqqib ɣar taddart nnes. 9 Xenni řexxu, ammu i ɣa negg ak-d Jibɛa: ‘Ad xas neffeɣ ɛlaḥsab taqedduḥt!

10 Ad narecceḥ zi marra tiqebbař n Israil ɛecra n yeryazen zi mya u mya zeg wařef u ařef zi ɛecra-ařef, ḥima ad awyen řeɛweč i řgens, ḥima, xmi i dd ɣa yasen ɣar Jibɛa tenni iǧan n Binyamin, ad ggen akides ɛlaḥsab marra tubbuheřya nni yegga di Israil.”

11 Ammu munen marra iryazen n Israil di tendint-a, tuɣa munen ak-d wayawya am ijj n weryaz.

12 Uca sekkent tiqebbař n Israil iryazen ɣar marra taqbič n Binyamin, nnan: “Mana řefḍiḥet-a i ɣarwem imsaren?

13 Xenni řexxu, wcem aneɣ-dd iryazen nni i war isekkwin, inni iǧan di Jibɛa, ḥima ad ten nenneɣ uca ad ittwamḥa min iǧan d aɛeffan zi Israil.” Maca ayt n Binyamin war xsen ad sřen ɣar aytmatsen, ayt n Israil. ^□  ■  

14 Usin-dd ayt n Binyamin zi tneddam nsen ɣar Jibɛa munen ḥima ad ffɣen ɣar umenɣi ak-d ayt n Israil.

15 Deg wass nni sedden nitni ayt n Binyamin zi tneddam, setta u-ɛicrin-ařef n yeryazen inni izemmaren i ssif, břa imezdaɣ n Jibɛa i zi sedden nitni sebɛa-mya n yeryazen ittwafarzen.

16 Jar marra řgens-a aqa din sebɛa-mya n yeryazen ttwafarzen umi farɣen ifassen. Kuř ijj zzaysen izemmar ad iḥaka mliḥ aṭṭas s yeǧiy s ufus uzeřmaḍ, war xeṭṭin. ^■  

17 Uřa d iryazen n Israil ttwasedden. Nhřa ayt n Binyamin tuɣa aten di arebɛa-mya-ařef n yeryazen inni izemmaren x ssif. Marra nitni d iɛeskariyyen.

18 Kkaren ayt n Israil uca ffɣen ɣar Bayt-Il. Sseqsan AREBBI, nnan: “Man wen zzayneɣ i ɣa iffɣen d amzwaru ɣar umenɣi ak-d ayt n Binyamin?” Inna SIDI: “Amezwaru Yahuda.”

19 Kkaren ayt n Israil ɣar tuffut, wtin iqiḍan nsen ajemmaḍ i Jibɛa 20 Ffɣen yeryazen n Israil ɣar umenɣi ak-d Binyamin uca sedden yeryazen n Israil ixef nsen qibač nsen i umenɣi ɣar Jibɛa. 21 Xenni ffɣen-dd ayt n Binyamin zi Jibɛa uca ɣeḍřen zi Israil deg wass nni tnayen u-ɛicrin-ařef n yeryazen.

22 Maca řgens, iryazen n Israil, ggin taryast, sedden ixef nsen ict n twařa nneɣnit i umenɣi ɣar mani tuɣa sedden ixef nsen deg wass amezwaru. 23 Uca ayt n Israil geɛɛden, tuɣa run zzat i wudem n SIDI ař tameddit, u sseqsan: “Ma ad ffɣeɣ ict n twařa nneɣnit ɣar umenɣi ak-d iḥenjiren n uma Binyamin?” SIDI yarra-dd: “Gaɛɛdem ḍidd i nnes i umenɣi!” 24 Deg wass wiss tnayen qarrben-dd ayt n Israil ɣar ayt n Binyamin 25 uca iffeɣ Binyamin deg wass wiss tnayen zi Jibɛa maḥend ad kidsen immeřqa. Ɣeḍřen ɛawed tmenṭac-ařef n yeryazen ɣar temmurt, inni tuɣa marra zemmaren x ssif.

26 Xas uca ffɣen marra ayt Israil, řgens marra, uca iwḍen ɣar Bayt-Il, run. Qqimen dinni zzat i wudem n SIDI uca ẓummen deg wass nni ɣares ař tameddit uca qeddmen tiɣarṣa n wecmaḍ d tɣarṣa n řehna zzat i wudem n SIDI. 27 Xenni sseqsan ayt n Israil SIDI, minzi din, di Bayt-Il, tuɣa teǧa Ttabut n Řɛahd n AREBBI deg wussan nni. 28 Deg wussan nni tuɣa ibedd Finaḥas, mmis n Aliɛazar, mmis n Harun, zzat i wudem nnes uca inna: “Ma ad neffeɣ ict n twařa nneɣnit ɣar umenɣi ak-d ayt n uma Binyamin niɣ ad nesmeḥ?” SIDI yarra-dd: “Ffɣem, maɣar tiwecca ad ten ggeɣ deg ufus nnek.”

29 Xas uca igga Israil tixecfin ɣar marra iɣezdisen n Jibɛa ^■   30 u deg wass wiss třata geɛɛden ayt n Israil ḍidd i ayt n Binyamin. Sedden ixef nsen i umenɣi ak-d Jibɛa, am mammec tt ggin twařawin iɛdun. 31 Xenni ffɣen ayt n Binyamin i umsagar ak-d ayt n Israil u ttwasiggʷejen x tendint uca, am mammec twařawin iɛdun, bdan ad nɣin iryazen zi řgens x ibriden imeqqranen zeg inni ijj igeɛɛed ɣar Bayt-Il u wenneɣni ɣar Jibɛa, nɣin ɛřaḥař třatin n yeryazen n Israil. 32 Xenni nnan ayt n Binyamin: “Aqa nitni ttwaɣeřben zzat i wudem nneɣ, am twařa tamezwarut.” Xenni nnan ayt n Israil: “Ejj aneɣ ad narweř, ad ten nessiggʷej x tendint ɣar ibriden imeqqranen.” 33 Xenni kkaren marra iryazen n Israil zeg wemcan nsen u sedden ixef nsen i umenɣi ɣar Baɛl-Tamar. Di řweqt d ict usin-dd, inni zi Israil i tuɣa di texceft, x ict n řɣefřet zeg wemcan nsen zeg yefri n Jibɛa. 34 Ɛecra-ařaf n yeryazen ittwafarzen zi marra Israil usin-dd zeg urendad n Jibɛa u amenɣi idweř iwɛar. Maca nitni war ssinen, aqa ticti tḥart xasen. 35 SIDI iwta ayt n Binyamin zzat i wudem n Israil, ařami ayt n Israil nɣin deg wass nni xemsa u-ɛicrin-ařef u-mya n yeryazen inni izemmaren marra x ssif. 36 Ẓrin ayt n Binyamin, nitni tuɣa ttwawten. Xenni wcin iryazen n Israil ttasiɛ i Ibinyaminiyyen, minzi nitni ttecřen x texceft nni tuɣa ggin ḍidd i Jibɛa. 37 Inni i tuɣa innuffaren di texceft, qeǧqen ad ḥejmen x Jibɛa. Ammu i ḥejmen inni i tuɣa di texceft uca wtin marra tandint s řeqḍeɛ n ssif. 38 Iryazen n Israil tuɣa ggin awař ak-d yenni innuffaren di texceft, aqa nitni ad jjen aseynu ameqqran n ddexxan ad dd-igeɛɛed zi tendint 39 uca xenni ad nnqeřben iryazen n Israil deg umenɣi. Binyamin tuɣa ibda ad ineɣ inni ittwasnuqqben zi Israil, ɛřaḥař třatin n yeryazen. Aqa nnan: “Nitni ttwawten nican zzat i wudem nneɣ am deg umenɣi amezwaru.” 40 Ibda useynu ameqqran ad dd-igeɛɛed am ijj n uqellij n ddexxan zi tendint. Umi ixzar Binyamin ɣar ḍeffar, aqa tandint marra tgeɛɛed am ddexxan ɣar ujenna. 41 Xenni nnqeřben-dd iryazen n Israil uca iryazen n Binyamin iwta i-ten unexřiɛ, minzi nitni ẓrin aqa ticti taɛeffant tuɣa teřqef i-ten. 42 Nitni nnqeřben ɣar řexřa zzat i wudem n ayt n Israil. Amenɣi maca iḍfar i-ten, uca zi tneddam aqa ggin din ict n tɣarṣt tameqqrant di řwest nsen. 43 Nitni nnḍen i ayt n Binyamin, ḍfaren ten břa qeṭṭu, ɛefsen xasen ɣares ař amcan n arraḥet qibač n Jibɛa ɣar uɣezdis nnes manis dd-tneqqar tfuct. 44 Wḍan tmenṭac-ařef n yeryazen, marra nitni d iryazen imeḥḍen. 45 Xenni nnqeřben, arewřen ɣar řexřa, ɣar teṣḍart n Rimmun. U x webrid ameqqran qḍan ɛawed x xemsa-ařaf n yeryazen. Ḍfaren ten ɣares ař Jidɛum, wtin zzaysen ařfayen n yeryazen s řmewt. 46 Deg wass nni tuɣa marra inni iwḍan zi Binyamin di xemsa u-ɛicrin-ařef n yeryazen nni zemmaren x ssif, marra nitni d iryazen imeḥḍen.

47 Setta-mya n yeryazen maca nnqeřben, arewřen ɣar řexřa, ɣar teṣḍart n Rimmun, uca nitni qqimen arebɛa n iyuren di teṣḍart n Rimmun. ^■   48 Ɛeqben ayt n Israil ɣar ayt n Binyamin uca wtin ten marra s řeqḍeɛ n ssif, zeg yeryazen n tendint ař řmař d marra min din ufin. Sennej i manaya ssarɣen marra tineddam i ufin deg ubrid nsen s tmessi.