1 U Camcun ihwa ɣar Timna. Di Timna iẓra ict n temɣart jar yessis n Ifilisṭiniyyen. 2 Umi dd-igeɛɛed ɛawed, iḥaja t i babas d yemmas, inna: “Necc ẓriɣ di Timna ict n temɣart jar yessis n Ifilisṭiniyyen. Xenni řexxu, awyem ayi tt d tamɣart i necc!” 3 Inna as babas, uřa d yemmas: “Ma war din teǧi ict n temɣart jar yessis n aytmac u jar marra řgens inu umi texsed ad tawyed ict n temɣart zeg Ifilisṭiniyyen i war ittwaxetnen?” Uca inna Camcun i babas: “Awi ayi i-tt i necc, minzi nettat d tamɣart tecna di tiṭṭawin inu.” 4 Babas d yemmas war ssinen, aqa man aya tuɣa-t zi SIDI, aqa netta yarezzu ssibbet ḍidd i Ifilisṭiniyyen, minzi di řweqt nni tuɣa Ifilisṭiniyyen ḥekkmen x Israil.

5 Ihwa-dd Camcun ɣar Timna ak-d babas d yemmas. Umi iwḍen ɣar imarjaɛen n uḍiř n Timna, xzar, iffeɣ-dd ɣares ijj n weyrad d ameẓyan izehhar. 6 Arruḥ n SIDI iṭṭef i-t ařami t imezzeq axmi ittwamezzeq ijj n iɣayḍ d ameẓyan uca d man aya imsar am war ɣares uřa d ict n řḥajjet deg ufus nnes. Netta war iɛawed i babas d yemmas min igga.

7 Xenni ihwa, issiweř ak-d tmeṭṭut u nettat aqa-tt d tamɣart tecna di tiṭṭawin n Camcun. 8 Awarni ca n wussan idweř ɣar din ɛawed ḥima ad tt yawi d tamɣart. Iffeɣ zeg webrid ḥima ad ixzar řxecbet n weyrad, u xzar, tuɣa din ijj n weyřaf n tzizwa di řxecbet n weyrad, ak-d tamment. 9 Netta iyru tamment deg ifassen, iruḥ uca ittett zzayes am iggur. Umi dd-yusa ɣar babas d yemmas, iwca asen zzayes uca uřa d nitni ccin. Maca netta war d asen ini, aqa netta tuɣa ikkes-dd tamment zi řxecbet n weyrad.

10 Xenni ihwa babas ɣar temɣart u Camcun igga dinni ict n wurar am mammec nnumen ad t tteggen iḥudriyyen.

11 Umi t ẓrin nitni, imsar, belli iwyen třatin n imɛacaren ḥima akides iřin.

12 Inna asen Camcun: “Ejj ayi ad awem iniɣ ict n tḥajit n twafit. Mařa kenniw tzemmaren ad ayi tt tcarrḥem u ad xas teffɣem di sebɛa n wussan n wurar-a, xenni ad awem wceɣ třatin n tikkas d třatin n warruḍ icnan.

13 Maca mařa war tzemmarem ad ayi tt tcarrḥem, xenni kenniw ad ayi tewcem třatin n tikkas d třatin n warruḍ icnan.” Nitni nnan as: “Ini aneɣ tḥajit n twafit nnek, neccin nexs ad tt nseř!”

14 Netta inna asen: “Macca iffeɣ-dd zeg wenni ittetten u taẓyudi teffeɣ-dd zeg wenni ijehden.” Třata n wussan war zemmaren ad carrḥen tḥajit n twafit i d asen inna.

15 Deg wass wiss sebɛa imsar, aqa nnan i temɣart n Camcun: “Ɣwa aryaz nnem maḥend ad aneɣ ifessar tḥajit n twafit niɣ ad am neqqed timessi ak-d taddart n babam. Ma tɛarḍem aneɣ da, ḥima ad aneɣ tekksem agřa nneɣ niɣ lla?”

16 Uca tru temɣart n Camcun zzates, tenna: “Cek aqa tcarrhed ayi waha, war d ayi tᵉttexsed. Cek tennid i tarwa n řgens inu ict n tḥajit n twafit u war d ayi tt tfessared.” Netta yarra-dd xas: “Xzar, war tt nniɣ ɛad uřa i baba uřa i yemma. Mammec i d am tt i ɣa iniɣ i cem?”

17 Nettat maca tru zzates marra sebɛa n wussan nni di ggin urar u deg wass wiss sebɛa imsar ařami i d as tt inna, minzi nettat tehweř i-t uca nettat tcarreḥ tḥajit n twafit i tarwa n řgens nnes.

18 Xenni nnan as yeryazen n tendint deg wass wiss sebɛa qbeř ma ad teɣři tfuct: “Min iǧan d amiẓid x tamment d min ijehden x weyrad?” X uya netta inna asen: “Mařa war tecrizem kenniw s tyenduzt inu, iři kenniw war teffiɣem tḥajit n twafit inu.”

19 Xenni iṭṭef i-t Arruḥ n SIDI uca ihwa ɣar Acqalun uca inɣa třatin n yeryazen u iksi takeccadṭ zzaysen uca iwca arruḍ icnan i yenni issfehmen tḥajit n twafit. Axeyyeq nnes maca tuɣa yareqq uca igeɛɛed ɛawed ɣar taddart n babas. 20 S uya temmewc temɣart nnes i umɛacar nnes, wenni tuɣa i-t iɛacaren.