1 Awarni ca n wussan, deg wussan n tmeyra n irden, imsar, issijji Camcun x temɣart nnes, yiwi akides ijj n iɣayḍ d ameẓyan, inna i babas: “Ejj ayi ad adfeɣ ɣar temɣart inu deg wexxam!” Maca babas war t ijji ad yadef. 2 Inna babas: “S tidett necc nniɣ, cek tɛiffed tt, s uyenni wciɣ tt i umɛacar nnek. Ma war teǧi učmas tameẓyant ɛad tecna xas? Ejj i-tt ad ɣarek tiři deg wemcan nnes.” 3 Uca inna asen Camcun: “Twařat-a ad iřiɣ d acemrař zi jjihet n Ifilisṭiniyyen, mařa ggiɣ daysen min iǧan d aɛeffan.”

4 U Camcum yuyur, iymar-dd teřt-mya n iceɛbawen. Iksi iṣefḍawen uca issneqřeb i-ten ijj x wenneɣni s ikennasen nsen uca di řwest, jar tnayen n ikennasen, icedd ijj n uṣefḍaw. 5 Netta issarɣ iṣefḍawen uca ijja iceɛbawen ad uyuren deg imendi ibedden n Ifilisṭiniyyen. Ammu issarɣ icewwafen n imendi d imendi ibedden, uřa d iyyaren n uzemmur.

6 Xenni nnan Ifilisṭiniyyen: “Wi iggin aya?” Nnan; “Aqa d Camcun, aḍeggʷař n Utimni, minzi wanita yiwi as tamɣart nnes, iwca i-tt i umɛacar nnes.” Xenni geɛɛden Ifilisṭiniyyen uca qqden timessi i temɣart d babas. ^□   7 Xas uca inna asen Camcun: “Mařa kenniw teggim ammu, xenni ḥsen ad zzaywem ntaqmeɣ uca awarni aya waha ad ssbeddeɣ amenɣi.” 8 Netta yarẓa asen ixsan x tnayen, aqa iwta i-ten s ict n tecti d tameqqrant. Xenni ihwa, yuyur izdeɣ deg ifri n teṣḍart n Ɛiṭam. ^□  

9 Xenni geɛɛden Ifilisṭiniyyen uca wtin iqiḍan nsen di Yahuda uca areyycen ixef nsen ař Laḥi.

10 Iryazen n Yahuda nnan: “Mayemmi i dd ɣaneɣ tgeɛɛdem?” Nitni arrin-dd nnan: “Neccin ngeɛɛed, ḥima ad ncarf Camcun maḥend ad kides negg am mammec i kidneɣ igga netta.”

11 Uca hwan teřt-ařaf n yeryazen zi Yahuda ɣar ifri n teṣḍart n Ɛiṭam, nnan i Camcun: “Ma war tessined cek, aqa Ifilisṭiniyyen ḥekkmen xaneɣ? Mayemmi i d aneɣ teggid aya?” Netta yarra-dd xasen: “Am mammec akidi ggin, ammu akidsen i ɣa ggeɣ.”

12 Nitni nnan as: “Neccin nehwa-dd ḥima ad cek ncarf u ad cek negg deg ifassen n Ifilisṭiniyyen.” Xenni inna Camcun: “Jaǧem ayi, aqa kenniw war xafi thejjmem.”

13 Nitni ssiwřen akides, nnan as: “Man aya war ittiři, maca neccin ad cek ncarf u ad cek negg deg ufus nsen, maca s tidett war cek neneqq.” Uca carfen t nitni s tnayen n tseɣwin d timaynutin uca nedhen t zeg ifri ɣar sennej.

14 Řami yiweḍ ɣar Laḥi, ffɣen-dd ɣares Ifilisṭiniyyen s iɣuyyan n umenɣi. Řexdenni ittwafarreɣ-dd xas Arruh n SIDI uca tiseɣwin nni ɣar ifassen nnes dewřent am tiffest i ittwascemḍen s tmessi d iceddiyyen nnes fesyen zeg ifassen nnes.

15 Netta yufa ijj n yiɣes n uqabsi d ṭṭri n ijj n weɣyuř. Xenni isswiẓẓeḍ afus nnes, iḥart xas uca inɣa zzayes ařef n yeryazen.

16 Inna Camcun: “S yijj n yiɣes n uqabsi n weɣyuř, ijj n uɛurric, tnayen n iɛurricen, aqa s yijj n iɣes n uqabsi n teɣyuç nɣiɣ ařef n yeryazen.”

17 Imsar, umi ikemmeř awař nnes, inḍar iɣes n uqabsi zeg ufus nnes uca igga as i wemcan nni Ramat-Laḥi, ‘Řgeɛɛdet n yiɣes n uqabsi’.^□  

18 Řexdenni tuɣa dayes afadi aṭṭas uca iřaɣa ɣar SIDI inna: “Cek tewcid i umsexxar nnek asenjem-a ameqqran. Ma xenni ittxeṣṣa ad mmteɣ s ufadi, ad wḍiɣ deg ifassen n ina inni war ittwaxetnen?” ^■  

19 Xas uca issfeǧeq AREBBI aḥfur n Laḥi, ffɣen-dd zzayes waman. Netta isu uca buḥbeř nnes idweř-dd uca idweř-dd ɣar tudart. S uyenni igga as i tařa nni ‘Tařa n wenni ittřaɣan’. Tanita aqa-tt di Laḥi ɣares ař ass-a. 20 Tuɣa netta d řqaḍi x Israil deg wussan n Ifilisṭiniyyen, ɛicrin n iseggʷusa.