1 Xenni arnin ayt n Israil maḥend ad ggen min iǧan d aɛeffan di tiṭṭawin n SIDI. Xenni inḍar i-ten SIDI deg ufus n Ifilisṭiniyyen, ijj n řmijař n arebɛin n iseggʷusa. ^■   2 Tuɣa din ijj n weryaz zi Ṣurɛa, zi řwacun n Dan. Tuɣa qqaren as Manuḥ. Tamɣart nnes tuɣa war ɣares bu tarwa u war dd-tiruw ca. 3 Iban-dd Lmalak n SIDI i temɣart-a uca netta inna as: “Xzar, war ɣarem bu tarwa u war dd-tiruw ca, maca ad teksid ddeyset, ad tarwed ijj n uḥenjir. 4 Xenni řexxu, ḥḍa ixef nnem! War sess binu uřa d ccrab u war ttᵉtt walu zi marra min inegsen! ^■   5 Maɣar xzar, cem ad teksid s ddeyset, ad tarwed ijj n uḥenjir. War d as ittekk řmus x uzeǧif nnes, maɣar aḥenjir ad yiři d ijj n umɛezzař s temrist n weɛzař i AREBBI zeg uɛeddis n yemmas u netta ad ikkar, ad ifekk Israil zeg ufus n Ifilisṭiniyyen.” ^■  

6 Tamɣart tudef u tessiweř ak-d weryaz nnes, tenna as: “Ijj n weryaz n AREBBI yusa-dd ɣari. Aɣembub nnes igga amecnaw Lmalak n AREBBI, issaggʷad aṭṭas, uca necc war t sseqsiɣ manis dd-yusa, u Netta war d ayi inni mammec i d as qqaren. 7 Netta inna ayi: ‘Xzar, cem ad teksid s ddeyset, ad tarwed ijj n uḥenjir. War sess binu uřa d ccrab u war ttᵉtt walu min ixemjen, minzi aḥenjir ad yiři d amɛezzař s temrist n weɛzař n AREBBI zeg uɛeddis n yemmas ař ass n řmewt nnes.’ 8 Uca iẓẓuǧ Manuḥ ɣar SIDI, inna: “A, Sidi, ttzawgeɣ Cek, ejj aryaz n AREBBI wenni dd tessekked, ad ɣarneɣ dd-yas twařa nneɣnit, ad aneɣ isscen min ɣa negg ak-d uḥenjir wenni dd ɣa ixeřqen.”

9 Uca SIDI isřa ɣar Manuḥ u Lmalak n AREBBI yusa-dd ict n twařa nneɣnit ɣar temɣart. Nettat teqqim deg iyyar uca aryaz nnes Manuḥ tuɣa war kides iǧi. ^□  

10 Nettat tqeǧeq u teɛřef, tɛawed aya i weryaz nnes, tenna as: “Xzar, aryaz nni dd ɣari yusin, iban ayi-dd ɛawed”

11 Ikkar Manuḥ, iḍfar tamɣart nnes. Umi dd-yusa ɣar weryaz, inna as: “Ma Cek d aryaz nni i issiwřen ak-d temɣart inu?” Netta yarra-dd xas: “Wah, d Necc.”

12 Xenni inna Manuḥ: “Xenni řexxu, mařa ttwakemmřen wawařen nnek, min i ɣa tiři řqaɛida i zi ɣa nuyur ak-d uḥenjir u min i ɣa tiři řxedmet nnes?”

13 Inna Lmalak n SIDI i Manuḥ: “Tamɣart ad teḥḍa ixef nnes zi marra min d as nniɣ.

14 Nettat war ttᵉtt min i dd-ittasen zi tzayart uca war tsess binu uřa d ccrab u war ttᵉtt walu zi marra min inegsen. Ad teḥḍa marra min d as umureɣ.”

15 Xenni inna Manuḥ i Lmalak n SIDI: “Ejj aneɣ ad Cek nemneɛ ɣarneɣ cwayt danita u ad ac nessewjed ijj n iɣayḍ d ameẓyan zzat i wudem nnek.”

16 Maca Lmalak n SIDI inna i Manuḥ: “Mařa texsed ad ayi tmenɛed, war ttᵉtteɣ zeg weɣrum nnek u mařa texsed ad tesswejded ict n tɣarṣt n wecmaḍ, ittxeṣṣa ad tt tqedmed i SIDI.” Minzi Manuḥ war issin, aqa-t d Lmalak n SIDI.

17 Uca inna Manuḥ i Lmalak n SIDI: “Mammec i d ac qqaren, ḥima ad ac negg ccan, xmi i ɣa ittwakemmeř wawař nnek.”

18 Inna as maca Lmalak n SIDI “Mayemmi i d ayi tesseqsid x Yisem inu? Aqa wanita d Řeɛjeb.”

19 Xenni iksi Manuḥ ijj n iɣayḍ d ameẓyan zeg iɣayḍen ak-d tewhibt n řɣiǧet uca iqeddem aya x teṣḍart i SIDI. Xas uca igga Netta ijj n řeɛjeb umi Manuḥ d temɣart nnes tuɣa xezzaren. 20 Řami tuɣa aceɛɛař n uɛalṭar igeɛɛed deg ujenna, imsar aqa uřa Lmalak n SIDI igeɛɛed deg uceɛɛař n uɛalṭar. Manuḥ d temɣart nnes ẓrin aya, wḍan ɣar temmurt x iɣembab nsen.

21 Ssenni maca war dd-ibin Lmalak n SIDI ɛad ɣar Manuḥ d temɣart nnes. Xenni issen Manuḥ, belli tuɣa d Lmalak n SIDI. 22 Inna Manuḥ i temɣart nnes: “S tidett neccin ad nemmet, minzi neccin neẓra AREBBI.” ^■   23 Tenna as temɣart nnes: “Mařa SIDI ixs ad aneɣ ineɣ, iři Netta war iksi zeg ufus nneɣ taɣarṣt n wecmaḍ d tewhibt n řɣiǧet u ad tiři war dd aneɣ ittejji ad nẓar ad nseř qaɛ man aya di řweqt-a.”

24 Tamɣart turuw-dd ijj n uḥenjir, tegga as Camcun. Aḥenjir imɣar u SIDI ibarek i-t. ^□  ■   25 Uca Arruḥ n SIDI ibda ad t indeh di řmargeḥ n řɛeskar n Dan jar Ṣurɛa d Icta’ul.