1 Issiweř SIDI ak-d Yacuwa, inna:

2 “Siweř ak-d ayt n Israil, ini: ‘Ad tfarzem tineddam n tarewřa i yixef nwem, min xef d awem ssiwřeɣ s ufus n Musa, ^□  ■   3 ḥima ad yarweř din uqettař nni inɣin ijj n bnadem zeg uweddar, břa ma ad as igg řeḥsab. Ad iřint d imucan mani i ɣa tarewřem zeg uneqqam n idammen. ^□   4 Mařa netta yarweř ɣar icten zi tneddam nni, ad ibedd ɣar tewwart n tendint uca ad iḥaja tamsart nnes deg imezzuɣen n imeqqranen n tendint. Xenni ad t ssidfen di tendint, ad as wcen ijj n wemcan maḥend ad ɣarsen izdeɣ. ^■   5 Mařa xenni iḍfar i-t uneqqam n idammen, war d as tticen aqettař deg ufus nnes, maɣar netta inɣa amqarreb nnes břa ma ad as igg řeḥsab, tuɣa war t icarh ca iḍennaḍ niɣ fariḍennaḍ. 6 Netta ad iqqim izdeɣ di tendint nni, ař ɣa ibedd i řeḥkam zzat i wudem n tmesmunt, uca awarni i man aya ař ɣa immet arrays n ikehhanen wenni din iǧan deg wussan nni. Xenni izemmar uqettař ad iɛqeb ɣar tendint nnes u ɣar taddart nnes, ɣar tendint i zi dd-yarweř.

7 Xenni qeddsen Qadac deg idurar n Naftali di Ljalil u Cakim x idurar n Ifrayim u Qaryat-Arbaɛ, tenni d Ḥabrun, di Temmurt n Idurar n Yahuda. 8 Aɣirin n L'Urdun, di jjihet n ccarq zi Ariḥa, wcin nitni zi teqbič n Rubin Baṣar di řexřa x řwaṭa yuɛřan u zi teqbič n Jad wcin nitni Ramut di Jilɛad u zi teqbič n Manassa tandint n Julan di Bacan. ^■  

9 Tina d tineddam nni ittwaggen i marra ayt n Israil u i ubarrani nni i izeddɣen di řwest nsen, ḥima kuř ijj zeg inni inɣin ijj n bnadem s uweddar, izemmar ad din yarweř, ḥima war ittmetti s ufus n ineqqamen n idammen ař ɣa ibedd i řḥukm zzat i wudem n tmesmunt. ^□